Kalam Se Kamal Tak

1919 ki Chitthiyan

Calcutta 1919

Angrezi hukumat ke khilaaf awaazein tez ho rahi thi. Jallianwala Bagh ki goonj abhi bhi logon ke dilon me thi, aur Bengal ki galiyon me azaadi ka sapna saans le raha tha. Lekin usi daur me, jab har taraf sangharsh likha ja raha tha... ek kahani aisi bhi shuru hone wali thi, jo talwaron se nahi, chitthiyon se likhi jaani thi.

Ab bhi jaha khato aur telegram ke zariye logo se juda jaata tha, telephone ki taare bade zamindaron aur parivaron tak seemit thi. Aaj bhi ragon me saadgi, hawa me shuddhata thi.

'Kuch chitthiyan sirf shabd nahi intezaar bhi laati he....'

Us din Calcutta kuch zyada hi shaant tha. Saavan ki thandi hawaon ne dastak thi, halki halki baarish ki boondon me mitti ki khushboo man ko moh rahi thi, aur main isme kho kar khidki par khade prakriti ki sundarta me doob gayi thi. Tabhi ek awaaz ne mujhe mere khayalon se bahar nikaal kar haqeeqat me lauta diya....

Maa - Vasudha.....Vasudha.....

Vasudha - Aai Maa.

(Vasudha bhaagte hue aati he, usse zyada uski Bangali saadi lehra rahi thi, lambe ghunghraale baal hawaon se chehre par aakar uska khoobsurat chehra chhupa rahe the par badi badi surme wali aankhe nahi chhupa pa rahe the.)

Vasudha bhaagte hue rasoi me aakar Maa ke paas baith jaati he.

Maa use dekhti he aur halka sa muskura deti he.

Maa - Ye kya haal bana rakha he? Bikhre hue baal, saadi idhar ki udhar aur ye chehra bheega hua kyu he?

Vasudha - Saavan ki pehli baarish milne aayi thi Maa.

Maa - Tu ghar se bahar gayi thi?

Vasudha - Nahi Maa, me to khidki par khadi thi.

Maa - Vasudha aur koi dekh leta to? Ab tu 17 varsh ki ho gayi he, chhoti nahi rahi. Zara si baat ko log bada bana dete he aur tujhe to bohot dhyaan dena he. Teri shaadi to isi gaav ke Zamindar ke bete se tay hui he.

(Vasudha sar jhukaye apni Maa ki baate suni ja rahi thi.)

Maa - Vasudha tune kabhi aisa kuch nahi kara jisse mujhe ya tere Baba ko kabhi tujhse koi shikayat ho. Par beta ladki ki izzat kaanch ki tarah hoti he, uska zara sa tidakna bhi logo ko bardaash nahi. Mana teri shaadi bachpan me hi Bijoy Babu se tay kardi thi par zara se me rishte bigad jaate he aur tere Baba to Sarpanch he, ghar ke saath gaav bhi sambhalna he.

Vasudha - Maa aap nishchint raho me aage se aur dhyaan rakhungi.

Maa - Aur me jaanti hu meri Vasudha bohot samajhdaar he. Ab chal tere Baba aa gaye he. Me unhe paani dekar aati hu, tu garam luchiyan utaar de.

Vasudha - Ji Maa.

(Maa ke jaate Vasudha kaam me lag jaati he. Tabhi uski chhoti behen uske paas aati he.)

Vasudha - Are Mogra kaha thi tu?

Mogra - Wahi jaha tum thi, apne hone wale pati ke khayalon me.

(Vasudha turant Mogra ke muh par haath rakhti he.)

Vasudha - Pagal ladki, koi sun lega to kya sochega. Aur waise bhi main kisi ke khayalon me nahi thi, bas apne hi khayalon me thi.

Mogra - Hay meri sharmili didi, waise bhi aap kyu khayalon me jaogi jab aap unhe dekh sakti ho, mil sakti ho.

Vasudha - Chup, me kabhi unse nahi mili. Sirf dekha he.

Mogra - Ha kyuki wo isi gaav me jo he. Par mil bhi sakti ho.

Vasudha - Nahi, kisi ne dekh liya to kitni badnaami hogi. Aur aisa sochna bhi mat. Log kya kahenge? Aur waise bhi jald hi hamari shaadi bhi ho jaygi. Me aisa kuch nahi karna chahti jisse Baba ko bura lage.

Mogra - Didi...

Vasudha - Chup, meri madad karwa.

(Tabhi unhe bahar se kuch awaaze aati.)

Vasudha - Lagta he bahar koi aaya he.

(Ve dono baate hi kar rahi thi tabhi Vasudha ki saheli Champa bhaag kar unke paas aati he.)

Champa - Vasudha Vasudha... (Haafte hue)

Vasudha - Are saans to le le, kya hua?

Champa - Wo Murli Kaka ki beti Mamta jo ghar se bhaag gayi thi, suna he jiske saath bhaagi thi usne use chhod diya aur wo wapas gaav laut aayi he. Uske Maa Baba ne use bohot maara aur ab tere Baba ke paas laaye he ki Panchayat unka faisla kare.

Vasudha - Kya? Chal jaldi.

(Teeno bahar darwaze tak aate he tabhi Vasudha ki Maa unhe rok leti he.)

Maa - Kaha ja rahi ho tum teeno?

Mogra - Maa wo....wo...

Maa - Bas bas pata he. Par bahar bohot log he. Jo dekhna he upar wali khidki se dekho lekin parde ke peeche se. Aur ha dhyaan rakhna koi dekhe na tumhe.

Vasudha - Maa aap chahti he hum ye sab dekhe?

Maa - Ha, ye to har ladki ko dekhna chahiye aur sabak lena chahiye ki jo ladki apne mata pita, gaav ki izzat sambhal nahi paati uski kya dasha hoti he. Ab jao mujhe bhi jaana he.

(Teeno upar khidki par chale jaate he.)

Gaav ke sabhi log bohot gusse me the. Mamta bas roye ja rahi thi aur uske Mata Pita sharm se sir jhukaye khade the...

Gaav ke kai log poore parivaar ko nikaalna chah rahe the to kai Mamta ko paani me dubaane to kahi ped se baandh kar jalana chah rahe the...

(Gaav walon ki baate Vasudha, Champa aur Mogra ko dara rahe the.)

Sarpanch (Vasudha ke pita) - Hum maante he Mamta ne galat kiya, na keval hone parivaar balki gaav ka bhi naam dubaya he. Hum sabke maathe par kalank lagaya he jiski saza milni chahiye. Par isme Murli Kaka aur unke parivaar ka koi dosh nahi. Isliye Panchayat ye faisla leti he ki Mamta ye gaav aur parivaar chhod kar chale jaaye aur sabhi aas paas ke gaav me ye khabar kare ki is ladki ko koi sahaara na de. Ab iska jo bhi hoga iski niyati karegi.....

(Panchayat ka faisla sabko maanya hota he. Vasudha, Champa aur Mogra wapas rasoi me aa jaati he.)

Mogra - Lekin Mamta kaha jaygi? Akeli ladki...

Champa - Aisi ladkiyon ki apni wahi badnaam gali hoti he jaha hum sharif ladkiyon ko us gali ka naam lene ki bhi ijaazat nahi.

Mogra - Mamta ki ek galti ne uski puri zindagi barbaad kardi.

Vasudha - Par ye ladkiya aisa kar kaise leti he? Ab batao hone parivaar gaav ke bina kaise reh legi aur kaha? Aisa bhi kya pyaar ki apnon ko hi bhool jao. Durga Maa bachaye aise pyaar se. Achha he hamari shaadi pehle se hi tay he.

Mogra - Ha aur ab to vivaah jald hi ho bhi jaygi.

Champa - Lekin Vasudha ka vivaah to 2 varsh ke baad hoga.

Vasudha/Mogra (saath me) - 2 varsh baad?

Vasudha - Lekin Maa ne kaha bade Zamindar ne Baba ko bulaya he. Shayad vivaah ki baat karne.

Champa - Are meri padosan Zamindar ki bahuon ko alta lagane jaati he. Usne bataya hamari Vasudha ke hone wale pati matlab Bijoy Babu apni Ayurvedic ki padhai puri karne 2 saal ke liye kahi door shahar ke kisi Gurukul ja rahe he.

(Vasudha ye sunte hi soch me pad jaati he.)

Mogra - To wo vivaah karke bhi to ja sakte he.

Champa - Ha, par Bijoy Babu chahte he pehle wo padhai puri kare fir vivaah.

Vasudha - Ab isme hum kya kar sakte he? Jaisa hamare bade tay kare. Par Bijoy Babu ne faisla liya he to shayad vivaah 2 varsh baad hi hoga.

Champa - Isme tera kya kehna he Vasudha?

Vasudha - Me kya bolu?

Champa - Vasudha tujhe kuch karna hoga. Abhi tak aur Bijoy Babu ne ek doosre ko mele, kisi tyohar ya samaroh me dekha he. Par ab wo doosre shahar ja rahe he, wo bhi bina vivaah kiye. To tujhe kuch aisa karna hoga jisse tu 2 varsh tak hamesha unke dil aur dimaag me rahe.

Mogra - Ha didi socho, Bijoy Babu ko koi doosre gaav ki gori pasand aa gayi to? Ya fir videsh ki koi gori mem.

Champa - Ha aur mene suna he ye videshi mem ko Hindustani ladke pasand aate he. Aur hamare Bijoy Babu ye bhi to aise lamba kad, saaf rang, Zamindar ka ruaab...

Vasudha - To main kya karu....

Champa - Chitthiyan.

Vasudha - Chitthiyan?

Champa - Ha Chitthiyan. 'Vasudha ki Chitthiyan' jo unhe tumse jode rakhegi.

Vasudha - Ha... 'Vasudha ki Chitthiyan' Bijoy Babu ko Vasudha se jode rakhegi... Main likhungi unhe chitthiyan....

{"Mujhe kahan pata tha ki in chitthiyon ki shuruaat meri kahani nahi, meri taqdeer likhne ja rahi thi... aur inhi ke saath janm legi ek nayi Vasudha."}

Kalam Se Kamal Tak_02

1919 ki Chitthiyan

Calcutta 1919

1919 ke us daur me auraton ke liye kuch khaas niyam the, maryadaayein aaj bhi pardon me thi aur nirnay purushon ke adheen the.

Aaj Sarpanch Hemchandra Sen (Vasudha ke pita) apne gaav ke Zamindar Rai Bahadur Mukherjee ke ghar aaye the.

Sen Babu dekhte hain ghar ke aangan me ek mazdoor lamba hatta katta jawaan apne mitti se sane haath pair dho raha tha jiske kapde aur poore sharir me mitti lagi thi...

Sen Babu – Are are ye kya kar rahe ho, haveli ke bahar aangan ko ganda kar rahe ho. Peeche mori me jaakar haath pair dho. Zamindar Babu ne dekh liya to usi waqt naukri se nikal diye jaoge.

(Wo mazdoor kuch nahi kehta bas muskura deta hai. Tabhi wahan haveli ka ek naukar aata hai.)

Sen Babu – Are isme muskurane wali kya baat hai?

Naukar – Sen Babu ye koi mazdoor nahi balki chhote malik Bijoy Babu hain.

(Sen Babu ki aankhen khuli reh jaati hain. Wo upar se neeche Bijoy Babu ko dekhkar aashcharya chakit reh jaate hain.)

Bijoy paani se apna chehra saaf karte hain aur muskuraakar haath jodte hue kehte hain—

Bijoy – Pranaam Kaka.

Sen Babu – Bijoy Babu ye kya, kahin mitti me to nahi gir gaye the kya aap?

Bijoy – Nahi Kaka, hum to khet me kaam karke aa rahe hain.

Sen Babu – Aap gaav ke chhote malik, jinke kehne par naukar to kya gaav wale bhi kaam karne aa jaayen, wo khud khet me kaam kar rahe the? Bijoy Babu aap Zamindar hain, kisaan nahi.

Bijoy – Hum aaj Zamindar hue to kya hua, pehle to kisaan hi the. Aur bhala apni mitti me kaam karne me kaisi sharm? Aur hume to lagta hai Zamindar ko to khaaskar zameen se jude rehna padta hai. Hamari matrubhumi yahi hamari karmbhumi hai to is mitti se lagaav kyun nahi hoga?

Sen Babu – Bijoy Babu, aapki baatein, aapke aadarsh aur aapki ye saralta hi aapki visheshta hai. Hamari Vasudha ka saubhagya hai ki aap unke jeevansaathi honge.

Bijoy – Achha Kaka, aap andar chaliye. Hum kapde badal kar aate hain.

Sen Babu – Ji...

Haveli ke mukhya kaksh me Sen Babu, Zamindar Rai Bahadur aur unki patni baithe the. Tabhi wahan Bijoy aata hai...

(Lamba kad, angrezi suit, jame hue baal, haath me ghadi, chehre par shaant si muskaan.)

Bijoy – Aap sab itne khamosh kyun baithe hain?

Sen Babu – Bijoy Babu, hume Zamindar Babu ne bataya aap apni padhai ke liye doosre shahar ja rahe hain. Do din baad hum to ye soch kar aaye the ki yahan aapke aur Vasudha ke vivaah ka muhurat dekhne ke liye bulaya hoga par...

Bijoy – Kaka, kya aap nahi chahte ki aapki beti ke hone wale pati ka bhavishya ujjwal ho?

Zamindar – Zamindaron ka bhavishya zameen se hota hai aur Ishwar ka diya itna hai ki aap to kya aapki saat pushten baith kar kha sakti hain.

Bijoy – Baba, purkhon ka diya shauk poore karne ke liye hota hai, par zimmedaari poori karne ke liye mehnat karni padti hai. Aur Sen Kaka, Vasudha to hamari zindagi ka ab hissa ban chuki hai. Aur baat sirf 2 saal ki hai. Aur abhi hum maatr 19 varsh ke hain aur Vasudha 17 ki. Hum aapse vaada karte hain jis din hum laut kar aayenge usi din hum hamari aur Vasudha ke vivaah ka muhurat nikalwaayenge.

Sen Babu – Jaisa aapko theek lage. Par jaise ab tak humne gaav me kisi ko nahi bataya aapke aur Vasudha ke rishte ka, hum aapke lautne tak kisi ko nahi bataayenge.

Bijoy – Hum aapki ye baat maante hain Kaka.

(Sen Babu wahan namaskar karke wahan se chale jaate hain.)

Maa – Aap samjhe Bijoy? Sen Babu ke kehne ka matlab, wo kisi ko aapke aur Vasudha ke rishte ka nahi bataayenge. Matlab wo Vasudha ka vivaah kisi aur se bhi kar sakte hain.

Bijoy – Maa, ye rishta Vasudha ki bediyaan nahi hai. Aur agar hamari niyati me Vasudha hai to unhe humse koi alag nahi kar sakta...

(Bijoy itna kehkar wahan se chala jaata hai.)

'Jis din Bijoy doosre shahar jaane wala tha'

Champa Vasudha ka haath pakad use mandir ke peeche jungle me laati hai.

Vasudha – Champa, bolegi yahan kyun laayi hai? Maa ko pata chalega to bahut daant padegi.

Champa – Kuch nahi hoga. Tu bas shaant reh. Wo log bas aate honge.

Vasudha – Kaun log? Aur yahan jungle me?

Champa – Aaj Bijoy Babu shahar ja rahe hain. Unke jaane se pehle milna to hoga na.

Vasudha – Matlab?

Champa – Matlab maine Mogra ko Bijoy Babu ko yahan laane ko kaha hai.

Vasudha – Kya?

(Ye sunte hi Vasudha wahan se bhaagne lagti hai par Champa use rok leti hai.)

Champa – Are Bijoy Babu tujhse milne aa rahe hain, mujhse nahi. Kahan ja rahi hai?

Vasudha – Jaane de Champa. Maine kabhi unse baat nahi kari. Main kya bolungi? Main to jaanti bhi nahi theek se.

(Tabhi peeche se awaaz aati hai.)

Bijoy – To ab jaan lijiye.

(Vasudha jaise hi Bijoy ko dekhti hai wo uski taraf peeth karke khadi ho jaati hai. Ye dekh Champa aur Mogra unse thoda door jaakar khadi ho jaati hain.)

Bijoy – Lijiye, hum soch hi rahe the aapse jaane se pehle kaise mile, par jo hum nahi kar paaye wo aapne kar diya.

Vasudha – Humne nahi, wo to wo dono ne.

(Vasudha abhi bhi mudkar Bijoy ki taraf nahi dekhti.)

Vasudha – Hum chalte hain.

Bijoy – Rukiye. Hum aaj chale jaayenge aur 2 saal baad wapas aayenge. Kya aap humse kuch kehna nahi chahengi?

(Vasudha kuch nahi kehti.)

Bijoy – To chaliye hum hi keh dete hain. Hum intezaar karenge ki kab hum laute aur aapko hamari zindagi me shaamil karein. Lekin kya aap hamara intezaar karengi?

(Vasudha ab bhi khamosh thi.)

Bijoy – Hume lagta hai hume chalna chahiye.

(Bijoy jaane lagta hai.)

Vasudha – Suniye...

(Bijoy bina mude muskuraakar kehta hai.)

Bijoy – Kahiye...

Vasudha – Hamari zindagi ka faisla hamare bade lete hain, hum nahi. Par hum ek shart rakhna chahte hain. Aap maan lenge to hum aapke lautne tak aapka intezaar karenge.

Bijoy – Shart kahiye. Kaisi shart?

Vasudha – Shart se pehle ijaazat chahiye. Kya hum aapko chitthi likh sakte hain?

(Ye sunte hi Bijoy turant mudta hai aur waise hi Vasudha bhi mudkar wapas uski aur peeth kar leti hai.)

Bijoy – Bachpan se humne intezaar kiya ki aap kab hume chitthi likhenge. Ab jaakar aap maani hain. Aur hume to pata hi nahi tha aap padhna likhna jaanti hain.

Vasudha – Ji, hum vidyalay to nahi gaye par hamare Baba ne hume sikhaya hai.

Bijoy – Tab to hume intezaar rahega aapki chitthiyon ka.

Vasudha – To theek hai. Hum ye 2 saal aapko har mahine ek chitthi likhenge, mahine ki pehli tareekh ko. Aur us mahine ki aakhiri tareekh tak aapki chitthi ka intezaar karenge. Jis mahine aapki chitthi nahi aayi uske agle mahine hum kisi aur se vivaah karne ke liye haan kar denge.

Bijoy – Theek hai. Poori 24-24 chitthiyan hongi. Chahe aandhi aaye ya toofaan, hamari chitthi aap tak zaroor aayegi aur hum aapki chitthiyon ka intezaar karenge.

(Bijoy apni kalam nikaal kar Vasudha ki aur aage badha deta hai.)

Bijoy – Ye kalam hume hamare sabse khaas dost ne di thi. Lekin iski zarurat aapko hai. Ye apne paas rakhiyega aur isse hi chitthiyan likhiyega. Aur kalam aapko yaad dilaayegi ki aapko hume chitthiyan likhni hain.

(Vasudha wo kalam le leti hai.)

(Kuch der dono aise hi shaant khade rehte hain, maano man se ek doosre se vida le rahe hon.)

Kuch der me Bijoy chala jaata hai. Vasudha khamosh bas use jaate hue dekhti rehti hai. Jab tak Bijoy dikhta hai Vasudha dekhti rehti hai...

Bijoy apne parivaar aur gaav walon se milkar apna gaav Chandipur chhod kar doosre shahar Amaravati aa jaata hai. Apne Gurukul me aakar dekhta hai par wahan poora khaali milta hai. Tabhi wahan ka ek karmachaari uske paas aata hai.

Karmachaari – Babu, aap naye daakhile me hain?

Bijoy – Ji. Baaki sab kahan hain?

Karmachaari – Sab khaana khaakar sair par nikle hain. Abhi aa jaayenge. Laaiye aapka samaan andar rakh deta hoon.

Bijoy – Ye bataaiye Dada, yahan daak kitne waqt me aati hai? Gharwalon ki chitthiyan samay par milti hain?

Karmachaari – Babu, daak to rehne do. Ab 2 saal aap na kisi ko chitthi likh paoge na kisi ki chitthi le paoge.

Bijoy – Kyun?

Karmachaari – In Angrezon ko lagta hai aise Gurukul me hum yuva logon ko bhadkaate hain. Abhi kuch din pehle Bengal ke doosre ilaakon me kai Gurukul band karwa diye aur chhatron ko jail bhej diya. Isliye hamare Gurukul ne chhatron ki hifaazat ke liye door pahaadi par Gurukul ki kaksha banwaayi hai jiska kisi ko pata na chale. Isliye na koi chitthi na koi telegram. 2 saal bahar ki duniya se saare naate todne padenge...

(Ye sunte hi Bijoy soch me pad jaata hai.)

Bijoy – Phir 'Vasudha ki chitthiyan' kaise aayengi yahan aur main kaise likhunga unke jawaab...

(Anjaan the Bijoy aur Vasudha ki kaagaz ke pannon ki chitthiyan unka bhaagya likhne ja rahi thi.)

to be continue....

Kalam Se Kamal Tak_03

1919 ki Chitthiyan

Kuch chitthiyan sandesh nahi laati, apne saath yaadein, intezaar, dard bhi laati.... Jaha shabd likhe jaate he aksar zubaan khamosh ho jaati he....

(Vasudha ki chitthi ki shart aur Gurukul ke niyam ke bich fasa Bijoy ab kya karega)

Bijoy- Dada kuch to tarika hoga khat pahunchane ka kuch kariye dada mera chitthiyan mere gaon pahunchana bahot zaruri he, mera chitthiyan mere gaon pahunchana bahot zaruri he.

Karmchari- Hum kuch nahi kar sakte babu, ye niyam sabhi chhatron ki suraksha ke liye he.

(Karmchari samaan lekar chala jaata he. Bijoy bahar hi baith jaata he.)

Bijoy- Ab kya hoga... pehli baar Vasudha ne kuch maanga he aur hum use wo de bhi nahi sakte....

(Bijoy apni khayalon me tha tabhi use paas ek Sadhu Baba aate he.)

Sadhu Baba- Alakh Niranjan.

(Bijoy Baba ko upar se niche tak dekhta he. Badi badi jataaye aur daadi, bhagwa rang ke kapde, chehre par gussa.)

Bijoy- Ji kya chahiye aapko? Agar bhiksha chahiye to me abhi lekar aata he.

Sadhu Baba- Khamosh... naadan ladke, tu kya dega? Dene wala to wo he. Agar tujhe dena he to apne mukh mandal par aayi pareshani de de.

Bijoy- (Hairan hote hue) Mukh mandal?

Sadhu Baba- Arthaat tumhare chehre par aayi pareshani bachcha. Tumhe kis baat ki pareshani jab Ishwar ne tumhe ek anmol heera diya he. Wo tumhari saari pareshani dur kar dega.

Bijoy- Par Baba mere paas to aisa koi dost nahi.

Sadhu Baba- (Gusse me) Naadan balak jhooth bolte he. Tumhara ek hi dost he, sabse khaas bachpan ka dost. Murkh, uski dosti bhool gaye tum?

Bijoy- Nahi nahi Baba mujhe samajh aa gaya aap kiski baat kar rahe ho. Haan mera ek sabse khaas dost he par thoda pagal he. Jab dekho ajeeb harkate karta rehta he.

Sadhu Baba- Ajeeb harkate matlab?

Bijoy- Kabhi saanp se lad jayega, kabhi kue me kud jayega, kabhi akela mere hisse ka bhi khana kha jayega, kabhi apne hisse ki khushiyan bhi mujhe de de....

Sadhu Baba- Are heera he wo, swayam Ishwar ka diya vardaan he tumhe.

Bijoy- Par Baba kabhi kabhi heere ko aakar dene ke liye thoda peetna padta he.

Sadhu Baba- Peetna padta he matlab?

Bijoy- Abhi batata hu.

(Bijoy paas me padi ek chhadi utha leta he. Ye dekh Sadhu piche hatne lagta he.)

Bijoy- Kya kare, laato ke bhoot baato se nahi maante na.

(Bijoy chhadi se Sadhu ke piche bhaagne lagta he.)

Sadhu Baba- Are ye kya kar rahe ho?

Bijoy- Apne heere ko aakar de raha hu.

(Bijoy aur Sadhu dono bhaagte bhaagte thak jaate he.)

Sadhu Baba- (Haafte hue) Aakhir tumne mujhe pehchaan liya.

Bijoy- Tumhe to aankhe band karke bhi pehchaan lu.

(Bijoy Sadhu Baba ki daadi aur nakli baal khinchkar nikaal deta he.)

Sadhu Baba- Dheere bachcha, dard hota he.

(Bijoy muskuraate hue kehta he.)

Bijoy- Ab bas bhi karo mere heere... mere dost....... Kamal

(Dono hasne lagte he aur ek dusre ke gale lagte he.)

Bijoy- Sach jab jab tumse mila hu kuch gazab hi hua he. Ab ye Sadhu Jogi ka kya raaz he?

Kamal- Wo kya hena Babu Mushay, zindagi naam he mauj masti aur jaha Kamal he waha khushiya he.

Bijoy- Sach kaha, dil khush ho jaata he tumse milkar. Aur batao kaise ho?

Kamal- Wahi pehle ki tarah tanha magar tandurust, akela magar khush.

Bijoy- Tum aur tumhari baate... aur akele kyu? Abhi tak koi ladki pasand nahi aayi ya tumhe kisi ne pasand nahi kiya?

Kamal- Babu Mushay mana dikhne me hum bhi kuch kam nahi, kad bhi, rang roop bhi... lekin ek anaath ko kaun milegi.

Bijoy- Milegi zarur milegi. Mere heere ke liye Ishwar ne zarur koi nageena hi chuna hoga.

Kamal- Are hamari chhodiye aur apni batayiye. Apne vivaah kyu nahi kiya?

Bijoy- Tumhe kaise pata mene vivaah nahi kiya?

Kamal- Vivaah karte to mujhe bulaate na. Nahi bulaya matlab vivaah nahi kiya. Par kyu? Aapka vivaah to tay tha na aur aapko wo ladki pasand bhi he.

Bijoy- Ha dost, par yaha se jaane ke baad karunga. Parantu ek samasya aa gayi he.

Kamal- Kya? Boliye, Kamal ke hote hue Bijoy ko samasya?

Bijoy- Baat darasal ye he...

(Bijoy sab batata he Vasudha ki shart aur Gurukul ke niyam.)

Kamal- Isme itna kyu pareshan hona? Aap abhi hi unhe chitthi likhkar bata dijiye. Wo zarur samjhenge.

Bijoy- Nahi Kamal, me Vasudha ko khona nahi chahta aur me chahta hu Vasudha mujhe aur samjhe, jaane. Aur pehli baar Vasudha ne kuch maanga he, me use udaas nahi karna chahta.

Kamal- Par Bijoy Babu ye to mumkin hi nahi he. Gurukul dur jungle me he. Waha jaane ke baad aap kisi se na mil sakte he na khat likh sakte he.

(Bijoy soch me dub jaata he. Wo na Vasudha ko sach batakar udaas karna chahta tha na use khona chahta tha. Saath hi use dar tha ki kahi uske Baba uska vivaah kahi aur na kar de.)

Bijoy ko udaas dekh Kamal bolta he.

Kamal- Aap nishchint rahiye aur apni shiksha puri kariye. Me bahar rehkar dhyan rakhunga ki aapki Vasudha ka vivaah kisi aur se na ho.

(Bijoy hairani se Kamal ko dekhta he.)

Bijoy- Bahar rahunga matlab? Tum bhi to Gurukul aa rahe ho na?

Kamal- Me is varsh nahi. 2 saal baad jab naye dakhile honge tab jaunga.

Bijoy- Kyu? Is varsh dakhila kyu nahi?

(Tabhi Bijoy samajh jaata he.)

Bijoy- Achha matlab mera dakhila karwa diya aur fir jagah bhar gayi to khud piche hat gaye. Itna ehsaan kyu Kamal? Jab ek bharti ki jagah thi to apna naam daalte, mera nahi.

Kamal- Bijoy koi ehsaan nahi he. Aur me bahar rehkar shiksha lunga na. Bas Gurukul 2 saal baad jaunga. Wo tum lo ya me, kya antar he? Agar 2 bharti ki jagah hoti tabhi me tumhara naam pehle likhata, mera baad me.

Bijoy- Dhanyavaad Kamal.

Kamal- Dosti me pyaar hota he, ehsaan nahi. Aur ye apna dhanyavaad apne paas rakho. Aur mere hisse ka tum padh lena is varsh, jaise bachpan me tumhare hisse ka grihkaarya me pura karta tha aur mere hisse ki daant tum kha lete the waise hi.

Bijoy- Haan wo to he.

Kamal- Ab ye sab chhodo aur ye socho apni chitthi wali ka kya karoge.

Bijoy- Haan me to soch bhi nahi pa raha hu.

Kamal- To jo mene kaha wahi karo. Ek chitthi likho aur Vasudha ko sach bata do. Me khud jaakar de dunga.

(Bijoy Kamal ki baate sunkar soch me pad jaata he. Kuch der shaant rehne ke baad ekdam se use ek sujhav milta he.)

Bijoy- Mil gaya! Ek tarika he jisse Vasudha ki shart bhi puri hogi aur Gurukul ka niyam bhi nahi tootega.

Kamal- Lekin kaise? Dono saath me kaise?

Bijoy- Aise ki chitthi tum likhna Vasudha ko.

Kamal- Kya matlab? Me Vasudha ko chitthi likhkar bataun ki Gurukul se tum chitthi nahi likh sakte? Are ye to tum kar sakte ho. Abhi likho, me khud Chandipur jaakar ye chitthi Vasudha ke ghar dekar aaunga.

Bijoy- Nahi mere dost, tum samjhe nahi.

Kamal- Kya?

Bijoy- Jaise bachpan me karte the wahi karenge. Tumhare hisse ki padhai me karunga aur mere hisse ki chitthiyan tum likhoge.

Kamal- Matlab?

Bijoy- Tum Bijoy bankar Vasudha ki chitthiyon ka jawab doge.

Kamal- Dimaag sahi he tumhara? Chitthiyan tumhari, hone wali patni tumhari... unki chitthiyan me kaise padh sakta hu?

Bijoy- Kyu nahi? Tum aisa karke apne dost ka rishta bacha rahe ho. Aur jo bhi wo likhe uska jawab de dena.

Kamal- Par...

Bijoy- Apne dost ki ye vinati maan lo dost.

(Kamal kuch nahi keh paata he.)

Bijoy- To ye tay raha. Me Gurukul me rehkar niyamo ka paalan karunga aur tum bahar rahoge. Aur jab 'Vasudha ki Chitthiyan' aayengi tab tum unke jawab doge... Bijoy bankar.....

{Ek kalam se likhne ja rahi thi teen zindagiyon ki kahani, jaha ek or azaadi ke liye shor gunj raha tha wahi dusri or khamosh si mohobbat janm lene ja rahi thi.}

To be continue....