Pir-e-Kamil
Zindagi ki Khawahish
Imama Hashim
Meri zindagi ki sab say badi khawahish?
Ball point hontoo'n me dabaye wo soch me pad gai, phir aik lamba saans lete huay qadre be-basi say muskurai...
Imama Hashim
Bohat mushkil hai is sawaal ka jawab dena.
Javeria nay us say puchha.
Imama Hashim
Kyu'n k meri bohat saari khawahishaat hain, or har khawahish hi mere liye bohat ahem hai.
Us nay sar jhatakte huay kaha.
Wo dono auditorium kay aqbi hisse me diwar kay sath zameen par tek lagaye huay bethi thi'n. F.Sc. classes me aaj unka aathwa'n din tha or is waqt wo dono free period me auditorium kay aqbi hisse me aa kar beth gai thi'n.
Namkeen moong phali kay daano'n ko aik aik kar kay khate huay Javeria nay us say puchha.
Javeria
Tumhari zindagi ki sab say badi khawahish kya hai Imama?
Imama nay qadre herani say usay dekha or soch me pad gai.
Imama Hashim
Pehle tum btao, tumhari zindagi ki sab say badi khawahish kya hai?
Imama nay jawab dene ki bajaye ulta sawal kar diya.
Javeria
Pehle me nay puchha, tumhe pehle jawab dena chahiye.
Javeria nay gardan hilai.
Imama Hashim
Acha... Theek hai... Mujhe or sochne do.
Imama nay foran haar maante huay kaha.
Imama Hashim
Meri zindagi ki sab say badi khawahish? Aik khawahish to ye hai kay meri zindagi bohat lambi ho.
Imama Hashim
Bas 50, 60 saal ki zindagi mujhe bohat chhoti lagti hai... Kam se kam 100 saal to milne chahiye'n insaan ko dunya me... Or phir itna sab kucch karna chahti hu'n... Agar jaldi mar jau'n gi to phir meri zindagi ki saari khawahishaat adhuri reh jayein gi.
Us nay moong phali ka aik dana mu'n me daalte huay kaha.
Imama Hashim
Or ye k me is mulk ki sab say badi doctor banna chahti hu'n... Sab say achi eye specialist. Me chahti hu'n jab Pakistan me eye surgery ki tareekh likhi jaye to us me mera naam top of the list ho.
Us ne muskurate huay aasmaan ko dekha.
Javeria
Acha or agar kabhi tum doctor na ban saki to? Aakhir ye merit or qismat ki baat hai.
Imama Hashim
Aisa mumkin hi nahi hai. Me itni mehnat kar rahi hu'n k merit par har surat aau'n gi. Phir mere parents k paas itna paisa hai k me yaha kisi medical college me na ja saki to wo mujhe out of the country bhijwa de'n gay.
Javeria
Phir bhi agar kabhi aisa ho k tum doctor na ban sako to?
Imama Hashim
Ho hi nahi sakta. Ye meri zindagi ki sab say badi khawahish hai me is profession k liye sab kuch chhor sakti hu'n. Ye mera khawab hai or khawaboo'n ko bhala kaise chhora ya bhulaya ja sakta hai. Impossible.
Imama nay sar hilate huay hatheli par rakhe huay danoo'n me say aik daana mu'n me daala.
Agar Doctor na ban pai to?
Javeria
Zindagi me kuch bhi na mumkin nhi ho sakta... Kabhi bhi kuch bhi ho sakta hai, farz karo k tum doctor nhi ban pati to? Phir tum kya karo gi? Kaise react karo gi?
Imama ab soch me pad gai.
Imama Hashim
Pehle to me bohat rau gi, bohat hi ziada... Kai din... Or phir me mar jau gi.
Javeria
Or abhi kuch der pehle tum keh rahi thi k tum lambi zindagi chahti ho... Or abhi tum keh rahi ho k tum mar jao gi.
Imama Hashim
Haa'n to phir zinda reh kar kya karu gi? Saare plans hi mere medical k hawale se hain... Or ye chez zindagi say nikal gai to baaki rahe ga kya?
Javeria
Yaani tumhari aik badi khawahish dusri badi khawahish ko khatam karde gi?
Imama Hashim
Tum yehi samajh lo.
Javeria
To phir iska matlab to yehi hua k tumhari sab say badi khawahish doctor banna hai, lambi zindagi pana nhi.
Imama Hashim
Tum keh sakti ho...
Javeria
Acha agar tum doctor na ban saki to maro gi kaise? Khudkushi karo gi ya tabii maut?
Javeria ne badi dil chaspi say puchha.
Imama Hashim
Tabii maut hi maru gi... Khudkushi to kar hi nhi sakti.
Imama ne la-parwahi say kaha.
Javeria
Or agar tumhe tabii maut na aa saki to... Mera matlab jald na aai to phir tum doctor na banne k ba-wajood bhi lambi zindagi guzaro gi.
Imama Hashim
Nahi'n, mujhe pata hai k agar me doctor na bani to phir bohat jald mar jau gi. Mujhe itna dukh hoga k me to zinda reh hi nhi saku gi.
Javeria
Tum jis qadar khush mizaaj ho, me kabhi yaqeen nhi kar sakti k tum kabhi itna dukhi ho sakti ho k ro ro kar mar jao or wo bhi sirf is liye k tum doctor nhi ban saki.
Javeria ne is baar uska mazaak uraane wale andaaz me kaha.
Imama Hashim
Tum ab meri baat chhoro, apni baat kro, tumhari zindagi ki sab say badi khawahish kya hai?
Imama ne topic change karte huay kaha.
Imama Hashim
Kyu'n rehne du'n? Btao na...
Javeria
Tumhe bura lage ga?
Javeria ne hich-kachate huay kaha.
Imama ne gardan mod kar herani say usay dekha.
Imama Hashim
Mujhe kyu'n bura lage ga?
Imama Hashim
Aesi kya baat hai jo mujhe buri lage gi?
Javeria nay ahista say bola.
Imama Hashim
Aakhir tumhari zindagi ki sab say badi khawahish ka meri zindagi say kya taaluq hai k me us par bura manu'n?
Imama Hashim
Kahi tumhari ye khawahish to nhi k me doctor na banu'n?
Javeria
Nahi... Zindagi sirf aik doctor ban jane say kahi ziada ahmiyat ki hamil hoti hai.
Us ne kuch philosopher k andaaz me kaha.
Imama Hashim
Paheliya bhujwana chhor do or mujhe btao.
Imama Hashim
Me waada karti hu me bura nhi manu gi.
Imama ne apna hath us ki taraf barhate huay kaha.
Javeria
Waada karne kay ba-wajood bhi meri baat sunne par tum buri tarha naraz ho gi. Behtar hai hum kuch or baat kare'n.
Imama Hashim
Acha me andaza lagati hu. Tumhari is khawahish ka taaluq mere liye kisi ahem chez say hai... Right?
Imama nay kuch sochte huay kaha. Javeria ne sar hilaya.
Imama Hashim
Ab sawal ye peda hota hai k mere liye konsi chez itni ahem ho sakti hai kay me.
Wo baat karte karte ruk gai.
Imama Hashim
Magar jab tak me tumhari khawahish ki noiyat nhi jaan leti me kuch bhi andaza nhi kar sakti.
Btao Javeria... Please... Ab to mujhe bohat hi ziada curiosity ho rahi hai.
Javeria kuch der sochti rahi. Imama gor say uska chehra dekhti rahi. Kuch der ki khamoshi kay baad Javeria ne sar utha kar Imama ko dekha.
Moiz or uska Bhai
Imama Hashim
Mere profession kay ilava meri zindagi me filhaal jin cheezoo'n ki ahmiyat hai wo sirf aik hi hai or agar tum us kay hawale say kuch kehna chahti ho to kaho me bura nhi manu'n gi.
Imama nay sanjidagi say kaha.
Jevria nay chunk kar usay dekha, wo apne hathoo'n me mojud aik anguthi ko dekh rahi thi. Javeria muskurai.
Javeria
Meri zindagi ki sab say badi khawahish ye hai k tum...
Jevria nay apni khawahish batai. Imama ka chehra aik dam sufaid pad gya. Wo shocked thi ya herat zada... Jeveria ye andaza nhi kar saki. Magar uske chehre kay tasuraat ye zurur bata rahe thay k Javeria kay mu say nikalne wale jumle us kay har andaaz kay bar-aks thay.
Javeria
Me nay tum se kaha tha na k tum bura mano gi.
Javeria nay jaise safai pesh karne ki koshish ki magar Imama kuch kahe bgair usay dekhti rahi.
Moiz halq kay bal chillata hua dard say dohra ho gya, us kay dono hath apne pet pr thay. Us kay saamne khade 12 saala ladke nay apni phati hui t-shirt ki aasteen say apni naak say behta hua khoon saaf kiya or hath me pakde huay tennis racket ko aik baar phir puri quwwat say Moiz ki taang pr de mara. Moiz ki halq say aik baar phir cheekh nikli or wo is baar seedha ho gya. Kuch be-yaqeeni k aalam me usne khud say 2 saal chhote bhai ko dekha jo ab bagair kisi lehaaz or murawwat kay usay us racket say pit raha tha jo Moiz kuch der pehle usay peetne k liye le kar aaya tha.
Is hafte me in dono kay darmayan hone wala ye teesra jhagra tha or teeno baar jhagra shuru karne wala uska chhota bhai tha. Moiz or us kay taaluqaat hamesha hi na-khush-gawaar rahe thay. In ka jhagra bachpan say le kar ab say kuch der pehle tak sirf zubani kalami batoo'n or dhamkiyoo'n tak hi mehdud rehta tha, magar ab kuch arse say wo dono hatha-pai par bhi utar aaye thay.
Aaj bhi yehi hua tha. Wo dono school say aik sath aaye thay or gaadi say utarte huay uske chhote bhai nay badi darushti kay sath pichhe diggi say us waqt apna bag khinch kar nikala jab Moiz apna bag nikal raha tha. Bag khinchte huay Moiz kay hath ko buri tarha ragar aai. Moiz buri tarha tilmilaya.
Moiz
Tum andhe ho chuke ho?
Wo aaram say apna bag uthaye andar jaa raha tha. Moiz kay chillane par us ne palat kar usko dekha or lounge ka darwaza khol kar andar chala gya. Moiz kay tan badan me jaise aag lag gai, wo tez qadmoo'n say us kay pichhe chala aaya.
Moiz
Agar dobara tum nay aesi harkat ki to me tumhara hath tod du'n ga.
Us kay qareeb phunch kr Moiz aik baar phir dhara. Us ne bag kandhe say utaar kar nichhe rakh diya or dono hath kamar par rakh kar khada ho gya.
Chhota Bhai
Nikaloo'n ga... Tum kya karo gay? Itni himmat hai?
Moiz
Ye me tumhe us waqt batau'n ga jab dobara aesi harkat karo gay.
Moiz apne kamre ki taraf barha.
Magar us kay bhai ne puri quwwat kay sath uska bag khinchte huay usay rukne par majbur kar diya.
Chhota Bhai
Nahi'n tum mujhe abhi btao.
Us nay Moiz ka bag utha kar dur phenk diya. Moiz ka chehra surkh ho gya or usne zameen par para apne bhai ka bag utha kr dur uchhal diya. Aik lamhe ka bhi intezar kiye bgair uske bhai nay puri quwwat say Moiz ki taang par thokar maari. Jawab me Moiz nay puri quwwat say chhote bhai kay mu'n par mukka mara jo uske naak par laga. Agle hi lamhe uski naak say khoon tapakne laga. Itne shadeed hamle kay bawajood uski halq say awaz nhi nikli. Usne Moiz ki tie kinchte huay us ka gala dabane ki koshish ki. Moiz nay jawaban usko shirt kay collar say khincha or usay shirt kay phatne ki aawaz aai. Us nay puri quwwat say apne chhote bhai kay pet me mukka mara or uskay bhai k hath say uski tie nikal gai.
Download NovelToon APP on App Store and Google Play
