*_✨COMPASS 🧭_ ✨*

*Chapter 1: Hlimna Hlam Zuih*

Thil ṭhenkhat hi chu kan tana ruat anni lo a. Chu vangin kan suangtuahna leh kan duhthusam te pawh kan kalsan mai a ngai ṭhin a ni.

Hringnun hi tunge sawi fiah thiam ang? Hun leh ni te chuan an duhna lamah min len kual vel a ni si a.

Nula kum 25 mi ka ni a, NIFT Shillong-ah Fashion Designing zir lai ka ni a, thla leh mai a, kan chhuak tawh dawn a, mizoram lama haw tur ka ni.

Kum 19 ka nih lai khan ka khawvel chu a thawh hnih nan, thlipui natak in a nuai leh a. Ka hringnun chu a danglam ta dawrh mai.

Ka putea leh ka pu chuan vanduai thlak takin car accident ah min boralsan a. Ka pi nen chauh kan nih tak avangin, ka nu pasal nei a in dang tawh kha, a pasal leh ka nau phir pahnih te nen an lo kir leh ta a ni.

Pawi tihna em em ka nei lo. Kei chu Shillong ah ka awm a, inlam ah ka awm hman si lo a, ka pi lo awmpui tu tur an awm a ngai miau a.

Kan khua haw a, dawr te hawn ka rilruk ve mek a.

Kan khua...

Nie, kan khua tih ka ngaihtuah rual chiah chuan kum 17 ka nih laia ka hun tawn harsa tak, tuna ka nunhlui changta kha, a rawn lut nghal a. Ka dawn kir vawng vawng a, nimin ang mai a ni.

_Flashback 8 years ago_

"Hi Mamtei ka nia, thil ka zawt thei che ngem?"

"Min zawt la. I va induh reng ve..."

_Teh ngawt chuan. He pa hi min hre ngai ami le?_

"Maw?" Tiin ka reply leh a.

"I dam maw? Hmani khan i rawn kal ve dawn maw ka tia."

_Ta deuh deuh chuan. He pa hian min hai chiang lutuk. Ka bawl vak dawn em mawni le..._

"Haha, ṭhianpa, min hre ngai em ni?"

"Ohhh, sorry. Ka ṭhian pakhat nen ka hriat pawlh palh che."

_Ka rin dan vel a ni. He pa hi WhatsApp group pakhat a Pathian thu sawi ve peih deuh kha a nia. Bible chang pakhat zawh ka tum mai a, ka hmelhriat sa a ni bik chuang lo._

"Mak ka ti reng a ni. Min hmelhriat sa biak nghal mai sia. Haha."

Tiin ka va reply ve leh a.

" Zia lo ṭhin. Enge min zawh duh ni reng reng a?"

"Aaa... englo ania Pathian thu i hre riau in ka hria a."

"Haha awihawm loh e. Enge Min han zawt la. Englam nge ni?"

"kha. ‘Engkim ti theia hnenah chuan sawi ngei ka duh a, amah nena ngaihtuah dun ka duh a ni,’ tih Bible chang kha ka hre duh a. Ka theihnghilh a."

"Ohh, chu lam daih chu maw ni a. Awle, Joba 13:3 ah a inziak aw."

"E... awle, ka lawm lutuk e."

Ka phone chu dahin, ka Bible senduk kutphah tia vela lian chu ka keu nghal a.

"Mamte... Mamte... Malsawmdawngkim!"

Tia ka pi awrawl vin zet ka hriat chuan ka meng kawk a. Ka room kawngka chum ri dawt dawt chung hian, "Koh reng hi i hre thei lo mai. Kaihthawh har lutuk. Zanah meng rei ṭhin suh ka ti fo a ni lawm ni?" a ti vin hlak hlak a.

"Aw... ka lo tho," tih leh bathroom luh ka rual a.

_Ka pi hi chu a ṭeng ṭha ve thei ṭhak ṭhak a nia. Mahse min hmangaih ve chiang em asin. Ka nu te bulah awm lo vin, ka pi leh pu te hian min enkawl seilian a. Ka pa hi tu man an hre lo a, ka nu in a sawi duh tlat loh vangin ka pa hming pawh ka hre lo. Ka nu chuan pasal neiin fanu pahnih, ka, a nei a, an in dang a. An hnenah awm ve duh lo vin, ka pi leh pu, ka putea te nen kan khawsa ho a ni._

Inhnuai panin step-ah ka chhuk hnak hnak a. Ka putea exer la zo, tih hriat tak a kawngka lo lut mek chuan, "Mamte, mutui em?" a lo ti nghal var a.

"Um, pute. Vawiin chu min thlah mai la."

ka putea chuan "Awle, lo inpeih fel hma la, kan chhuak hma dawn nia." Alo ti var a.

"Awle," ti a chhangin ka phone ka bih zui nghal zat a. WhatsApp ka lut chu, Pathian thu hre deuh pa message lo awm vang mai. Morning wish a ni. Mi danglam tak a ni. Min nel nghal em mai a, min la hmu tawp si lo. Tih leh ka pi rawngbawl puih ka rual a.

"Mamte, i tlai ange. Hmanhmawh rawh!"

Pawna ṭanga ka putea au lang lang chu.

"Aw, ka lo kal nghal," tih leh tlan chhuah ka rual a.

Kan school compound kan thlen chuan ka ṭhiannu Mawii chuan min lo pan nghal vat a. "Pute, bye," tih leh ka ṭhiannu nen school lam pan kan rual a.

"Enteh maw, nizan chu Pathian thu hre deuh, khâ group ah pawh an hnial laih laih pa kha ka va zawt tawp a, Bible chang kan hriat chhuah zawh loh kha. A ṭhian pakhat nen min lo hriat pawlh pek a. Ka zak tawp. Min hresa ang mai khan min bia a."

"Ni maw... Awi, i tana khuanu ruat te hi a lo ni keuh ange," tih pahin a nui vur a.

"Mawli, thil awihawm dang sawi tur i hre thlawt lo ami?" tih pah chuan a banah ka beng nawk a. Nui uar uar chuan school classroom kan lut a.

Tlai lamah chuan ka ṭhiannu Mawii nen ke in kan haw hnak hnak a, kan school ami, keini ai pawl sang,kan ṭhenawm lawka awm, Arona hian min star tlat pek a, min lo zui ve reng chu niin.

"Ṭhenawmnu, i number min lo pe."

A rawn ti zang vah a.

"Phone ka nei lo," tih leh kal chak sauh ka rual a.

Ka ṭhiannu lah chuan, "Awi, a chhe lo e, pa si. Ka star teh mai nia, I number chu ka pe dawn a nia," a lo ti sek a.

"Huiham, hahthlak. Lo kal mai teh," tih pahin ka hnuk kal dawt dawt a. Chupa lah chuan min la rawn nuih ang vur a.

Kan in peng kan thlen chuan, "Mawi, zanin chu lehkha kan zir dun thei lo ang. Ka pi saw a den tlat, keimah a zir turin min ti tlat a."

"I pi ve chhen hi, a den thei si. Pawilo, zan dangah a ni mai. Bye, naktukah ka lo sawm ang che," tih leh kal a rual nghal a.

In chhung ka luh rualin ka piin, "Mamte, han inti fai la, huana ka maian thar hi ṭhenawmte va tharṭem ve ta che aw," a lo ti vat a.

"Um, thingpui min lo lum la," ka ti nghal zat.

"Awle, han inthlak vat la."

Ka chhuk leh chuan dawhkanah ka thingpui in tur chu chhang nen a lo hung ran a, a bulah maian pawh chu a lo awm vang mai.

Ka in ei puar hnu chuan ṭhenawmte in ka piin a sawi hi kan in aṭanga in 3-na, Arona te in kha a ni a, phur lo zetin ka pan hnak hnak a. Gate ka luh rualin, ui dum lian zet hian min lo bauh chiam a. Ka hlau lutuk chu ka rak chiam a. Kan sir aṭang mipa rawlthar hmelṭha ve tawk tak Arona chuan, "Oscar, tleirawl inleng chhelo deuh kan nei dawn a nih kha, lo hau mah ta che," nui sang hian a rawn ti var a. A ui pawh chuan a pu aw chu hre tak a ni, a tlan phei nghal vat a. Kei lah hamhaih lutuk in ka ding khawng reng.

Arona nu, nu sangpuii chu kawngkapui aṭangin, "Aw haw... Mamte, Oscar-a chuan a lo hau che ni maw? Lo kal teh khai, enge ni? I zuar em ni?" a lo ti nghal sawk sawk a.

"Ih... ihh... ai, ka piin a tharṭem che," tih leh a kuta hmehbel ka rual a, chak zetin ka tlan haw nghal. An nufa a an nui ri pawh ka hre hman. Ka pi kher kher pawh hi, enge min pek tir kher, ka ti nuah nuah a.

Zanah chuan lehkha zir tur chuan ka bih ve ngial a, rilru ah a lut thei lo. Kha Pathian thu hre pa kha a la naupan ve awm teh lul nen, a fakawm phian mai, ka tih nuap nuap lai chuan WhatsApp-ah ka lut vat a. Mahse a text a lo awm miah lo. "Hmm, pawi lo. Ho lutuk, lehkha zir ang,"

Message tone rawn ri ral chuan ka rilru a la peng zawk. Ka phone banin WhatsApp ka en chu, number hriat loh hnen aṭangin massage alo awm vang a.

"Hi ṭhenawmnu."

_Awi, engtin nge ka number a neih le..._

"Enge?" tiin ka reply a

"Engdang ni love, ka duh che a."

_Awi awi awi, teh thawr a. Zak lo e... Kei ngaihzawng vawikhat pawh la nei ta lo chuan ka ten riau a ni._

"Zak lul teh." ka thawn rual rual chuan a seen nghal zat.

"Zak chungin lawm ka sawi, ṭhenawmnu."

_Ka reply tawh nguar ang. Zak lo reuh lutuk,_ tih leh phone dah ka rual a.

Minute 10 vel liam hnuah, awi, min rawn call a nih chu.

Pawr tawkin, "Enge...?" ka lo ti chiam a.

"Ka muhil thei lo a." a rawn ti thum dut a

"Chhing hmak la, i muhil a ni mai." ka tih leh chuan,

"Ṭhenawm tleirawl in ka thinlung a luah khat tlat a, ka muhil thei lo." a rawn ti dam dup a.

"I zak miah si lo amaw..."

"Muhil tawh rawh, ṭhenawmnu. Naktukah kan in hmu dawn nia."

"Kirri," ka ti ringawt chu a nui deuh hak a. "Enge?" ka ti vin hlur chu, "Hlikhlek te, muhil tawh rawh le. I aw ka hria a, ka muhil ve thei tawh ang. Muttui le," tih leh dah a rual a.

_Kei tleirawl star vawikhat pawh la nei ngai lo hian a thu sawi zawng zawng te kha lo dawnsawn dan pawh ka thiam nek lo e a._

Kei hi hmeichhe lerh lo ve tak ka nia, ka kum 17 na ka hmang mek a, fit 5 tling awrh choh, hang ngaihnobei an tih ang hi ka nia.Ka ṭawng duh in mize harh vang tak mai ka ni.

Zankhat chu ka piin, "Mamte, dawr ah damdawi va lei lawk rawh aw," a tia. "Keimah in ka kal peih lo, Mawii ka sawm dawn," ka tia, Mawii chu sawm thla nghalin dawrkawn lam kan pan hnak hnak a. Ruah mal a rawn tla ta fuap fuap a, chawlhbuk hnai berah kan tlan lut ve rawi mai a. Ka rei, Arona te ṭhian ho an lo awm. Ka ṭhiannu lah chuan min sik ngat ngat a.

"Ṭhenawmnu chu, zanah te ngah nge i chhuah a?" a lo ti sup a.

Kei lah chuan, "Enge, a ṭul a ni mai," ka lo ti bung nghat a.

"Ka thlah ang che. Hmeichhia zanah chhuah loh tur," a ti nghat nghat a.

_A ṭul a ni mai ni,_ ti rilru nuap nuapin ka ngawi ngal a.

Ruah lah chu a sur hnem telh telh mai. Chawlhbuk lah chu a te ve sia, a rawn theh huh zo mai dawn a. A laiah kan awm khawm vek a, a lo awm sa mipa pali leh keini ṭhian dun nen chuan. Arona chuan mipa dangin min sik hlau ni awm takin ka hnung lam aṭangin min khuap run a. Ka lung chu phu rang zaih zaih tak a ni. _He mipa hi ka duh ve ta tihna maw le. A... nilo, a ni thei lo ang,_ ti a ka rilru ka kawm neuh lai chuan ruah a lo bang ta der a.

"Ka thlah ang che u," a tih tlat vang chuan, ka ṭhiannu nen chuan min chhawm haw ta hnak hnak a.

"Chhuah na tur pawimawh i neih chuan min hrilh la, ka hruai ang che. Hmeichhia in ni a, pawn chhuah a him lo. Keiman ka kalpui zel ang che," a ti nghat nghat a.

Mawii kan thlah fel hnu chuan kan in lam panin kan pen chat chat a.

"Ṭhenawmnu, a rawn ti thum dut a, ka duh che a, nang pawhin min duh. Tun aṭang ka bialnu i ni tawh,"

Phawk lutuk in ka melh a. Min kuai hnaiin ka chalah min fawp zeuh a, "Haw tawh rawh le, ka lo en ang che," a tih chuan chak deuh hian kan kawngka lam pan chuan ka tlan nghal a. A nui hak ri chu ka hre pha.

In chhung ka lut chu ka sen awp awp, ka zak lutuk. Ka awm chhung ami lah chu a rawn chhuak mai ang tih hlauhawm khawp in a phu rang.

Arona chuan ka khabe ah dawmin a lo kun hniam a, ka hmui ah tak min fawp vawng vawng a.

ka pi awrawl vin zetin "Mamte, lo tho tawh rawh, a mak chen chen lutuk" tia ka room kawngkhar ri dawt dawt ah chuan ka harh hlawl a.

_Awi awi awi leh! Ka mumang em ni? Awi, ka zak lutuk,_ tih pahin khumah chuan ka tal tawp tawp a. Ka pi lah chuan, "Mamte, enge ni? Engati nge? Lo hawng teh," hlau thawng aw takin a lo ti chul mai a.

"Ka pi, ka ṭha. Kan inbual anga, ka lo chhuk ang aw," ka ti dam thlup a.

"Awle, ka ngaih i ti ṭha lo dawn alawm. Lo chhuk vat ang che," a pen thawm chu a hla tial tial a.

Kan gate aṭang ka chhuak chiah chu, "Ka bialnu," a lo ti var a.

"Teh ngawt chuan a," tih leh kal pelh ka rual a.

Ka hnung lam aṭang ka bag-ah lai min rawn phih thlak sak a, amah chuan a hma lamah a ak hmak a. Ka kut rawn chelhin, "Ka bialnu," tih leh min kalpui dawr dawr a rual a.

School gate kan thleng chu ka ṭhiannu Mawii chuan min lo melh ralh ralh a. Kei lah chuan, “Enge?” ka lo ti pawr hlar mai.

Hepa lah hi ka kut a chelh tlat a. “Min thlah teh!” tih leh ka kut thin thlak ka rual a, ka bag ka ban nghal zat. Ṭha te chuan min pe ve mai bawk a.

“Ban ah min lo nghak la, kan haw rual dawn nia, ka bialnu,” a ti dam thup a, inher in a kal vut a.

Ka ṭhiannu chuan min nek salh a, a meng kual ralh ralh. “Ka bialnu tih chu enge awmzia? Sawi fiah rawh,” min ti sek a.

Kei lah chuan, “Ka hre bik chai lo. ‘I bialpa ka ni tawh, ka bialnu i nih hi,’ min ti ringawt alawm,” ka ti a.

Mawii chu a rak chel chul a, min sik vak. “Mawli, ka va han ning tak! Ṭhian fing ve deuh min pe teh plss,” tih leh vanlam hawiin kut suih ka rual a. Mawii lah chu za lutuk hian a nui a, classroom ah kan lut ta a.

Ban ah chuan Arona chu gate ah a lo awm vang tawh a. “Chawhnu class kan nei lo a,” a lo ti var a.

_Chuan min lo nghak ngat ngat tihna em ni hepa hi? A ti mah a ni. Pawilo, a peih mah ahnu, a ho._

Mawii kai a kal mai ka tum chu Mawii chuan, “Mamte, sorry. Min hrethiam mai teh. Ka nu dawr lamah pen kawi ka ngai dawn a, ka u in min lo lam dawn ka hre chhuak thut. Haw rualpui tur i nei tho bawk a, lo va kal mai ru. U Aron, him takin lo va hruai haw rawh aw,” a ti ham a, inla zei deuh chuan mit min siai sak a.

“Inla zei ve sia, ka ten thei e,” ka ti a.

Arona lah chuan, “Awle, lo mangang lo la, zam lo la,” a lo ti vei zat a. Ka hnunglam aṭangin ka dar ah min nam a, min nawr kal dat a.

Haw kawngah chuan thingkung lian deuh hnuai, lungtohlawt awmna ah chuan, “Chawl lawk ila, ṭhu ila,” tih leh min nam ṭhut a rual a. Ka bulah chuan a lo ṭhu thla ve a, ka kut a rawn vuan a.

Kei lah ngaihzawng la nei ngai lo tih takah, “Ih... ihh... Kut in vawn sak vel hi ka ten a nia, ka duh ve lo,” ka ti bah nak a.

A khi sak a. “I va han duhawm tak e aw...” tih pah chuan ka kut chelhin ka lam a lo hawi a, chiang zet hian min melh a.

“In ngaizawng kan ni tawh a, i kutah ka kai che ang a, ka kuah che ang a, i hmui, i biang, i chal ah te pawh ka fawp ṭhin ang che. Len te pawh kan leng dun ve ang a, in ah te pawh ka lo la leng ve ang a, ka bulah i ṭhu ang a, i thingpui lum te ka in ve ang a. Chung chu nula tlangval in ngaihzawnna a thleng tur a ni a, thil hlauhawm leh zahawm lo a ni lo. Kan pi leh pu te aṭang tawh a an lo tih dan ve reng a nia,” a ti dap dap a.

Hnuai lam ka bih ran a, “I zak lo e a,” ka la ti hram pek.

Mahse a aw a thlak a, a ti tak ta riau a. “Hei hi hriat reng tur. Mipa in sex hmanpui ah a thlem che a nih chuan, chu mipa chu hlat ang che. Mipa rilru hi i rin aiin a bawlhhlawh a, i rin ai daih in a rapthlak theih avangin, hmun fal ah kalpui lo la a him ber aw.”

A thu tak em avang chuan ka ṭawng ve ngam tawh chiah lo. Mahse a thu sawi zawng zawng hi ka hrethiam a, a lak ah hian ka him tih ka chiang hle bawk a ni.

“Umm,” ka ti sep a. Nuihsang pahin keimah tiam loh in, a rawn tih leh chuan ka lo nui ve suk a.

A kutphah a ka biang rawn khuap run in, “Mamte, ka duh tak zet che a ni. Min hnar lo ang tiraw?” tihtak hmel takin min melh na chu ka melh kálh a.

Zawi muangin ka hmui a rawn fawh chuan ka lo chhing mawl ve tawp a, lo chhan let dan pawh ka thiam lo, Ka lung chu phu rang tak a ni. Ka tha a khur a, engkim chu a chawl ṭhuap in ka hre lawi si. Ka hmui a fawh vang hnu chuan a tawp a, ka chalah a fawp leh a.

“Ka bialnu, haw tawh dawn ang le. I pi in a lo ngaihtuah tawh ang che,” a tih chuan ka harh zawk a. Khua a lo thim lek tawh. Hmanhmawh tak chuan in lam kan pan a.

In chhung ka luh rual chuan ka pi in, "Malsawmdawngkim, i va rawn haw tlai em ve! Chaw kan ei san hman ṭep che alawm," a lo ti vin hluk hluk a.

Ka pu chuan, "Mamte, han inthlak la, chhung inkhawm kan hmang dawn nia," a lo ti dam thlap thung a.

Ka pi ang hlak hlak pawh chu ka beng a rawngah a lut lo. Nichin lawk a ka thil tawn khan min la luah hneh lutuk tlat. Room ka lut chu ka khumah ka let tawp a.

_Bialpa nei chu ka ni ve ta mai chu nia. Tiang hi em ni ngaihzawng nei te feelings chu.

Hun a kal zel a, u Arona nen pawh chuan kan inzui ve zel a. Ka bialpa hi mipa puitling tak, mi ṭha tak mai a nih zia ka hre telh telh a. U in a farnu duat taka a enkawl ang mai hi kan ang a. Kan inzui ngun ve ta bawk a, ṭhenawm khawveng ah hria an tam ve telh telh a. Ṭhenkhat phei hi chuan, “Pafa in ang hnikhnek” te min ti fiam ṭhin.

U Arona nena kan inngaihzawnna chu Zahawm tak hlimawm si ani. Ngaihzawng neih dan min zirtir a, induhtawk dan te ka tan chuan zirtirtu ṭha tak a ni.

Tuk khat chu ka nu a lo kal a.

“Mamte, vawiin chu class in chawl dawn bawk a, i nau te lo awmpui la. I pa nen lui lamah sangha man pahin huan zu tlawh kan duh a,” a rawn ti a.

Ka pi chuan, “Âw, chungte chu Puii te unau chu he lamah rawn dah chho mai la ni tur. Kan lo awm thei reng alawm,” a lo ti a.

Ka nu chuan, “Ni e, mahse in lo nghak pah se ka tia. Tunlai chu kan veng lamah hian drugs addict an tam sia, ruk a hluar riau a,” a tih leh chuan ka pi chuan a rem ti vak lo.

Mahse ka pu-in, “Ni e, zu awmpui rawh, Mami. Sangha chu rawn man ṭeuh rawh u. Lengphar nghahhrah tih vel chhum tui hang hawp te pawh a khat tawh alawm,” a lo tih takah chuan ka nu chuan, “Mamte, ka rualin lo chhuk nghal mai la,” a ti nghal var a. Ka pi pawhin, “Rawn haw tlai lo ula,” a ti ve ta hram a.

Ka nau te chu an harh dun mai sia, ni lengin kan in vin leh ṭhat ṭhin. In lah chu an lo dah hnawk khawp mai. Tlai lam chu ka chau hnap tawh. Ka nu te an lo haw tlai phian a, zan dar 7 a rik meuh chuan Ka inkhung fel a, ka haw ve hman chiah.

Pawn ka chhuak chiah tihin ka phone ka hmet eng a. U Aron-a chu, _“Hei, anu te an lo haw tlai lutuk a, ka haw dawn chiah aw,”_ tiin ka text a.

Second 10 pawh a ral hmain a call a lo lut nghal. A inkhawm lo em mawni le?

“Hello?” ka tih rual chuan,

“Ka lo kal dawn. Lo chhuak suh, ka thlah haw ang che,” a rawn ti bur a.

“Awi, a ngai lo. Enge, ka haw thei alawm. A hla hlei nem,” ka lo ti ve fan.

“Biakin aṭang ka lo chhuak tawh. Kawngah ka awm. Lo ding rawh,” a ti leh hmiah.

Awii, a over mah mah! Inkhawm lai chhuakin min thlah tur in a rawn kal ringawt. He pa tak hi chu aw.

Minute 5 hnuah bike nen a lo thleng hlawl a. Ka lo ner nâng nang, "Enge, ka haw ve thei reng a. I over ve ê, inkhawm ban hma hma in," ka ti vin hlak hlak a.

Min chhang lo. Helmet min khum tir a, “Kal ang le,” a ti dam thlap a. A hnungah chuan ngawi ngalin ka chuang a.

Kawng lakah pawh ka la tum bur. A hnung zangah ka chal ka nghat a, ka ṭawng lo. Rei fe kan tlan hnu chuan a rawn phun sup a, "Mamte."

Ka ngawi ngal a, ka lawm lo ve deuh ani, min ring zo lo ni awm hrima, min vil chawt mai hi.

"Ka naute hi a nui thei lo em ni?" a rawn ti leh a.

Ka la chhang chuang lo. Bike a ti ding dat a, a rawn hawi let a. A hmel ka hmu chiang thei lo, mahse a thutak hle tih ka hria.

Bike a ṭang chuan a chhuk a. Kei chu bike ah chuan ka la ṭhu. Min rawn ṭhut rem tir in.

"Min en teh, Mamte," a ti zawi sap a.

Ka en ve ta nge nge. Thla eng hnuaiah chuan a mitmeng a lang dum fiah kak a.

"Kum 9 mi chauh ka la nih laiin… ka u Mami kha kum 13 ani tawh a," a ti ṭan a. A aw a zawi, mahse a rit hle. "Zan khat chu ka nu-in dawr-ah thil lei turin a tir a. ‘Bawihpui, i u va kal pui rawh,’ min ti a, kei lah chuan ka hnial a. Ka u chuan, ‘Pawi lo, ka va kal zuai ang a hla chuang hleinem,’ a tiin, a chhuak ta a…”

Uluk tak chuan ka ngaithla a. A sawi zawm zel a.

A lo haw lam chu Pu Enga, Burma thingzai ṭhin hian a lo hmu a, thlanmual hlui lamah pawt thla in a lo sual lui alo nia.

Ka u lo haw har ta deuh chu ka nu chuan, a ngaihtuah ta deuh a. ‘Mama, i u chu a rei riau mai. Va Hmuak ang hmiang,’ a tia. Ka nu nen ka u dawr kal na lam chu kan pan a. Pi Liani dawr kan thlen chuan, ‘A lo haw letna a rei tawh kha,’ a lo ti mai si. Ka nu chu a mangang ṭan ta hle mai, Ka pa kan ko a, kan zawng kual nghal a.

Thlanmual hlui lam aṭanga Pu Enga, thingzai pa chu hmanhmawh takin a lo chho hlawk hlawk chu kan hmu a. Ka pa chuan hmeichhe naupang kum 13 vel bawr a hmuh leh hmuh loh a lo zawt a, chu pa chu a thlanin a bual huh hliam mai. ‘Hmu miah lo ka lo haw ve chiah a ram a ṭang, ka hmanhmawh deuh,’ tih leh kal a rual a. Ka pa chuan ngaihṭhat lohna em em a nei hran lo a niang, hmun dangah kan zawng kual leh a. Mahse kan hmu hauh lo. A ṭhiante, kan chhungte in te kan en kual vek a, kan hmu zo lo.

Ka pu te in kan thlen chuan kan ṭhu vang vang a, ka nu chu a ṭap par tawh mai. Ka pa chu eng emaw hre chhuak thut ni awm hian a ding hluai a, a tlan chhuak nghal vut mai. Ka patea chuan a um chhuak nghal a, keini nufa leh ka patea fapa te pahnih nen kan um zui ve nghal. Ka Pitei chuan, ‘u sangpui, torch light hi keng rawh u,’ a lo ti ve bawk a. Torch light chu banin kan tlan liam ve nghal.

Thlanmual hlui lam chu kan pan ta hlawm a. Ka u chu kan au vak a, torch light chuan kan chhun kual pap bawk. Thlanmual hlui tlak lam deuh chu a hnim ve hle a, hnim chu a lo pe thla sul mai. Ka pa chu torch light nen chuan a tlan thla nghal buan buan a. Khiang thingkung lian tak hnuaiah chuan ka u chu kawr thler phungin, ruak thawthangin a lo mu reng a, nikhua a hre lo. Ka pa chuan a ko mawlh mawlh a, keini pawh kan thleng thla chawpchilh ve mai bawk a. Ka patea chuan min pawm a. Ka nu chu a ṭap rawih rawih mai. Ka pa chuan, ‘Pa tling takin, khai lê. A mar a la awm. Damdawi in lam i pan ang u. Muankim, tlan vat la kan car va la rawh,’ a ti nghal vat a. U Muankima chu a tlan nghal vat.

Ka u chu kan chhan hman hram a. A pawngsualtu chu alo tlanbo hman a mahse ni 3 an zawn hnu in an hmu a mipui kut pawh a tuar na viau a. Police te chuan. jail ah an dah a.

Ka u chu a pangngai hlei thei meuh lo a, naupang harh vang tak hlim thei tak ṭhin kha a zawi a, a ṭawng ngai ta mang lo. Ka pa farnu, ka nitei Saprama pasal nei hi a lo zin a. Amah hi rilru lam doctor a lo ni sa bawk nen, ‘Mami chu khu lamah ka lo enkawl ang e. a tih chuan ka pate pawhin phal lo viau mah se, a tan a ṭha tur ni a an ngaih avangin an kal tir ta a. Kum 20 a nih in a lo let ve leh chauh a ni. Tunah chuan nun pangngai tak neiin a awm ve leh thei ta a.”

Ka thaw a chham lo chauh. Ka kut ka hum ruh a, sawi tur ka hre lo.

A kut lum vung vung chuan ka biang a rawn dawm a. "Chuvang ania, zan a i chhuah hi ka phal ngai loh. I chungah thil ṭha lo a thlen ka hlau a ni. Ka venghim thei lo che anih chuan engtin nge ka awm ang?" A mitmeng a dam dap, mahse a chhungrilah hlauhthawnna a khat. "Khawngaihtakin, zanah chuan mahniin chhuak tawh lo la, min tiam rawh aw. I himna aia ka ngaih pawimawh a awm lo."

A aw ngenngawl lutuk leh a mitmeng a natna ka hmuh chuan ka thinlung a na vawng vawng a. Ka thinrimna zawng zawng kha a thamral vek. Hei vang hi a lo nih hi. A over vang ni lo in, tawhsuak ka tawh alo hlauh vanh ani.

Ka mittui a hnam sawk a. A kut chu ka hum let ve a, "Aw le, ka tiam a che, U Aron. Mahniin ka chhuak tawh lo ang," ka ti sap a.

A thaw huai a, a nui ve ta suk. "Ka lawm e, ka naute," a ti a, ka chalah a fawp zeuh a.

In kan thlen chuan, "I lo lut kawi dawn nange?" tia ka sawm chuan a lu a thing a. "*"Zan dangah aw. Zanin chu ka khua a sik deuh ser a, mut hma pawh a ṭha. Ka haw mai ang,"* a ti a.

*"Aw le, damdawi ei la mu hahdam rawh aw. Tui tak in mu la Naktukah dam takin i tho leh dawn nia,"* ka ti a.

Helmet a khum ṭha leh a, *"Nang pawh kawngka kalh ṭha la. Muttui aw, ka hmangaih,"* tiin a tlan liam ta a.

Kawngka ka kalh a, khumah ka bawk thlawp a. U Aron-a ṭawngkam mal tin te kha ka ngaih tuah let a, A u Mami chunga thil thleng kha rapthak ka ti tak zet.

Zankhat chu a lo lut zuai a. *"Mamte, naktuk chu ka nu nen Aizawl kan han kal dawn a. Eng nge ka lo hawn ang che?"* a ti a. _A mitmeng a dul ruih a, a hma ang khan a nung sar tawh lo. A hmel chu a chauh hmel riau hian ka hria a._

*"I damlo em ni?"* ka ti a.

*"Dam e..."* a ti a, mahse a aw a zawi riai a. *"Ka ngai lutuk che a, ka chau a nih hi,"* tih pah in a nui var a. _Mahse a nui hmel phenah khan thil rit tak a phur tih ka hre thei. Ka zawt zui duh ta lo._

*"Aizawl ah chuan in han cham rei dawn em?"* tia ka zawh chuan, *"Ka hre lo. Karkhat vel a ni maithei. Ka ngai ngawt ang che,"* a ti a. _A aw ah chuan min thlahlel em si, min kalpsan hreh em bawk si a ang._

Ka lai ringawt a, sawi tur hre lo chuan, *"Lo haw leh vat la,"* ka ti ringawt a.

*"Mamte, ka haw mai ang aw. Mut hma ka ngai sia. Min lo thlah la,"* tih leh din a rual a. Pawn varanda thleng ka thlah a. Min kuah a, ka chalah a chal a ti si vang a. _A sa vur mai a, a khur der bawk._

*"I khuasik a nih hi. Haw la, nachhawkna ei rawh aw,"* ka ti a.

*"Umm, va lut tawh rawh. Ka lo haw leh vat ang,"* tih pah in ka chalah a fawp vang a. _A fawhna chu a dam ruih a, min thlahlel vawng vawng tih a hriat._

A tuk ah chuan min lo call a. *"Mamte, tho tawh em? Kan chhuak chiah aw,"* a rawn ti lang a.

Tho phang tih hriat zet hian, *"Umm... Tluang deuhin in kal dawn nia,"* ka lo ti tham ṭiak a.

*"Awle, muhil leh tawh rawh. Thlen hunah ka lo be leh ang che,"* a ti a. Call chu kan ti tawp ta a.

Chaw te ei khama school kal tura ka chhuah dawn chuan call a lo lut a.

*"Hallo?"*

*"Mamte, Aizawl kan thleng tawh aw..."* a lo ti var a,

A nu in, *"Aron Lalremruata, kum 22,"* a tih ri chu ka hria a.

*"Enge in tih dawn a?"* ka tiin ka zawt vat a.

*"Ka college luhna tur vel kan buaipui dawn a. Mamte, a bengchheng lutuk. Motor tlan nen. Nakinah ka lo be leh ang che. Ni hman nuam aw. Ka hmangaih che,"* a ti a.

*"Keipawn ka hmangaih che. Ni hman nuam le,"* ka ti a. Phone call chu kan ti tawp a. Mawii a lo thleng chiah bawk a, school lam kan pan dun ta a.

Kar a liam mai dawn. U Arona chu ka be thei ta hauh lo mai. Min lo be bawk si lo. A chhungte ka zawt ngam teuh si lo. Ka lawm lo chu ka in sawh tau tawh. Ka rilru chuan kiltin a dap kual a. Vawikhat pawh kan nih aṭangin la in zinbo san ngai lo kan nia. Rilru a na riau a ni. Ka ngai bawk si.

Kar hnihna, Nilaini zan ah chuan call ka dawng a. Khua a dur a, ruah sur tur a inṭham ṭeuh mai a. Phone ka en chuan U Arona tih a lo ni a. Ka lungphu a rang zaih zaih a, ka ṭah te lam a chhuak. Call chu la in ka ngawi vang vang a.

*"Mamte?"*

Ka la ṭawng chhuak duh chuang lo. Ka ṭap dawn tlat. Ṭawng chhuak thei ka ni lo. A hriat lai a ṭah ka duh teuh lo.

*"Mamte, ka ngai che."*

Ka insum zo ta lo. Ka in hnit faih faih.

*"Mamte, lo chhuak la. Ka lo haw a, thil ka lo hawn che a, ka lo nghak che aw."*

Call chu kan ti tawp a, ka va tlan chhuak a. Kan in piah, kham phei kawngpui thim ruih ah chuan a lo ding a. Ka pan hnai zel a. A hmel chu chik zet in ka en a, Damlo ang mai hian a dang lap mai a, mahse min hmuh rualin a mitmeng chu a eng leh sar thung._ Kar khat a liam awrh a, ka hmu cher riau mai. A hmel chu a la ṭha em em reng. Ka ngai em a, a bul ka thlen chuan ka kuah chawt a.

*"Engati nge i reh hmak? Ka lawm lo!"* ka aw ri chu a hrethiam ngei ang.

*"Mamte, min ngaidam teh. Ka phone ka ti chhia a, i number ka lo vawng bawk si lo a. Pawi tak a ni,"* a ti a. _A mitmeng ah chuan thup a nei tih ka hre thei. Mahse ka zawt ngam lo. A awm a nawm loh hmel em a ni._

*"Umm, a pawilo,"* ka ti ve mai a.

*"Hei, ka lo hawn che,"* tih leh paper bag hi a rawn khai lang va a. Ka la vat a, ka hai rak a. Sana silver nalh zet leh ṭhi silver hi ka hmu a, ka ri hlut a. *"A mawi lutuk! Ka van lawm!"* ka ti var a.

Glass Snow Ball, a chhunga vur tla sep, nula leh tlangval in-kiss lai vir chiai chiai thei hi a lo awm tel bawk a. *"A mawi lutuk! Ehe, a bula thingkung lem ah hian phengphehlep an fu sep sep anih hi! Ka duh lutuk!"* ka lo ti chel chul a.

Naupang a pa in thil thar a lei sak, hlim lutuk phul hlut ang mai hi ka ni ṭhin. U Arona bulah hi chuan fanu a pa bula thlamuang taka a awm vel ang mai hi ka ni. Kei pa hmangaihna dawng ve ta lo chuan, hei hi a niang ka duha ka thlamuanpui em chhan pawh hi.

*_✨COMPASS🧭✨*

*Chapter 2: Hlimna Hlamzuih*

Kawt aṭangin Mawii’n min rawn au lang a. Vawiin hi Class 10 kan exam tawp ni tur a ni. Lalhlunmawii hi chu a hma thei fiai fiai ṭhin.

Tha tho lo zetin, *"Ka lo kal,"* tiin ka chhuak a. A bul ka thlen chuan, *"Mamte, i va nawm loh hmel ve. Tinge i mood a va uih ve,"* a lo ti nghal zat.

*"Teh maw Mawii, ka rilru a hah a ni."*

*"Tinge? Sawi la, ka hriat ve chi te a ni em?"*

*"Hriat loh chi em chu a awm lo. U Aron-a hi a nia,"* ka ti a, ka ngawi dat.

*"A kawp che em ni?"* A lo ti nghal zat a.

*"Ka hre lo. Chutiang pawh chu a ni chiah lo. Min hlat tial tial hian ka hria. Zanah te pawh a lo leng ṭha duh tawh meuh lo, chhuanlam a siam zel a. Phone-ah pawh kan inbe khat tial tial. Nimin khan a nau ka hmu a, ka zawt a. Aizawl an kal thu a sawi a, kar khat lai an lo awm tawh a nih chu. Engmah min hrilh bawk si lo. Ka lawm tawh lo, Aizawl-ah bialnu a nei a niang. Mahse chutiang mipa chu a ni hian ka hre bawk si lo."*

Mawii chuan, *"Mamte, a ni lo tawp ang. Eng emaw chhungkaw buaina te pawh a ni thei a, i hriat ve a duh lo a ni mai thei asin,"* a ti a.

*"Nia tiraw, a ni thei ve tho mai."*

*"Tirawh, hmanhmawh ang. Saw Zarzoa te pawh an thleng tawh saw."* Tiin gate bul a kan ṭhiante min lo nghahna lam chu kan pan a.

Exam hall-ah pawh chuan rilru ka pe hlei thei lo. Ka pass lo chiang ang. U Aron bawk ka ngaihtuah leh ṭhin.

Kan exam zo haw lam chu Damdawi In bul kawngsir thingpui dawr-ah kan chawl a. Tlangval, U Aron-a te ang rual vel tur hi a lo ṭhu ve a. Hmuh tawhna nei tlat hian ka inhre bawk. Ani lah chuan min lo melh ve run a.

Kan thil chah an lo dah a, kan ei lai chuan nula pakhat, sang lam, ngo pian zeitak, chhelo tak hi a lo lut ve a. Mawii chuan ka beng bulah, *"Awi, hei ai hmun changkang zawk-ah te kal se an inhmeh ngawt ang. Mahse an inla class vak lo a nih dawn hi,"* a rawn ti sa. *"An siam tui an ti te pawh ani thei."* Ka lo ti nghat a.

Hmeichhia chuan, *"Kan Doctor zirlai thar pa chu… he thingpui dawr hi chu i ngaina ve ngawt mai. Hmuh tur i lo awm ve ziah,"* a ti nghal bawrh bawrh a. An in nel viau aniang. Tlangval chu a lo khi suk a, min lo melh leh tawh. A rawn tho ta nge a, min rawn pan a.

Mawii chuan, *"I hmelhriat em ni?"* a lo ti su su. Kan bul a rawn thleng chawpchilh nghal a.

*"Malsawmdawngi, i ni tiraw?"* a rawn ti thum dut a.

Phawk deuha melh kal chung hian, *"Aw, ni e,"* ka ti fel fak. Ka pi ni lo mi dangin ka hmingpum an lam rik tawh hi chuan ka sa phat zel.

*"Joba 13:3,"* a ti ringawt a.

Mawii nen chuan phawk zetin kan inmelh a. Chu pa lam chu rang zetin ka melh a. *"Ihh… nangmah i ni,"* ka ti teh ngawt a. A nui suk a, a nuih pah a, a Biangsum rawn lang chu, in hmeh hrep leh nghala.

*"Aw, keimah."* A tih lai chuan hmeichhia kha a lo kal a. Hepa ai hi chuan a u hrim hrim. Ngawi teh, a kawr awmah khan _Dr. Lalrinpuii_ tih a in tar tlat. Doctor a nih dawn hi.

*"Jos, i ei zawh tawh chuan kal ila. Mi zai ngai ka la nei sia, ka chhoh vat a ngai,"* a rawn ti no hnap a.

Tlangval chuan, *"A nih leh, kan kal ange. Kan inhmu leh dawn nia,"* tih leh kal an rual a.

An chhuah hnu chuan Mawii chuan, *"A van chhelo tak. Doctor zirlai a la ni zui. A number kha i la nei em? Min pe teh, ka bem dawn,"* a ti nghal chung. *"A thisen hi sang fal thei sia.."*

*"A tan chuan, kawngsir a zawhte dum vakvai ang mai i ni ang, engah mah ati lo ang che,"* ka tih chuan, *"Chhe e... a mah saw ka soulmate a ni chiang lutuk. Khawi teh i phone,"* tiin ka phone ken lai min chhuh a. *"Awii zarzoa chu awm se an in kek dak leh awrh tawh ang."* Ka WhatsApp chat a thai thla nghal zat a.

A hming ka hriat loh vanga stiker ka hmuh hmasak ber, Compass lem hmanga ka save tawp, pa ngei chu. Chat hi ka delete ngai lem lo a, a hmu nghal reng a. Kan inbiak dan ngai ngaiin a la awm a. A number chu a inthawn nghal zat bawk a. He nu hi chu star hi a nei urhsun ve thei a nia. Ti hian a be ngam leh dawn chuang miah lo. A dp a en tluk tluk ang a, chu zawng chu.

*"Haw teh ang. Ka pi a lo ṭeng leh tawh viau mai thei,"* tiin kan tho a.

In ka thlen chuan ka pi’n rawng a lo bawl a, ka inthlak sawk sawk a ka pui ve nghal a.

Zanriah kan eikham a, thleng ka sil zo chu sitting-room-ah TV enin ka chhungte an lo ṭhu ṭhap a. Ka room pan mai ka tum chu, *"Mamte, TV lo en ve la. Thingpui senhang lo chawi phei bawk la,"* ka piin a lo ti var a.

Flask-ah thingpui senhang kan dah reng ṭhin vangin ka va thli a. Chawi phei pah chuan, *"Kurtai in duh em? Ka lo keng nghal,"* ka ti lang a.

*"Aw, pawi lo. Mamtei hi chu a nula ve tak ta,"* ka puin a lo ti dam thlup a.

Pangchang zetin ka pi leh pu inkaraah chuan ka va ṭhu a. Inkhel an lo en mek a, a chanchin an sawi zeuh zeuh bawk.

Ka pu chuan, *"Mama, saw Ṭanpuia fapa upa zawk saw Aizawl lamah Damdawi In-ah a awm a ni maw?"* tiin ka putea a zawt a. Chu chuan ka beng a verh zar mai.

Putea chuan, *"Nia, male kha. Mi dang phei chuan an la hre vak lo. Tun thla tir lam khan Aizawl-ah an han in entir a, thisen cancer a lo ni awm asin mawle. A lainat awm reuh khawp mai. An lo haw thla leh a, an chhungkua an inrawn khawm a. Amah lah a chauin a taksa a chhe chak sia, Zemabawk Cancer Hospital-ah awm turin an chho leh ta a nih awm kha,"* a ti a.

Ka pi chuan, *"Aw haw… Chuti em ni? A bengvar loh theih mang e. Ṭhenawm lawk-ah an awm a, a va zia lo em. Kan va len ve te pawh a ṭha a nih chu, Pa-a,"* a lo ti var a.

Ka pu chuan, *"A lo leng ve fo ṭhin sia, a lo lang khat ta riau a, chung a lo nih vang a ni maw. Mamte, in inkawm ngeih viau khan ka hria. Engmah i hre bik na nge?"* Ka thu hriat chuan min ṭhawng lutuk a, ka pu min biakna pawh ka lo hre mai lo.

Ka putea chu melh in, *"Pute, dawt tiraw?"* tih chiah ka sawi thei. Ka mittui a luang nghal ngiai ngiai a. Mahse an sawi hi ka la awi thei lo. Amah ka biak a ngai. Hmanhmawh takin ka room lam ka pan a. Khum sira ka phone charge chu ka phawi a, U Aron-a number chu hmet chhuakin ka call nghal.

A ring ral a, a la tawh dawn lo emaw tih hnuah hmeichhe aw hian, *"Hello… hello, Mamte?"* a rawn ti a. Nu Sangpuii aw a ni tih ka hre nghal.

*"Ih… Nu Sangpui, U Aron-a a dam lo em ni?"* ka ti thawr a.

*"Aw Mamte, Damdawi In-ah kan awm a. A hrilh na che nge? Tunah chuan a muhil rih a, a harh veleh ka lo biaktir ang che aw,"* a tih chuan ṭah insum ṭeuhin, *"Um,"* ka ti sap a.

Engtin nge a nih theih? Ngati nge engmah a sawi loh? Cancer maw? Awih a va har ve. Ka ring thei lo. Zan pawh chu ka mu thei lo, ka ṭap tlaivar a ni hawt a. Zing dar 3 velah chuan a rawn online hring va chu ka hmu a, ka va text nghal.

*"Engtin nge a nih theih?"* ka va ti thawr a. Ka rilrua lang hmasa ber a ni.

A seen hnu rei lovah min rawn call nghal zat.

*"Mamte…"* a rawn ti a. A ṭap em ni le? A aw chu a dik lo. Kei pawh mittui nen ka awm.

*"I thi dawn em ni?"* -ka zawhna mai chu.

A lo thaw deuh hak a, Dam thlup hian *"Mamte, thih ka duh hleinem. Engtin nge ka bialnu hmelṭha lutuk, duhawm em hi ka thihsan phal ang ni?"* A tawp lam chu a ri chang a ni. Thawk la leh hluai ina. *"Mamte, ka hmangaih che,"* a rawn ti a. Ka in hnit faih faih a. Ani pawh a chu a rum chhuak hak mai.

Engtin nge ka tih ang? Ka mangang tak zet. A bulah awm a hnem ka duh a, mahse kei tleirawl mai hian eng nge ka tih theih? Ka chhungten naupang chhia enin min la en si a, keimaha Aizawl kal chu an phal dawn lo nasa.

*"U Aron, min lo hruai rawh. I bulah ka awm duh,"* ka ti ṭap aw ṭuau a.

*"Mamte, ka lo haw thei ṭep. Ka ṭha a nia. Doctor pawn 'I dam tawh lutuk,' min ti a, kan lo haw thei ṭep,"* a tih chuan ka awi lo lutuk. A aw chu a chau lutuk tlat. Kan inbiakna kan tih tawp meuh chuan ni a lo chhuak det tawh.

Exam kan zo tawh bawk nen in lamah ka awm a, ka eng tih mah a tui lo. Ka room-ah ka tawm chawt a. U Aron-a nen pawh kan inbe reng a. Pathianni chawhnu lamah min lo bia a, *"Mamte, ka zia tawh khawp mai. Hei Doctor pawn in lamah haw zuai min phalsak a. Chemo kan khai zo tawh a,"* phur aw tak hian, a rawn ti zang vah a. A zia deuh a nih tak dawn hi. A aw pawh a zangkhai hle mai.

*"Um, lo haw vat rawh. Ka ngai tawh lutuk che nia,"* ka ti var a. Ka phur a ni. Rei tak ka hmu tawh lo.

Thawhṭanni tlai lamah chuan U Aron-a’n min lo call a, *"Kan lo thlenna a rei ve leh tawh. Hei ka mu zal a. Kan school kawng chhaka Lungtohlawt-ah khan han ṭhu thawveng ila, a hla lo bawk a,"* a rawn ti a. *"Awle, ka lo kal nghal,"* tih leh insiam sawk sawk a tlan chhuah ka rual a, ka phur a ni.

School kawng tawntirh-ah chuan a lo ding vang tawh a. A hmel ka hmu chu a lo cher tawh hle a. A biang te pawh a ki van mai a. Amah mipa sang tak, sa ṭha ve tawk tak ṭhin kha tunah chuan a cher ta hle mai. Ka rilru a na a ni. A bul ka va thlen chuan, *"I lo awm rei tawh em?"* ka ti a. Min lo kuah vang a. Kan ngawi dun ran mai. Sawi tur tam tak kan nei ngei ang a, mahse sawi ber tur kan hre lo.

Kawngchhak lung ṭhutna rem zetah chuan kan ṭhu dun ran a.

*"I dam tawh tiraw? Chaw i ei ṭha ang a, i thau leh ang a, mahse i dul a kiar mai ang a. Mahse pawi lo, dulkiar chu vaiin an zah alawm,"* ka thu sawi chu kei pawhin ho ka ti. Mahse sawi ber tur ka hre lo. Ka mit chu a sen ram in ka ring, ṭah ka insum hle a ni.

*"Mamte,"* a rawn tih chuan a lo haw dawn a, a awki zang vah kha chu a ni tawh lo.

*"Mamte, hla ngaithla ang aw,"* tia a earphone rawn la chhuakin a phone-ah a vit a, ka beng-ah a rawn vuah bawk a. A hla rawn play zet chu... Hollow Coves-a sak _Foundation_ tih hla chuan lung a kuai ngei mai.

> _I built a house on a foundation of sand_

> _Watch it all fall through my hands_

> _Now I'm standing in the ruins of every single plan_

> _And I'm not strong enough to fight it_

> _But I'm too proud to say I've lost_

> _Ṭiau chungah in ka sa a_

> _Ka kut aṭanga a tlak darh lai ka thlir a_

> _Ka ruahman sa zawng zawng chim karah tunah hian ka ding a_

> _Bei let turin ka chak tawk tawh lo_

> _Mahse ka tlawm tih erawh ka pawm thei lo_

Ka mittui ka khap per sak a. A lam hawiin, *_"Ih maw, U Aron, Pathian hian ka ṭawngṭaina tlawm te pakhat chauh min tihlawhtlinsak ngei min tiam se la, chu ṭawngṭaina chu i tan a dil nan îhê lovin ka hmang nghal ngei ang.

Mahse, thiltihtheihna chungnung, tinreng damdawi leh thiamna danglam bik ka nei lo va. Pathian lah ka duhzawng tihlawhtling tura keia nawm amaka ka phut leh kar hlawhtlin nghal rual a ni si lo.

Ama duh danin, ama thuin ro a rel a, chu keia lo tihdanglam sak mai theih a ni lo tih ka hai bik lo. Ngenngawl taka ṭahawh a, thuhnuairawlh taka a hnena kan duhna hriattir mai loh chu.

Kan ṭawngṭai ang a, kan dil ang a, i dam leh ngei ngei ang,"__ ka ti a.

Ka lai leh deuh si chuan, U Aron a ṭawng tum mek chu, *"U Aron,"* ka ti hliai ringawt a. *"Ih maw, dawithiam chu ni ila, tuna i taksa-a cancer natna awm, tinatu che zawng zawng hi mit khap kar lovah ka dawi bo nghal duak mai tur a nia… tiraw?"* ka tih chuan a nui suk a.

A nui hmel chu a mawi tak zet. Mahse he mipa ka hmangaih em hi a thi mai dawn tih ka hriatna chuan min rawn deng dawt a. Ka mittui a luang ngiai ngiai a. Hnuai lam bih ranin U Aron-a kut chelhin:

__"I natna te hi ka la bo thei lo va. Van dumpawl thiang kuk mai, chhum dumin a bawh buai reng loh leh ni eng mawi tak ka tiam ngawt ngam lo che a. I nun a zawhna tam tak i neih te hi chhansak che in, Pathian rorel dan te hi i hriatthiam theih turin ka hrilhfiah thei lo che.

Mahse hei erawh hi chu ka ti thei ang: Theihtawp chhuah a ngaihsak che a, hmangaih a enkawl che a, ṭanpuitu kut i mamawh chang apiangin ka kut lo phar chhuah zel ka tum ang.

Min hmangaih takzet chuan,

I lungngaihna zawng zawngte kha min hlân la,

I hlauhthawnnate kha ka hnenah rawn thlen la,

I phurritte kha ka kovah rawn nghat la,

I manganna te kha thilpek angin mi pe ang che;

I natna te ka thinlunga ka lo phûm bo vek hunah,

Chutih hunah chauh chuan

Lungmuangin ka châwl thei ang."__

A khuh kharh kharh a. A mittui tla tur chu dan kir tum in a bek a ti chuar a. A mitmeng chu ṭah insum tih hriat takin a sen rum tawh. Chutah rawn nui luiin, *"Engtik laiin nge ka naute hi a lo puitlin tak em le?"* a ti a. A insum zo tawh lo chu a ṭap chhuak hawk a, nghet takin min kuah a. Kei pawh ka inhnit hlawp hlawp a. Rei ngial chutia kan ṭah hnu chuan…

*"Min en teh, Mamte"*

A chawl dat a. Sawi zawm leh in.

*"Ka hmuh hmasak berna che chu… Pa Mawia dawr-ah khan a nia,"* a ti a. A ngawi leh det a, a chau tih a hriat hle.

Thawk a la a, __"Kha mi ni khan hmeichhe naupang duhawm takin ka mit a la em a, ka en reng a. Ka ṭhiante lah chuan min fiam a, 'Hmeichhe naupang êm chu star lo la aw,' min tia, an nui ham a".

"Kum a lo thar a, Nikhat chu kan school kawtah ka hmu nawlh che a. In ṭhian hoin za zeta i nui hmel kha ka hmu leh hlauh mai a. Kan school i lo luh ni hmasa ber kha. Kei lah a kum leh mai a chhuak tawh tur ka nia sia… Kha kum khat chhunga bem thluk hman che kha ka tum tawp a."

"Mahse i la naupang ka ti deuh bawk si a. Nang lah i kawlh si, i insual reng a, buaina i nei ve reng ṭhin a."

"Nang nen khan duhthusam tam tak ka nei ṭhin a. Nakinah chuan he tleirawl te hi ka bialnu a la ni ang a, hnate ka neih hunah nupui-ah ka sawm ang a, a chhungten lo phal lo vel ngei sela… Harsatna tam tak karah nupa-ah insiam ila, fate neiin hlim takin kan awm anga,” tih ka suangtuah thleng ṭhin asin."

"Mahse enteh, harsatna tam tak kara hmangaihna par chhuak kha ropui riauin ka hre ṭhin a. Mahse, a tak rama harsatna lo thleng ve thung hi chuan, nang leh keia inhmangaihna par chhuak tir a hneh-in, chawr chhuak leh tawh ngai lo turin a phum bo dawn chu a ni sia.”__ A ngawi vang a.

__"I tan hian innghahna nih a, rei tak dam a, i fate nena in hlim hmel te hmuh ka chak asin. In hlim chhan nih ka duh a. In mangan ni-a thlamuan tu che u nih te ka duh asin… Mahse, a fair lo a ni tiraw?

Kei chu ka liam thuai dawn,"* a tih chuan a hmui ka lo hup a. Mittui tling pam chuan, *"Sawi tawh suh,"__ ka ti tham ṭiak a.

Ka kut la thla-in, __"Mamte, beiseina hi inbum tir lo ang. Beisei tur ka awm tawh lo. I thinlung na hi hmuh a hreawm ka ti, mahse tuamdam tur chein thiltihtheihna pawh ka nei ta lo a nih hi.

Ka lo thi a nih pawhin… Keimah vangin i nun ti chhe lo la. Hlim takin mipa dang ṭha tak tawng la, i nun hmang ang che. Van aṭang ka lo thlir reng ṭhin dawn che a… I ṭap lai ka hmuh chuan hreawm ka ti dawn lutuk. I hlim chuan ka hlim a ni tih hre reng rawh aw."__ A aw chu a khur dar a.

*"Ka hmangaih che. Níkhua a lo rei ang a, tuna natna ka siam che hi a la dam ve zel ang a… Mi dang tan hunṭha siam sak thei lo khawp-in lo inkharkhip lo la. Pathianin kei ai ṭha i tan a dah a. Kei chu nun zirtir tu tur mai chein khawvel-ah hian min dah ve a nih hi,"* a ti leh chuan.

*"Ka duh lo! Sawi loh loh sawi suh. Ka hre duh tawh lo. Haw ang,"* tiin ka ding vut a.

*"Awle, Mamte. Min lo kaitho la,"* a ti dam thlup a. A lam ka hawi chuan, mit sen ram chung chuan, mawi ka tih ṭhin dan deuh khan a lo nui seih a. Ka kaitho a, ka chal-ah a fawp vang a. Kan haw thla ta hnak hnak a.

Zanah chuan kan ṭhian hoin va kan ve ngei kan tum a. An in kan va thlen chuan a lo muhil a. Nu Sangpuii chuan, *"In va fel ve. Lo ṭhu rawh u. In ṭhianpa lah chu hei, chaw pawh ei peih lo, a muhil a,"* a lo ti bawrh bawrh a. U Aron-a pi chuan kan kum zat te, kan pi leh pu hming te, kan nu leh pa hming tih ang reng chu min lo zawt luam a. *"Nu Sangpui, kan haw tawh mai ang. A mah ber a muhil tho bawk a… A mut theih chuan a ṭha, muhil rawh se,"* ka ti a. Kan chhuak ta sap sap a. Nu Sangpuii chuan kawngka bul aṭang, *"Awle, in fel lutuk e. In lo leng leh dawn nia. Mangṭha u,"* tiin min luh san ta a. Keini ṭhian ho pawh chu kan haw hnak hnak a.

Zothana chuan, *"Aron-a chu a khawngaihthlak khawp mai,"* a rawn ti chhuak sup a. Zothana te leh U Aron-a te hi classmate an nia, Zothana pawh hi kan ai chuan a u. Mahse, kan inkawm vang hian kan u lem lo.

Peka chuan, *"A dam chhuah ka ring lo. Vengthlang-a U Chhandama pawh kha U Aron-a natna ang tho hi a nia, a dam rei loh em kha,"* a lo tih chuan kan melh ṭhap a. Mawii chuan, *"Lalpekkim, mawl a! Sawi loh loh hi sawi ṭhin suh,"* tih leh chum a rual a. Peka lah chuan, *"Aw… ka sawi ve mai alawm. An natna a in ang sia,"* a la ti hram a.

Kimkimi hi kan zingah a puitling deuh bawk a, *"In ho mai. Pathian zarah a dam ve leh vat mai ang. Ṭawngṭai pui ila,"* a lo ti ve sap a. Kan ṭawng kan ṭawng a, kan in kan thleng dawn der mai. *"A nih, muttui u,"* tiin ka pen san ta hlawm a. Mawii te hi kan veng-ah tho an awm a, mahse kan inhlat deuh. Kan ṭhian dang hi chu veng dang an ni hlawm a, school khat a kal kan nih vang hian kan inkawm tlang thei a.

Ka chhungte chu TV en-in an lo ṭhu ṭhap a. Ka pi chuan, *"Mamte, enge in ṭhianpa chu a lo an a?"* a lo ti var a. Ka pi chu panin, *"Pi,"* tih leh kuah ka rual a, ka inhnit hlawp hlawp a. *"Pi, a thi mai dawn. A na lutuk,"* tiin ka ṭap tlawk tlawk a. Ka pi chuan duat taka min chul in, *"Mamte, Pathian thu a nia… Kan ṭawngṭai ang a, damna kan dilpui dawn nia aw… A dam leh mai ang,"* a lo ti dam diai a.

A tukah chuan ka pi chuan, *"Mamte, Mamte,"* tiin ka room kawngka a lo kik dat a. Nizan ka ṭap tlaivar chiang em a, khawvar hnuah ka muhil ve chauh a, dar 9 a lo ri thuak tawh.

Room kawngka ka va hawn chuan ka pi chuan, *"In ha vat la, i Nu Sangpuii te in-ah phei ang. I pu leh putea te an phei tawh. I ṭhianpa kha a chau zual a ni awm a… Aizawl-ah an phur chho dawn a nih chu."*

Ka bing mup mai a, mumal ka nei lo. Ka vai riai a. Wardrobe-a ka kawr hmuh hmasak ber chu inbel in, kan tlan phei ve nghal a. Ṭhenawm khawveng an lo awm ṭhap tawh. U Aron-a chu an lo kuah chhuak a, motor-ah chuan Nu Sangpuii mal chungah an mut tir a. Ka rilru chuan, _'Thi suh aw'_ ka ti mawlh mawlh a. Ka va pan hnai ngam si lo. Hreawm tak a ni. Ka inhnit feih feih a. Ka mangang tak zet. An tlan liam ta. _Lalpa, i hruai tawh dawn em ni?_ Chu ta ṭang chuan mumal ka nei ta meuh lo. Chaw ka ei thei lo a, ka muhil thei lo va.

Zankhat WhatsApp ka lut chu, status-ah ka ṭhiante ho hian, *"Stay strong Mamte, tuar hram hram rawh aw,"* an lo ti sap a, min lo mention sap a. Ka en kual thuak thuak a. Nu Sangpuii chuan U Aron-a thlalak lo hmangin, caption-ah _'Bawiha, ṭang fan rawh aw. Min ti mangang em mai, awm ngaihna pawh kan hre lo'_ tih hi a lo hmang a.

Ka ṭap chhuak rawih rawih a. Ka rilru hi a na a ni. Au vak a, ka ipikna hi tih kian ka duh a, mahse a sawt si lo.

Ka status-ah chuan... _Hlimna hlam zuih_ tih thu tawi te hi ka hmang a.

Kha tlangval Jos-a, a hming ka hriat loh vanga a number pawh (Compass) stiker hmanga ka save tawp pa khan ka status chu a rawn comment a. _Joba 13:3_ tih zawng hi a rawn thawn a.

Ka seen a, ka en reng lai chuan:

*Jos:* __"He Bible chang a Joba hian engtin nge Engkimtitheia hnenah chuan sawi ngei a duh a, amah nena ngaihtuah dun a chak na chhan hi i hria em?

Joba khan a fapa te, a fanu te, a ran rual te, a chhiahhlawh te, a hausakna zawng zawng a chan vek a. Amah lah phar chhiain a bawm khat vek a. Chung lusunna leh hreawmna nasa tak a tawrh lai pawh chuan Pathian hnenah a vui mai lo va, Pathian hnena sawi a, amah nena ngaihtuah dun chu a la duh fan asin. Pathian hnenah chauh hian damna famkim a awm tih hre reng ang che."_*

Tih chu a rawn thleng leh a. Ka chhiar zo chu eng emaw ti tak hian ka veng huai mai. Bible ka la a, ka chhiar ta a. Joba bu ka chhiar chhuak dap a, Pathian thlamuanna chang niin ka inhria. Tui takin chu zan chu ka muhil ve ta a.

Zingah chuan ka phone riin min ti harh hlawl a. Tho phang aw zet a, *"Hello,"* ka tih chuan Nu Sangpuii aw chuan, *"Mamte, hei Bawiha hian a lam reng mai che a. Vawiinah i U Mami te an lo chho dawn a, i pu te ka dil tawh a, an rem ti bawk a, i lo chho ve mai dawn em mawni le,"* a rawn ti a. *"Awle, a pawi miah lo,"* ka lo ti vat a.

Call kan ti tawp a, ka tho a, ka insiam a. Ka pi chu a lo lut a, *"I Nu Sangpuii khan a lo bia che em? Han chho ve phawt mai teh. Chaw ei ka lo zu siam ang, chhuah hma an duh ang. Nghah ngai a awm loh a ṭha,"* tiin inhnuai lam a pan leh nghal a. Ka pi hi tar chhia a la ni lo a. Nu kum 59 vel a ni a. Amah hi in uluk tak leh hrisel ṭha tak a nih vang nge ni, a kum ai hian a lang naupang daih a. Rawngbawl tih vel pawh hi ama bawl lo chu a duh lo bawk nen ka bawl ve vak ngai lem lo.

Ka inbual a, ka in-pack fel zawh hnu chuan inhnuai-ah ka chhuk a. Ka naute an lo awm vang a. *"U, chaw kan lo ei dawn a, i awm loh chhung kan lo riak dawn. Api te khua a har lutuk ang kan tia,"* an lo ti var a. Ka naute hi phir an nia, an duhawm in ka pi te pawh hian an hlimpui ṭhin a nia. *"A ṭhat chu. Ka room-ah lo lut lo ula, ka thil lo khawih lo ula a ṭha ni mai. Pi, chaw ei kan siam mai dawn em ni?"* ka ti nghal zat a.

Chaw te kan ei kham chuan U Aron-a te in lam kan pan a. Ka naute pahnih leh ka pi leh pu te chuan min thlah a. U Mami hi Aron-a u a ni a, kan in nelsa viau bawk, Min lo hmuh chuan "mamte lo kalrawh u hei kan lo inhlang vel mek a, kan chhuak nghal thei a ni mai aw,"* a lo ti sawk sawk a. Ka bungrua te chu hlang ve in, kan inrem fel zawh hnu chuan kan chhuak ta a. Ka naute chuan min bye lauh lauh mai a, thil min chah kur leh dup tawh, Ka hausak hmel thei a nia.

Ṭawngṭaina hmun kan thlen chuan U Mami chu a ṭawngṭai dap a.

Kan tlan leh hnu chuan ka earphone ka phawrh a, ka bengah ka vuah a, ka maimitchhing diar a. U Aron-a nen kan intawn tirh te, kan inkawp chhoh vel dante kha ka rilru-in a chhui zut zut a.

Ht. Lalthanzami’n _Ka Thai Tluangte_ tih a sak chu a rawn in play a.

> _Dawn thiam a har ngei, Ṭahzai ka rel leh ṭhin_

> _Dam tea len kan rel chauh va;_

> _Ka ring phal lo aw, ka ngaithiam thei mawlh lo,_

> _Fam rihsang min liam san hi._

>

> _Ka duhlai hi Lalpa min chelh sak rawh ti a,_

> _Thlaphang au khan chhangtu a nei si lo;_

> _Van a duai chuang em mai nau ang nuarin,_

> _Ka ṭap ka ṭap mai dawn e._

Tih lai a rawn sak chiah chuan ka insum zo lo. Ka mittui a luang ngiai ngiai a.

> _Theih chang se aw rauthla leng zui ka nuam ngei e,_

> _Sakruang i kiangah ngei zal ve i la;_

Duh thlan theih ni se, U Aron-a hian min kalsan tak anih chuan zui ve nghal mai ka thlang ngei ang. A tel lo chuan engtin nge ka awm ang?

> _A na em e ka tuar thiam lo a ni,_

> _Lalpa min hnem ang che._

*"Aw… Lalpa, hnem ka va ngai tak em,"* ka ti vawng vawng a. Ka chhungril hi a rum vawng vawng a, ka ruak ngawih ngawih. U Mami chuan ka kut a rawn hum a, mahse ka khawharna hi tumahin an hnem zo lo.

_Arona POV_

Ka hming chu Aron Lalremruata. Kum 22 mi ka ni. Aizawl kan kal dawn zan khan ka taksa ah hian thil dik lo a awm tih ka hre tawh. Ka lu a hai reng a, ka chau ngawih ngawih a, ka hnar a thi zeuh zeuh bawk. Mahse Mamtei ka ngaihtuah ber.

_"Mamte, naktuk chu ka nu nen Aizawl kan han kal dawn a,"_ ka ti a. A mitmeng fiah kak khan min en a, _"I damlo em ni?"_ a ti sap a.

_"Dam e... Ka ngai lutuk che a, ka chau a nih hi,"_ ka ti a.

Pawn a min thlah tura kan chhuah chuan, ka chal in a chal ka nawr si vang a. Ka taksa sa vur leh ka khur ru der chu a hriat ka hlau hle a. _"Va lut tawh rawh. Ka lo haw leh vat ang,"_ ka ti a. Ka hmuiin a chalah ka fawp a. Lalpa, he rimtui tak hi ka dam chhunga hriat ka duh.

Aizawl kan thlen rualin Civil Hospital kan pan nghal a. Hming te ziah tir in, kan hun a thlen kan nghak a. Doctor a lo ṭhut chuan hming an lam lauh lauh a. _"Aron Lalremruata"_ tih an lam rual chuan kan lut vat a. Doctor chuan min en uluk hle a. Thisen test, bone marrow test, CT scan te ti turin min tir ta nghal a.

Kar khat chhung chu hriau in min vih loh ni a awm lo. Damdawiin ah chuan kan awm reng a. Ka phone a ri ṭhin. Mamtei hming a rawn lang a, ka en ringawt. Ka chhang ngam lo. Ka phone chu ka switch off ta ringawt a.

Ka chhan chuan ka aw ṭang a man rang leh dawn si a. Ka natna hi a hriat ka duh lo. He hmeichhe tleirawl rilru thianghlim lutuk hi, keimah vangin a nui hmel a ral ka phal lo. Kar khat chhung ka biak loh chhan chu test hrang hrang kan tih a, doctor in min vil chawt vang a ni. Chaw pawh ka ei ṭha thei lo. Ka cher chak hle a, ka mitkhur a thuk dak tawh.

Zirtawpni chuan doctor in ka nu a ko a. Ka nu kut a chelh a, _"Ka pi, tlang takin ka hrilh mai ang che anga. I fapa hi Acute Myeloid Leukemia a ni. Thisen cancer rang ber chi. A stage hi a sang tawh lutuk a... I fapa hi hrilh hriat ṭha i tih leh tih loh chu i thu a ni e,"_ a ti a.

Ka nu chu a ṭap chhuak rawih a. Doctor nen an inbiakna chu pawn aṭang ka lo hre pha ve reng a.

Ka bing mup a. Ka thu hriat chu ka awih thei lo. Karkhat? Thla khat? Kum khat? Eng chen nge ka dam dawn ka hre lo. Ka mitthla ah Mamtei nui sen lai a lo lang a. Ani tan hian ka dam a ngai, mahse ka thei dawn em ni?

Ka nu chuan, _"Bawiha,"_ a ti a, a ṭap rawih a.

_"Ka nu, ṭap mah ta che. In inbiakna kha ka lo hria a. Ka nu, Pathian hian kan tana ṭha lo tur chuan a rel lo ang,"_ ka ti a. A tawp lam chu a ri chhuak lo ṭhelh a ni. Ka thusawi chu keimah ngei hian ka pawm lo a ni.

Kan haw kawngah chuan ka ṭawng lo. Ka nu pawh a ṭap a ṭap mai a. Aizawl kan kal chhan tak pawh kha "college buaipui tur" ni lo in, ka hnar thi leh khawsik awm reng kha in entir kan tum ber a. Kan khua ah ṭhalai thisen cancer vanga boral an awm a, kan inringhlel ve deuh sa bawk kha a nia.

In ka thleng a, ka room ah ka lut tlang nghal. Khum bula Snow Ball ka lei kha ka hum a. A chhungah thil awm chu ka thlir vang a. A hmuh huna a hlim hmel tur ka mit thla a. Ka khi sak a. A chhunga nula leh tlangval in kiss lai chu ka en renga, ka thik rum mai. Ka Mamtei nen khan tiang hian kan awm ve reng thei dawn silo tih ka hriatna chuan min vit na ngut ngut..

_"Lalpa, engati nge tunah kher? Mamtei hi engtin nge ka hrilh tak ang? Engtin nge a lo dawnsawn ang?"_ tiin ka inseh ruh ngawt ngawt a..

Karkhat chuang ka reh hnu ah ka insum zo ta lo. Zan khat chu ka call a. _"Mamte..."_ ka ti chiah a, ka aw a tham chhal. Ka mittui a dir zung zung.

_"Ka ngai che,"_ ka ti thei tawk. A ṭap ri ka hria a, ka thinlung a keh sawm vek mai. Ka thiam loh vek a ni.

_"Lo chhuak la,"_ ka ti a. Ruah a tla cherh cherh a, khua a thim vek. Mahse a lo tlan chhuak lai ka hmuh rualin ka natna zawng zawng ka theihnghilh. Ka damchhung hun tlemte ah hian a nui hmel chiah hi ka hmu duh.

Min kuah a, a taksa lumna chuan min ur ham ham a. _"Engati nge i reh hmak?" "Ka phone ka ti chhia a..."_ dawt bawk ka sawi leh ta. A chhan chu ka cancer tih hrilh ta ila, a kehchhe vek dawn tih ka hria.

_"Ti chhia pawh ni la, phone dang a tam alawm,"_ a ti tan tan a. Chhuanlam eng emaw ka siam kual a, a awih kher ang em maw...

_"Hei, ka lo hawn che a,"_ tih leh ka thil hawn sak - ṭhi silver, sana silver leh Snow Ball chu ka pe a. A hmu chiah chu a phul hlut mai a, a hlim hmel ka hmuh chuan ka chhung ril hi a lawm a. He tleirawl pawisawi lo zet, duhawm em mai hi engtin nge ka kalsan theih ang le? Ka va han hreh tak em, Lalpa, ka ti mawlh mawlh a.

_"Zanin chu ka lo kawi lo mai ang. Kan lo thleng chiah a, ka lo tlawh hmasa ber che a nih hi. Va lut tawh la, ka lo en ang che,"_ ka ti a. Ani chuan min melh kiau in, _"Awle, naktuk zan lo leng la,"_ a ti sap a.

_"Yess, dawn chiang e,"_ tih leh a hmui a fawh vawng vawng ka rual a. _"Kal tawh rawh leh,"_ ka ti a. An in lam pan a kal hnak hnak chu ka thlir reng a. An in a luh dawn chuan uar zetin min lo bye a. A luh hnu chuan chhuak zetin ka ṭap a. _"Engati nge?"_ tih chauh ka sawi thei. A na a ni, Lalpa, ka rilru chuan a ti vawng vawng a.

A tuk ah chuan ka chau em em a, ka mu nileng a ni hawt a. Mamtei pawh ka be thei meuh lo. Zan ah Mamtei hnenah leng turin ka intiam si a. Zan a lo thlen chuan ka chau lutuk chu chhuak thei dawnin ka in hre lo a, Mamtei chu ka bia a, chhuanlam ka siam ta ringawt. Dawt bawk ka hrilh leh ta. Hrehawm hi ka va ti ṭhin tak em.

Ka mit ka chhin rualin ka phun sap a, _"Mamte, min ngaidam rawh aw... ka hrilh thei si lo che a,"

✨COMPASS🧭✨

_chapter 3 _

Phul hmun mawi zetah hian U Arona nen kan lo ṭhu a. Ni a sa ṭha a, thlifim a thaw heuh heuh a, pangpar rimtui tak a nam chiai chiai. A dam ṭhat hmel tawh a, a hmel hmuh a nuam hle. Tlangval ft 5'11" vel a sang, ngo leh sa inphut mawi tak a ni a. A sam a buk deuh chhap a, Hlim hmel a pu sarh mai, a nui mawi em em lehnghal... ka kut a hum lum vang vang a,

"Mamte... Ka awm loh hunah pawh lungngaiin lo indawm kun reng lo la.

Nakinah chuan i natnate hi dam lehin,

i tuarhna zawng zawngte chu thawnthu an la chang ang a.

Heng i hliam leh serte hi

i sulhnu a hmun te tak tê changtu chauh an ni tawh ang.

I tan kawl a êng leh ang a, i thil chân tawh zawng zawngte i

hnenah lo let lehin,

tuna i rumna zawng zawng ata hi i harh chhuak tawh ang a,

hun harsa hi mumang mai a la ni ang. Chhel takin awm rawh aw."

A ti dap dap a. A aw chu a dam ruih a, Ka lu ka bu nghat nghat, ka ṭah chhuak chu ka in sehruh ṭeuh a. "U Aron, min kalsan suh aw," ka ti chhuak sap a. Nuih sak pah hian, ka chalah min fawp zauh a. "Ka Kalsan ngai lo ang che. I thinlungah ka awm reng dawn alawm," a ti leh a.

Motor horn ri tuarh ah chuan ka harh zawk a. Ka mumang ram nuam zet aṭang chuan khawvel tak, tawt leh bengchheng zetah ka let leh ta. Ka lo muhil tui hle a nih dawn hi.

Ka hawichhuak a, patling vin zet lo ang buan buan hi ka hmu hmasa ber. Jimny car dum nalh zet chu bike-in a lo tai rang a lo ni. Patling kawr var ha, dul kiar ve lampang chuan tlangval la naupang tak, hlau hmel tak a melh zak tu chu, kut thlak a tum uai uai mai a. "Ka motor man i hria em? I rul seng dawn a mi?" a ti tuar tuar a. An lo dang nak bawk. Traffic a jam nasa mai a. Kan motor driver pawh a phun nang mai. Traffic police pahnih an rawn tlan phei a, an hruai hrang ta hlawm a.

Kan tlan ṭan leh ta. Ka mumang ngaihtuah let rauh rauh chung chuan kan tlan zel a. Aizawl khawpui hi chu a tawt ve tawh a ni... in a inhnaih hlawm si, kawng a zim si, motor inpel thei mang lo te hi. "Motor a tam si, lu ana bur thei. Khawpui ngang hi ania," U Mami chuan a lo ti ve bawrh bawrh a.

Zemabawk lam panin kan tlan zel a. Zemabawk field kan pel a, naupang ball pet thawm kan hre pha. Nun pangngai tak an hmang a, keini erawh damdawi in lam kan pan mek. Khawvel hi a fair lo ka ti rilru vawng vawng.

Cancer Hospital kan thlen chuan U Arona awmna Cabin No. 14 kan pan nghal a. Kawngkhar ka nem hawn rualin damdawi rim nam huam leh khawl ri tluk tluk chuan min lo hmuak a. Khumah chuan a lo muhil bam mai a. Kar hmasa ai khan a cher leh zual. A biang a ki deuh bawk a, a hmui a ro vek.

A taksaah chuan _ECG Monitor_-in a lungphu a lo chhiar ri tluk tluk a, _Pulse Oximeter_ sen vat chu a kut zungṭangah an vuah sak a, _IV Drip_ hmangin damdawi a khai vang a ni ngei ang, tui fim hnang a far kauh kauh. A hnarah _oxygen tube_ an vuah sak a, chu chuan a thaw ri sak a.

Ka rilru hi a na vawng vawng mai a, han tih vak ngaihna lah awm si lo. A khum bulah chuan ṭhuin a kut cher riak mai, chu ka chelh vang a. A vawt thler mai. Ka kut pahnihin ka hum lum sak a, ka hmuiin ka nawr vang. "U Aron, keimah Mamtei. Ka lo thleng tawh a nia," ka ti sap a. Mahse min chhang lo.

Nu Sangpuii chu tukverh bulah a lo ding a, pawn lam a thlir dauh dauh. A sam a ṭuak ve tawh a, a hma aiin a tar chak hle. U Mami bulah chuan, "Doctor khan lo inring deuh turin min ti a. a taksa hi a chhe chak bawk si, A beidawnthlak hle mai, Mami. Engtin nge maw kan tih dawn ni? Pathian hian min laksak dawn tak em ni?" a ti khur dar a, a beidawng tih chu a aw ṭangin a hriat hle.

U Mami chuan Nu Sangpuii dar ah a kuah in "Nu, beiseina hi kan hloh tur a ni lo. Thilmak a thleng thei alawm," a ti a, mahse a mitmengah chuan beiseina a awm bik lo tih ka hmu reng.

U Arona chu a rawn rum ṭiah ṭiah a, a meng diar a. Min hmu chu a mitmeng a de sawr sawr a, a mittui a tla zawih zawih mai a. Ṭawng tum in a phun sep a, a aw ri hriat tur a awm lo. A hmui a ro lutuk a, ka hmui hnawih te chu la chhuak in ka hnawih sak a.

Ka beng ka dawh hnai a, Ka ngai thla a... "Ka... ngai... lutuk... che... ka... hmangaih... che," a ti ni hian ka hria a, A mittui a luang ngiai ngiai a, Ka kutin ka hruk sak a. Kei pawh chu ka insum viau chungin ka mittui ka dang zo lo. Ka khabe a khur dar a.

"Hei ka lo thleng tawh a nia, ka kalsan tawh dawn lo che. I bulah ka awm reng dawn alawm. I dam leh vat mai ang." ka ti sap a. Dawt ka sawi tih ka hria, mahse tunah tak hi chuan dawt pawh a ngai a ni. A chau em a, rei lo te ah a mit a chhing leh riai riai a, a muhil leh a.

U Mami chuan ka banah min rawn vuan a, "Mamte, kan va phei phawt dawn em ni? Ka ni te in lamah inbual te pawh i duh ang." a lo ti sapa. Min ngaihtuah vang a ni tih ka hria.

Nu Sangpuii pawh chuan, "Ni e, va phei rawh u. a chauh te pawh in chau ang. Hetah chuan keiman ka lo awmpui ang e. Zanah i Pa Ṭanpuia a lo kal ang," a lo ti ve bawk a.

"Nu Sangpui, khawngaihin kalsan ka hreh em mai. A harh leh hunah min hmu lo ang tih ka hlau a ni," ka ti sep a, ka mittui ka hru leh zauh.

"Zan lamah i duh leh kan pahnih in kan awmpui dawn nia. Lo va in eipuar ula, lo va inbual fai vel phawt ula. Chumi hnuah in lo kal leh zawk dawn nia.," a tih chuan hnial chi-ah ka ngai ta lo a, hreh zet in U Mami chu ka zui ve ta a.

Kan thlenna tur chu damdawi in aṭanga ke a minute 5 kal lek, Zemabawk YMA Road ah a lo awm a. In lian lo te, fai tak a ni. Kan intifai zung zung a. Ka hmai ka phih a, darthlalang a ka in en chuan ka mit a bui luk a, ka hmel a dang bei mai. Hei hi keimah ka ni em? zan tam chu ka mu ṭha tawh lo a, ka chaw ei a tui hek lo.

Balcony-ah ka chhuak a. Tlai ni tla tur chu a sen phut a, kawlkil te chu a chhun sen phut mai a, Aizawl khawpui a chhun tle ser ser. Mahse chu mawi na chuan min hnem zo lo. Ngaihtuah ber tur pawh hre lo chuan rilru buai nuai nuaiin ka thlir reng a. U Arona nen a ni tla kan thlir dun ṭhin lai te kha ka ngaihtuah chhuak. "Ni tla hi a mawi tiro, mahse thim in a rawn zui anga, mahse ni chu a ngaite in alo chhuak leh mai ṭhin" a tih lai te kha. mahse ani chu a liam anih chuan a lo lang leh tawh ngai dawn si lo.

U Mami chuan, "Mamte, chaw i ei ang u. Lo phei la. I pum a ruak lutuk ang," a rawn ti a. A aw ah chuan min ngaihtuahna a ri tel.

Chaw kan ei lai chuan Nu Sangpuii chuan U Mami chu a rawn call a. Phone a chhan lai a hmel danglam nghal vek aṭang chuan thil ṭha lo a ni tih ka hre nghal. "Eng a? Tunah maw? Aw... aw... kan lo kal nghal," a ti bah nawk nawk a. Phone a dah a, min rawn en a, " ICU-a an dah luh chiah a, A dinhmun a tla hniam lutuk," a ti a.

Kan chaw ei pawh chu kan ei chhunzawm thei ta hlawm lo. Ka pum a let but a, ka luak a chhuak nghal ut ut. Silhmun panin ka tho nalh a, ka kut te ka sil a, tlan chhuah mai ka tum chu U Mami chuan, "Mamte, min lo nghak rawh, kan chho rual dawn nia." a lo ti pawh chu ka nghak thei lo.

Hmanhmawh zetin ka kal hlawk hlawk a, kawngah chuan ka tlan titih a ni ber. Ka hnungah chuan U Mami leh a pasal U Muana chuan min lo um ve bawk a. Damdawi in step-ah chuan, ka tlan chho zawt zawt a ni ber.

ICU pindan bul ṭhutthleng ah chuan Nu Sangpuii chu a lo ṭhu a, a hmai a hup a, a ṭap khur dar. Ka va thleng chu luh tlang mai ka tum a, mahse nurse uniform var ha, hmel nelawm tak hian min lo dang vat.

"Ka pi, i lut thei rih lo ang. Pakhat ai tam awm phal a ni lo a, pakhat a lut mek a. Pawnah lo nghak rih mai rawh. Hlauthawng suh aw," a ti dam dap a. A aw chu a nem, mahse dan ka ni tih a chiang.

Ka hawi phei a, glass phen deuh aṭang chuan Pa Ṭanpuia chu a lo ding kun lap a, a kawrban a thlep chho a, a kut a hum ruh vang a. A fapa khum bulah ding in a en tlawk tlawk a, A fapa, a chan mek a ni si a.

Ka ding khawng reng. Ka thin a phu rang lutuk a, a chhuak dawn hialin ka hria. A tawp nan pawh ka hmu ve thei dawn lo tihna em ni? Ka thinlung a na lutuk a, ka thaw hleithei lo. Ka awm chhung hi a tawt mup mup a, boruak hip tur a awm lo emaw tih mai tur a ni.

U Mami te pawh chu an lo thleng ve nghal a.

"Ti teh Mamte lo ṭhu ve rawh tih theih a awm rih loh hi" alo tih chuan a sir ah chuan ka ṭhu thla ve hnak a. Kan ṭhu ngawi ran hlawm a. Tumah ṭawng tum kan awm lo. Kan thawm hriat tur awm chhun chu damdawi in corridor thui zet a mi veivak thawm, pheikhawk ri khap khap te, trolley innawr ri te, khawl ri leh kan thinphu ri dup chauh chu a ni ri awm chu.

Chu zan zet chu beidawnna, mangan na leh hlauhthawn na inpawlh nawk kar ah damdawi in pawh chu a vawt ruih mai.

Ka mit ka chhing a, ka mitthla ah U Arona khuma mu zawi ngiai, _Ventilator_ hmang a la thaw ve hram hram, a awm che riai riai lai kha a rawn lang a. _Cardiac Monitor_ screen-a a lungphu line hring zuang zawi tial tial lai, A kut cher riak mai, cabin-a ka vawn hnuhnun ber kha... a kut chelh a thlamuan ka duh asin. A thlaphang ngawt ang, saw room vawt thler thim ruih mai ah sawn amah chauhin an mut tir a ni a. Kei lah pawnah ka ṭhu a, ka pui thei si lo.

"Pathian," ka ti rilru sep a. "I awm tak chuan khawngaihin... ka hmangaih ber min laksak suh. A tel lovin engtin nge ka awm ang?Khawngaihtakin tun chiah..."

Ka mittui a rawn luang ngiai ngiai a. Hruk pawh ka tum hran lo. Ka biangah a luang lum thla pap a.

Nu Sangpuii chu a kun lap a, a ṭap chhuak lo, mahse a taksa khur dar dar aṭangin a na tih a hriat. Zan tam mut mu tuah ṭhat loh avanga, a taksa cher riak leh a mit hnuai val kalh te, a hmai dang lap mai te ka khawngaih a ni. A fapa neihchhun a ni a, engtin nge a tuar ang? Mahse inhnem tur chuang hi kan va awm lo êm.

Darkar khat a liam a. Rei tak a ni. Second tin mai kha kum khat ang a ni. Kawngkhar a rawn inhawng ri khap a, Pa Ṭanpuia chu a rawn chhuak a. A hmel ah chuan beidawnna, thinrimna leh natna a inpawlh nawk a. A mit a sen ram a, a ṭahna lamah a ni lo, a insum nasat lutuk vang a ni. A khabe ruh a pawng ṭawlh ṭawlh a, a ha a ṭhial bap bap. Ṭawng lovin kan bulah a rawn ṭhu thla hnak a, a lu a dawm vawng vawng a, a thaw hrawk hrawk.

Ka ngaihtuahna a vak kual a, sikul kawnga ka number min dil lai te. zan ah arsi kan thlir dun lai te "arsi te thlate hi mawi hle mahse kan khawih phak an ni silo a", a tih lai te.

Ruahsur in chawlhbuk a min dan zan te, kan pahnih chauh a kan awm lai a, "Ṭhenawmnu, ka duh che. Nang pawn min duh tih ka hria," a rawn ti ve ngawt lai te. Ka lai lutuk a, chhan ngaihna hre lo a ka awm lai te kha. Rilru in kan hun hman dun tak, kan nuih dun nasat theih zia te, kan inhauh a kan inthlem leh ṭhin dan te a chhuikir zut a. Khang hun hlimawm te kha, thawnthu hlui, mi dangte hnena sawi tur chauh an chang mai dawn em ni?

Ka lu ka thing nawk nawk a, "A ni thei lo, a ni thei lo," ka phun sep a. Ka kut ka hum ruh a.

Darkar 2 a liam ta. Zan dar 7 a ri tawh. Damdawi in corridor chu a reh deuh tawh a, mahse ICU bul erawh a la eng pup thung.

ICU kawngkhar ah Dr. Mavena, pa zahawm tak tarmit bun, hmel dam thluam mai chu a rawn chhuak a. Pa Ṭanpuia chu a ding chhuak zawt a, "Doctor, enge kan an? A ṭha em?" a lo ti vat a, a aw ah chuan beiseina tlem la awm chu a lang.

"Ka pu," Dr. Mavena'n a ti zawi sup a, a tarmit a phelh a, a hru zauh. "A dinhmun a ṭha lo khawp mai. Kan beisei aiin a nat na hian a hneh chak a."

Khawvel a tawp a ni ber mai. Ka bing mup a, ka lu a hai muai muai.

"Ventilator hmang in a la thaw hram hram a, a thawk hi a muang telh telh a, A taksa a chau tawh lutuk. A lung a function ṭha tawh lo a, a kal pawh a ṭha tawh lo. Thisen ah infection a kai nasa si a, septic shock-ah a lut mek. Kan theih tawp chu kan chhuah a, damdawi ṭha ber kan hmang a. Mahse... kan tih theih piah lam ah hian Pathian chuan engkim a ti thei a ni," a ti dam dap a. A aw ah chuan a beidawng ve hle tih a hriat.

"Chuan... beisei tur awm tawh lo tihna em ni? Damdawi dang a awm tawh lo em ni?" Pa Ṭanpuia aw chu a lawi vek a, Tunah chuan fapa chan mai hlau a mangang pa satliah chauh a ni ta.

Dr. Mavena'n lu a thing a, a mitmeng a khawngaihna a khat chuan. "Pathian kutah a awm tawh. Sawi hrehawm tak a ni, mahse tunah chuan pakhat chiah a lut leh thei ang. A chhungkua in inthlahna hun in nei dawn nia. Tu nge lut ang?..."

Chu thu chuan min deng dawt a. Inthlahna. A awmzia chu a thi dawn tihna.

Nu Sangpuii chuan a mittui hru hul thuak thuak in, "Mamtei va lut rawh se. Bawiha'n a nghahhlelh êm che kha maw. 'Mamte' va lut rawh. " a lo ti vat a, a aw a khur hlawk hlawk.

Keichu ka che thei lo. Ka ke a sai dar a. Ka hlau a ni. A hmel danglam vek tawh tur te, a thaw hleithei lo a ka hmuh tur te. hmuh ka hlau a ni. A thi lai hmel kha ka mitthla a cham reng ang tih ka hlau a ni.

"Kal rawh, Mamte," U Mami'n ka hnungah min nam dat a, min kuah a. "I inchhirna tur thil ti suh. A tan kal rawh. I hmangaih a ni lawm ni?" a ti sap a.

Ka thaw hawk a, ka ding chhuak a. Ka ke a khur nasa mai. Pen khat ka pen a, pen hnih... kawngkhar ka thleng ṭep...

Ka pen tur chiah, chhung lamah thawm mak tak a rawn awm.

Cardiac Monitor alarm ri ring tak, beng verh zet chu a rawn ri a.

Chumi rual rualin nurse leh doctor an tlan lut nghal a, "Code Blue! Code Blue! Crash cart!" an ti lawm lawm thawm leh kawngkhar khar ri khap ri chu "DO NOT ENTER" tih light a eng nghal pap.

Keichu ICU kawngkhar bulah ka ding khawng reng a. Chet mai nachang pawh ka hre lo. Ka thisen a lum pup a, ka beng a kiu vawng vawng. Ka rilru in,

"U Aron! I kal mai dawn em ni? Min chhang rawh! Khawngaihin! Min kalsan dawn em ni? Ka hmangaih che min kalsan thei lo ka phallo. Lalpa, i hruai tak tawh dawn em ni? Khawngaihtakin... tun chiah... tun chiah," ka ti mawlh mawlh a. Ka phun a ni ber, ka au chhuak thei lo.

Kawngkhar lehlam aṭangin chhanna reng a awm lo. Tlan lut thawm te, doctor-in thu a pek lawm lawm thawm te, khawl ri nuai nuai te bak lo chu alarm ri ngawt kha a ri char a. Chu ri chuan ka thluak a verh a,

Pa Ṭanpuia chu bang ngheng in a mit a chhing tlat a, a kut a hum ruh a, a taksa a khur ngawt ngawt. A ṭap lo, mahse a biangah mittui a luang ngiai ngiai. Pa a ni a, a pachan a ngai si. U Mami'n min rawn kuah a, a ṭap khur hlawk hlawk a, "Lalpa, khawngaih rawh," a ti mawlh mawlh. Nu Sangpuii chu chhuatah a ṭhingṭhi a, a kut a suih a, Pathian hming a lam mawlh mawlh bawk a, "Lalpa, ka fapa hi... ka fapa hi..." tih bak a sawi thei lo.

Minute 5... minute 10... chatuan ang a ni.

Thawm a reh ta duk a.

A reh tlawk tlawk. Alarm pawh a tawp ta. Doctor te ṭawng thawm pawh a reh. Thawm dang reng a awm tawh lo. Reh hian a reh tlawk tlawk a ni ber. Chu reh na chuan a sawi chiang ber.

Chumi hnu ah kawngkhar chu zawi muangin a rawn inhawng a. Dr. Mavena a rawn pen chhuak a. A hmai a dang lep a, a tarmit a phelh a. A hmel ah engkim a chiang vek. A mitmeng ah sawi tur a nei tawh lo. A lu a thing mut a.

Kan vaiin kan lo melh ṭhap a, boruak a tang at mai.

"Pawi ka ti khawp mai kan theih tawp kan chhuah" a ti zawi sap a. A aw a lawi vek. "Kan theih tawp kan chhuah a, mahse... kan chhan zo ta lo a ni. Time of death... 7:43 PM."

Kha thu tawi te, second 3 pawh tling lo khan ka nun a ti tawp vek a, ka khawvel chu a thim mup a, ka thaw a tawp ve ta emaw tih mai tur a ni.

Ka khaw hmuh a thim mup a, ka beng a kiu vung vung a, ka tlu tur chu tu emaw in min rawn dawm tih chiah ka hria a, chumi hnu chu engmah ka hre zui ta lo.

Ka harh chhuah leh chuan min lo hmet nawk nawk a, min ko mawlh mawlh bawk. Thil thlen dan chu a rawn lang zut a, ka ngaihtuah let a... Ka hmangaih chu a liam ta tak ta maw? Ka mittui chu a luang zung zung a.

"Khawnge...? Dawt vek a ni thei lo! A thi lo, a theih loh!" tiin thawh chhuah ka tum chu min lo chelh vat a. Min chelhtu ka en chu doctor kawrfual var ha, tlangval hmel fel leh zahawm tak mai, Josa a ni a. U Mami pawh a lo ding ve reng bawk.

Josa chuan ka hma lam aṭangin min kuah bet a, U Mami chuan ka hnung lam aṭangin min lo kuah bet ve bawk a. Mi pahnihin min chelh a, min buaipui a.

Josa chuan, "Chhel takin awm rawh," a lo ti thum dut a. A aw ah chuan min khawngaihna leh min fuihna a ri tel.

"Min thlah rawh u! Min kal tir rawh u!" ka ti tuar tuar a.

Josa chuan, "Ka hruai ang che. Hahdam rawh, chiai lo la, kan kal ang," a lo ti thum leh dut a.

U Mami nen chuan min hruai phei a. Ka hmangaih ruang chu kuangah dah in, phurh haw turin an lo peih fel diam tawh a. Ka tlan phei a, a chal leh ka chal chu ka ti si vang vang a. A pang a dai riai mai! Ka ko lawm lawm a, mahse min chhang thei lo. Ka ṭap nasa lutuk chu ka khawng tih leh ta mai a.

"Ka pi, ambulance-ah chuan chuang ve chi a ni lo. In car-ah phur mai rawh u," tih ri te chu ka hria a, eng mah mumal ka nei meuh lo. Car-a min ṭhut luh tir lai te chu ka hre ruai ruai chauh a ni.

"Mamte, ka dam tawh a nia," ti a, U Aron-an nui sanga min lo en reng chu ka hmu a. A hmelṭha in a fai vuk mai! A awmna hmun chu a êng a, a thianghlim em a. Mahse a hmel chu a lang chiang lo. A awmna chu hla tak a ni si. Thil eng tak lo chhuahna kawngka lam pan chuan a kal a, "Mamte, ka hmangaih che," tiin a kut rawn vai lap in a liam ta mai a! Ka theih tawp in ka tlan a, "Min kalsan suh! Min lo nghak rawh!" tiin ka au a.

"Mamte! Mamte! I harh em? I harh em? Hei, Mamte!" tih ri chuan min ti harh zawk a. Ka mittui a tla zawih zawih a, ka ṭap chhuak nghal rawih rawih bawk.

Car tukverh aṭanga thlifim lo thaw lut heuh heuh chuan min chhem harh sawng sawng a. Ka awih thei lo! He ni, he hun hi eng tik ni ah emaw a lo thleng dawn tih hre reng mah ila, a lo thlen meuh chuan tawrh thiam a va har teh lul em! Ka âwm a tawt ṭun mai.

Zan dar 11 velah kan khaw dai kan thlen chuan, two-wheeler te, car te, sumo te, motor hrang hrang tam takin ruang hmuak in an lo ding ṭhap a. Kan tlan pelh hnu chuan chung ho chuan kan hnungah min zui dam dam a.

U Arona te kawt kan thlen chuan Nu Sangpuii chu a ṭap rawih rawih a. "Mama, Bawihte, ka fapa, ka duat... En teh, i ṭhian ten an lo hmuah che hi. In kan thlen dan hi ka va lungawi lo êm, Bawiha! I ṭhiante hmel hi en teh. I tello chuan ka hmachhawn thiam lo... Lo chhawn ta che!" tiin a ṭap hawm hawm mai a.

Ruang chu la thla in, in chhung lamah an zawn lut a. Ka pi chuan min lo pan vat a, min kuah a. Kei chu ka ṭap thei tawh lo, ka ngawi reng a. In chhungah chuan kan lut a, ruang kan kil a. Ngawi rengin U Arona ruang, pangti lumna nei tawh lo chu a hmai ah chul in ka en tlawk tlawk a. Mak tak maiin ka ṭap thei tawh lo. Ka na lutuk hi ṭap tur pawh ka awm tawh lo a ni ber e.

Pa Ṭanpuia pawh chuan a fapa a chan meuh chu awrawl chhuah meuhin a ṭap a. "Ka fapa, i kal mai ang maw? Kan la enkawl kham lo che a sin! I tello te chuan engtin nge kan awm ang le, ka fapa? Kan thlamuanpui che a sin. Engtin nge i unaute, i nu te hi ka hnem tak ang? A va han pawi vawng vawng tak em! I tawrh ai hi tawrh ka va duh em!" a ti vawng vawng mai a.

Khuang ri dup in, YMA nula tlangval in hla an sa dap mai a:

> _Kawl a ngui, tlaini a herliam a,_

> _Rial ang lo dai e, i run kaina,_

> _Zantlai bawhar mah hi siang a lawi thin;_

> _Han hawi ve ang che i run kaina,_

> _I sulhnu rial anga dai hnu hi._

>

> _I hlimthla te mai hi kan chan tawk,_

> _I anka biak leh mi chhang si lo,_

> _Ka thlir ang che awmkhawhar min hnema'n;_

> _Ka ngai che, bawihte, ka ngai em che,_

> _Min hnem an awm lo ve – nang lo chu._

A khat tawk a ṭap rawih rawih lah bo lo. Kei chu in kan thlen aṭang ka ṭap leh tawh lo a, ka ṭawng leh ta miah lo bawk.

Engemaw chen an zai hnu chuan kawl a êng ṭan det det a. U Arona chu tui taka muhil hi a ang a. A biangah ka chul leh ṭhin a. A beng bulah kun hnai in, "Khua a var dawn tawh a nia aw. Lo tho tawh la," ka ti sep a.

"Mamte, ti teh. Inbual harh la, chaw te ei ila, tlem tal han muhil thei la chu a ṭha. Lo kal rawh, kan in lamah. Mi dang paw'n chaw an rawn ei phei vek dawn," a rawn tih chuan ka pi chu ka en reng a. Engkim hi mumang mai a ni. Ka harh chhuak duh a ni, ka ti rilru neuh neuh a.

Ka ṭhiannu Mawii chu zankhua khan ka bulah a lo ṭhu ve reng a lo nia, ka lo hre miah lo!

"Mamte, hawh phei ang," tih leh ka bana min kaih a rual a.

"U Arona nghak ang. A la mutthilh hi! Ani pawh a ril a ṭam tawh ang, engmah a la ei loh hi," tih leh a biangah ka zuk chul a. "Haw, chaw ei a hun tawh a nia. Lo tho la," ka ti sep a.

Ka bula awm te chu an inhnit hlawp hlawp a. Nu Sangpuii chuan min rawn kuah a, a ṭap rawih rawih a. Ka mittui a luang ngiai ngiai a, aw rawl chhuah tur ka awm lo. Ka khawhmuh a vai tial tial a, ka taksa chu a khawng vek a. Ka thaw ṭha thei lo! Min hmet laih laih a, min au lawm lawm ka hre ruai ruai a... Engkim chu a thim ta vek mai.

Ka thawm hriat leh hmasak ber chu, "Ruang bul hnaiah ṭhu ve tawh lo se chu a ṭha. A zo tlat lo," tih a ni a. Pakhat chuan, "An vui zawh hma tal hian a hmel vawikhat tal hmu leh thei se. Chu ti lo chu a tan a hreawm lutuk dawn," a lo ti ve bawk a.

Ka harh hlawl a. Ka pi chuan, "Tei, Mamte," min lo ti sawk sawk a. Ka inphih harh a, bawnghnute no khat min in luih tir hram a. U Arona te in lam chu kan pan leh ta a.

A vuitu-in thu a lo sawi mek a. Kan lut phei zel a, min lo kian sat hlawm a. Ruang bulah chuan ṭhu leh in ka en tlawk tlawk a.

"Vuina hla chhungte lam aṭangin han thlang ula," a tih chuan Nu Sangpuii chuan, _"Pathian angchhung thianghlim ah chuan"_ tih hla kha a thlang a.

Kan za a ding in, "I lo sa ang," an tih pawh chuan ka ding ve duh lo. U Arona ruang dai riai mai chu ka chul ka chul a.

Vuina hun serh a zo ta. U Arona ruang chu an rawn en a, an rawn mangṭha sap sap a. A ṭhen an ṭap rawih rawih bawk. Kuang chhinna tur an rawn chawi phei ka hmuh rual chuan ka chiai hle a. U Arona beng bulah chuan kun hniam in:

"U Aron, harh teh! I kuang hi chhin a, lak bo che an tum a nia! Lei hnuaiah phum che an tum hi! Harh teh, a theih loh! Ka phal lo... An hruai bo che ka phal lo!" A tawp lam chu ka aw rawl tawp in ka au tawh.

Midangin min man bet a, kuang chu an chhin ta. Ka khawhmuh a thim vek a, engmah ka hre zui ta lo.

Ka mit ka meng dawn ṭhin a, mahse a sak tlat. Ka taksa tih chet ka tum a, ka thei lo. Rei ngial ka beih hnu chuan ka mit chu ka meng thei ta hram. A êng lutuk, ceiling rawng var ka hmuh chuan ka mit ka khap sak a. Ka hawi kual a, damdawi inah ka awm tih ka hre thei.

Ka nu chu bathroom aṭangin a lo chhuak chiah a.

"Awi Mamte! I lo harh a ni maw?" a lo ti chul a, nurse a ko nghal vat bawk.

Doctor leh nurse te chuan min rawn endik nghal zung zung a.

Doctor chuan, "Ka pi, a ṭha tawh khawp mai. Hei drip kan khai lai hi a taksa ti chak tu tur a nia. In chhuak thei har tawh lo ang," a lo ti zung zung a.

Ka lo muhil leh ni ngei tur a ni. Ka nu phone hmang thawm ah ka harh leh a. Ka pi a bia a ni ngei ang.

"Hei, lo ngaihtuah suh u. Kan lo chhuak thei thuai ang. Nichin mai khan a lo harh a... Aw... Aw, ni e. In lo kal dawn chuan ka kawrlum kha min rawn ken teh u. A vawt ṭan riau a, ka hak lai hi a bal tawh," a tih ri chu ka hria a.

"Nu..." ka ti sep a.

Ka nu chu a lo hawi vat a, "Hei, a muhil a lo harh leh chiah aww. Kan buaipui lawk ange, anih aw," tih leh phone dah a rual a. Ka bul a lo kal in, "Mamte, ei duh te i nei em? Na te i nei em?" a lo ti nghal var a.

"Nu, ka tui a hal lutuk," ka lo ti sep a.

Ka nu chuan tui chu min lo in tir vat a, ka harh hawk in ka hria.

"Nu, enge thil awmzia? Tinge damdawi inah hian ka awm a? Khawnge U Arona?" ka ti a.

Ka nu chu a thaw hak a. "Mamte, nikhawhrelo in i awm a. Kar 2 lai chu damdawi inah kan awm tawh alawm. Kan mangang lutuk asin," a lo tih chuan ka rilru a buai nuai nuai mai.

Kar 2 maw? Engtin nge a nih theih? Nichin mai kha ni in ka hria asin.

"Nu, khawnge U Arona?" ka ti leh a. Harsa tih hmel zet hian, "Kan vuiliam tawh alawm," a ti sap a.

Thil tak chuan min rawn deng dawt dawt a. Engkim chu ka ngaihtuah chhuak leh ta vek a. ICU kawngkhar bul a ka din lai te, alarm ri te, Dr. Mavena hmel te...

Ka mittui a luang ngiai ngiai a. Ka nu chuan, "Mamte, i theih chuan muhil leh la. I taksa a la chak lo lutuk ania. I dam ṭhat veleh thlan ah kan kal dawn nia," a lo ti dam dap a.

Ka chhing vang a, ka rilru chu a vak kual ruai a.

"Nu Mawipui, enge in lo an vawiin lam te?" ti tu vang chuan ka harh zawk a. A aw chu ka hriat hnu a ni.

"Hei, kan nula tawh viau ania. Doctor paw'n in chhuak thei vat ang a tih kha," ka nu in a lo ti siam siam a.

Chu pa chuan, "A va lawmawm ve. Lo ṭha zel rawh u. Hei, a ei theih takin," tih pah chuan eng emaw hi a pe a.

"Aw... I lo ti duh a nih kha. I va fel tak, i rawn ngaihtuah ṭhin a. A harh hunah ka lo ei tir dawn nia. Tui a ti ngawt ang," ka nu chuan a tih chuan ka meng diar a. Chu pa hmel ka hmuh chuan Jos a kha a ni. Enge hetah a rawn tih ve chu le? E, doctor zirlai a ni tak kha mawle.

Tlai ah chuan ka pi leh ka pu, Mawii leh kan ṭhian dang te chu an lo kal a. Kan ri nak hlawm a. Kei pawh chu ka harh ṭha tawh khawp mai.

Ka pu chuan, "Mamtei lo dam ṭha chho leh chu a lawmawm em mai. Khawnge, lawmthu sawi ṭawngṭaina kan hmang ange," a tih chuan kan ngawi ṭhap a. Ka pu chuan ṭawngṭaina a hman zawh chuan min haw san leh ta hlawm a.

Zankhat ka muhil thei lo chu damdawi in chung sang ah chuan ka chho a. Thlasik rim a nam ṭan a, boruak pawh a vawt ruih tawh. Ral hla tak a thla rawn chhuak mek pawh chu ka hmu a. Ka nun chu a ruak a, khawharna nasak tak chuan min tuam a. Ngaihtuah ber tur hre lo a ka din vang lai chuan, ka hnung lam aṭang hian, "Kha, zuang thlak i lo tum ngawt ange," a rawn ti zang vah a.

Ka hawi phei chuan Josa a kha a ni. Ka lam panin a rawn phei a, coffee no 2 a rawn chawi bawk. Ka bul a lo thlen chuan, "Kha," a rawn ti mawl tawp a. Ka lo la ve mai bawk a.

"Enge i lo tih ve?" ti a ka melh chuan, "Aw... Ka kal ziahna alawm. Ka lo kal ve chu i lawm vak na nge?" a tih chuan sawi mai tur ka hre leh ta lo. Ral hla tak lam chu ka thlir leh ta zawk a.

"Malsawmdawngkimi," a rawn tih leh chuan ka hawi vat a. Nelawm loh zet hian ka melh kal a.

A inthiam lo leh deuh nge ni. "A... ih... I hming hi a sei e," a rawn ti leh hram a.

"I lo buaina tur a awm lo," ka ti nghat a.

"Engtin nge an koh che kha?"

Ka ngawi vang a.

"Mal..."

"Mamtei," ka lo tih khalh vat a.

"I hmingpum a koh che chu i duh vak lo a ni maw?" a rawn tih leh chuan, "Duh lo," ka lo ti leh nghat a.

"Anih Mamte, in chhuah hunah chuan ka lo leng thei angem?" a ti thum dut a. A aw ah chuan inthlahrung te pawh a ang ve. A aw hi a lian phian a.

Ka ngawi reng a.

_In chung zawl ah chuan thli a thaw heuh heuh a. Khawpui êng uar karah pawh arsi a lang pe tuar a. Ka bula mi chuan van lam a thlir vang vang a._

_Josa:_ "Mamte, i hria em? Zan tin kan hmuh ṭhin arsi te hi tunah hian an eng tawh lo mai thei a ni." A mah chu ka melh ran a. Sawi zawm leh in, "A chhan chu maw, an êng kha zinkawng thui tak zawh in, kum sang tam tak a kal hnuah kan mit a rawn thleng ve chauh ṭhin. Arsi chu a liam tawh hnuah pawh a êng khan khawvel a la fan thei a ni.

Science zir chianna aṭang chuan, miin 'kan taksa hi stardust a siam kan ni' an ti ṭhin. A dik alawm. I taksa a thil awm, i thisen a iron te, i ruh a calcium te, i thawk a oxygen te hi arsi thi tawh puak darh aṭanga lo insiam chho vek an ni. Arsi an thih in an boral lo, an insiam danglam a, thil dangah an chang leh ṭhin."

"Ka va awi lo tak," ka ti sep a.

Sawi zawm zel in, "Arsi lian ber ber te phei chu an thih dawnah a puak nasa thei lutuk. _Supernova_ an ti. An puah darh nasat poh leh a êng mawi a, chu êng chuan arsi thar tam tak a hring chhuak leh ṭhin. Kehchhiatna aṭangin thil mawi a piang chhuak leh tihna a nih chu.

Arsi pakhat chauh hi a mah in a eng thei ngai lo bawk. A bul hnai a arsi dang te êng a in _reflect_ chhawk a, an in chhun êng tawn ṭhin. Pakhat a chauh in an awm ngai lo.

Awi awi awi a hriat pawlh ve nasa hle mai thla choh khi asin a mah a enna nei lo, ni êng ringa êng ve choh chu.

Mizo pi leh pu te khan arsi hi an lo thlir nasa ṭhin a. Arsi Sahuai te, Arpa te, Chawngzawng te an tih kha. Anmahni hnemtu leh kawng an bo loh nan hmanrua ah an hmang ṭhin. Zan thim berah pawh _Arsi Polaris_ kha chu a hmun a sawn ngai lo a. Lawng mite, ramvak mite khan hmar lam hriat nan an hmang ṭhin.

Ka nui chhuak hak a. Ka nuih lohna chin pawh ka hre talo. I daw ve ê... chu tiang arsi hming a awmlo. mizo airsi hming te chu Chawngmawii te Hrangchhuana te siruk te dingdi puantah te asin. In ti hre zet hian ka lo ti zat a.

A nui suk chu ka hmu hman.

Min en reng a. Enge ka lo ti hmuk a. I nui hmel hi ka vawikhat hmuh na. I nuih mawi teh lul nen i nui khat lutuk a, a ti sap a.

Thu dang sawi leh deih in. Ka pi khan arsi chan chin kha min hriln dik lo anih dawn hi a ti nuah nuah a. Alai ve deuh emaw ni.

Thu tak hmel deuh hian

Shooting star kan tih te hi arsi tak an ni lo a, van aṭanga lung tla lei boruak in a kan alh a ni zawk. Mahse a mawi em tho a, rei lo te chhung chu van a chhun êng ve ṭhin.

Awi ka awi tawh hlawm lo e a.

hrim hrim in. PATHIAN rin loh thlak e... Arsi kehchhia, Stardust aṭangin mihring siam tih vel... A awm ang lo lutuk, Pathian thu hre hle si, a sawi a mawi pawh a ni lo.

"Pathian i ring em?" ka ti thawr a.

"Ring dawn lawm ni?" a lo ti sam et a.

"Pathianin mihring te hi a siam a, khawvel pawh. Genesis-ah inziak vek," ka ti pawr hlar a.

Ka sam rawn tuai thur vak in, "I va han lawmawm reuh tak... A dik alawm. Ka thil sawi te kha chu nangmah tihhlim nan che Scientist-te sawi ka hriat dan ka hrilh ve mai mai che a nih kha. A ti sam leh et a. A la khi suk zui.

Awi.. hepa hian thu tak a pai thlawt lo,

"eng pawh chu nise. Ti teh, i chhuk ang. A vawt si, i damloh zual phah ang," tih leh min nawr kal dat chu a rual a.

A bulah hian thlamuanna riau ka nei. Ka rilru na te, ka ipik lutuk te kha, a thusawi hote te hian ka ngaihtuahna bing lutuk ata kha min la peng thei tlat a ni.

A tuk doctor ward-round chuan kan chhuah theih thu min hrilh a. Ka nu chuan ka putea call in, "Mama, hei kan chhuak thei dawn a nih hi. Min rawn hruai mai ta che," tiin a va bia a.

Ka putea pawh chu rei lo ah a lo lang a, kan lo insiam peih at tawh. In la chhuak in motor-ah kan inhlang fel a. Damdawi in chung zawl ka han hawi chho chu Jos bawk khan ban min lo vai lauh lauh mai. Motor-ah chuan lutin kan tlan chhuak ta vang a.

̶ ̶ ̶ ̶ ̶ ̶