Bismillah hir Rahman nir Rahim

Qalb Jaan

By:Umm-e-Omama

Chapter:1

°°°°°

Thande mahaul mein ground mein bikharti sunahri dhoop us waqt bohat bhali lag rahi thi.

Door khari apne dono haath aapas mein baandhe woh chehre ke zawiye bigaarte us dhoop ko dekh rahi thi jahan us thande mahaul ke baais chand students dhoop mein baithe us se lutf andoz ho rahe the.

Aur woh bas idhar udhar dekhti chehre ke zawiye bigaarte ja rahi thi.

Kyun ke use phir class se nikaal diya gaya tha.

Woh Heer Basit thi jo poore hafte mein ek se do baar to lazmi class se nikaali jati thi.

Wajah bohat saari thin.

Parhai aur us ka door door tak koi waasta nahin tha. Agar woh yahan par aati thi to sirf Basit ki wajah se.

Kyun ke apni aulaad ko achi taleem dilana aur un ka mustaqbil sanwarna un ki awaleen khwahish thi.

Unhi ki koshishon aur talluqaat ke baais us ka is university mein admission ho saka tha.

Warna khud us ke paas itni qabiliyat nahin thi jis ke baais us ka Islamabad ki is bari university mein admission ho pata.

University mein us ka yeh pehla saal tha jo ab tak to nihayat hi bura guzra tha.

"Shhh Heer."

Halki si awaaz par us ne nigahon ka rukh mora aur thore fasle par use woh shakhs khara nazar aa gaya.

Black jeans ke saath white shirt pehne, saath hi black jacket zeb-e-tan kiye, bag ek kandhe par daale woh us ki janib dekh raha tha.

Fasle par hone ke bawajood bhi us ke bheenche lab woh aaram se dekh chuki thi aur dekhte hi jaan bhi gayi thi ke woh us ki haalat se lutf andoz ho raha tha.

"Kya hai?"

"Tumhein phir class se nikaal diya?"

"Nahin nahin Adam Mirza, main to intezar kar rahi thi kab tum yahan aao aur main tumhara phoolon se istiqbal karun."

Heer ke tape hue andaaz par is baar us ne khul kar qahqaha lagaya jisey dekhte hi us ke chehre ke taasuraat mazeed bigar gaye.

"Hanso mat Adam."

"Meri ab koi class nahin hai. Tum is sab se farigh ho jao to aa jana canteen mein, tumhara intezar karunga."

Ulte qadam uthata woh wahan se chala gaya aur us ke jaane ke baad Heer phir se usi kaam mein lag gayi jo woh Adam ke aane se pehle sar anjaam de rahi thi.

°°°°°

Bajte alarm ki awaaz par us ne haath barha kar side table par rakha apna mobile uthaya aur use band karke aankhein malta uth kar baith gaya.

Bharpoor tareeqe se angrai le kar woh bed se utht kar bathroom ki janib chala gaya.

Mamool ke mutabiq roz ki tarah shower le kar woh bath gown pehne bahar nikla.

Balon ko dryer ke zariye khushk karke us ne wardrobe se apni uniform nikali aur dressing room mein chala gaya.

Thori der mein mukammal tayyar ho kar us ne apna zaroori samaan uthaya aur kamre se bahar nikalta neeche ki taraf chala gaya.

°°°°°

"Assalam-o-Alaikum Bee Jaan."

Neeche aate hi us ne lounge mein baithi Bee Jaan ko salam kiya.

"Wa Alaikum Assalam mera bacha uth gaya."

Pashto lehje mein kehti woh us ke jhukne par us ke sar par apne lab rakhte hue kehne lagen.

"Khuda nazar-e-bad se bachaye bache ko, zara yahan baitho."

Use apne paas bitha kar unhon ne mulazima ko awaaz de kar us ka nashta banane ke liye kaha aur wapas us ki janib dekhne lagen.

"Kaam par ja rahe ho?"

"Ji, ek zaroori kaam hai. Pehle wahan jaunga, us ke baad university jana hai. Wahan kuch kaam hain, phir duty par jaunga."

"Zara batao woh zaroori kaam kaun sa hai?"

Un ki muskurati nigahon ko dekh kar Maarij chonk kar seedha hua.

"Bas kuch kaam hai Bee Jaan."

"Maarij Khan humein bewaqoof mat banao. Jo baat hai saaf saaf bata do. Tumhare bhai humein bata chuke hain tum kisi larki ke chakkar mein par chuke ho."

Un ke khafgi bhare andaaz par woh beikhtiyar hansa.

"Maarij bache, apne liye kuch sochna ghalat nahin hota. Zaroori thori hai tum zindagi doosron ka khayal rakhne mein hi guzar do. Kuch apne baare mein bhi to socho. Umar barhti ja rahi hai tumhari. Kab biyah karoge, kab bachay honge aur kab humein ghar mein bachon ki kilkariyan sunne ko milengi?"

"Jab aap jaan hi gayi hain to phir main kyun kuch chhupaunga? Main jab aakhri baar university gaya tha tab maine us larki ko dekha tha aur phir woh bas mujhe achi lagi."

Apni maa ke saamne woh yeh baat nahin keh sakta tha ke woh larki use sirf achi nahin lagi thi, balkeh woh to pehli hi nazar mein Maarij Khan ke dil par qabza jama chuki thi.

"MashaAllah, kaun hai woh? Kaisi bhi larki ho humein qabool hai, bas achhe khandan ki honi chahiye. Us ke baare mein kuch batao. Kab rishta le kar chalein?"

"Bee Jaan itni jaldi mat machayein. Jab rishta le kar jana hoga tab main khud aap ko bata dunga."

"Achha naam batao."

Un ke poochhne par Heer Basit ka chehra uske zehan ke pardon par chha gaya.

Sar jhuka kar woh dheema sa hansa aur lab hole se hile.

"Heer Basit."

°°°°°

Bag table par rakh kar woh Adam ke saamne wali kursi par baithi aur us ke saamne rakha burger utha kar khane lagi.

"Kyun nikaala tumhein class se?"

"Kal maine Netflix par ek nayi series dekhi aur phir sara din wohi dekhti rahi. Yahan tak ke sari raat bhi usi wajah se jagti rahi. Woh series thi hi itni maze ki, main use adhura chhor hi nahin payi."

"Heer, maine class se bahar nikaalne ki wajah poochhi hai."

"Wohi to bata rahi hoon. Series dekhne mein main itni magan rahi ke assignment banana yaad hi nahin raha."

Apni baat par woh khud hi hansi.

"Isliye tumhein class se bahar nikaala?"

"Poori baat to suno. Woh assignment banana kis chapter mein se tha mujhe to yeh bhi nahin maloom tha. Isliye mujhe daant bhi pari aur class se bhi bahar nikaal diya. Lekin ab in baaton ki mujhe aadat ho chuki hai."

"Ek baat kahun Heer, tum yahan aa kar sirf Uncle ke paise barbaad kar rahi ho."

"Adam, woh apne paise khud zaya kar rahe hain. Maine to unhein mana hi kiya tha."

Burger mukammal khatam karke woh haath jhaarti time dekhte hue apni jagah se uthi aur use Allah Hafiz kehti bahar chali gayi.

Us ki nazron se ojhal hone par us ki baatein yaad karte hue woh beikhtiyar hansa.

Adam umar aur class dono mein us se bara tha lekin phir bhi un ki dosti misaali thi jis mein aaj tak koi teesra shamil nahin hua tha.

Heer aur us ki dosti saalon purani thi.

Chand saal pehle tak woh dono ek doosre ke neighbours hua karte the. Jab dil karta aa kar ek doosre se mil lete.

Lekin phir Basit ke ghar change karne ke baad se un dono ka yeh milne wala silsila kaafi had tak kam ho gaya tha.

Lekin jab se Heer is university mein aayi thi jahan us ka last aur Heer ka pehla semester chal raha tha, tab se un ka yeh silsila phir se bahaal ho chuka tha.

Apne ghar mein woh akela rehta tha.

Us ke bachpan mein hi us ke walidain ki alaihdagi ho chuki thi.

Lekin is ke bawajood bhi use un dono ka hi pyar mila tha.

Us ke walid Canada mein rehte the jin se milne ke liye woh apni har vacation mein jata tha.

Woh sirf us ki zarooriyat poori nahin karte the balkeh us ke labon se nikli har khwahish ko poora karte the, lekin sirf tab jab woh un ke paas aata tha.

Woh baqaidgi se har mah na sirf us ke liye balkeh apni sabiqa biwi ke liye bhi kharcha bhejte the, lekin us ki maa ne us ke kharch ke liye kabhi woh paisa istemal nahin kiya tha jo us ka baap us ke liye bhejta tha.

Un ka kehna tha ke apne bete ki zimmedari woh utha sakti thin aur aisa sach bhi tha.

Mukhtalif jobs ke zariye woh apne bete ko duniya ki har woh aasayish deti thin jo de sakti thin.

Yehi aadat khud us ki bhi thi. Apne baap ki bheji gayi kamai woh istemal karne ke bajaye khairat kar deta tha kyun ke apna kharcha woh khud uthana jaanta tha.

Woh do jobs karta tha jin ke baais us ka kharcha aaram se chal jata tha.

Woh Pakistan mein apni walida ke saath rehta tha jin ka chand saal pehle inteqal ho gaya tha.

Un ke guzar jaane ke baad Azm use apne paas le aana chahte the lekin un ke hazaar baar kehne par bhi woh un ke paas nahin gaya.

Sirf ek wajah se aur woh wajah thi Heer Basit.

Jo us ki bachpan ki mohabbat thi.

Is baat ka us ne kabhi izhar nahin kiya tha.

Kyun ke woh pehle khud ko is qabil banana chahta tha ke fakhr se Basit ke saamne ja kar Heer ka haath maang sake.

Us ka apna baap ek kamyab businessman tha. Agar un ke nazariye se dekha jata to woh ek ameer shakhs tha kyun ke ek ameer shakhs ka beta tha.

Lekin yehi to baat thi. Apne baap par use fakhr tha lekin woh khud bhi aisa kuch karna chahta tha jis se us ke baap ko bhi us par fakhr ho aur woh jo kuch bhi karna chahta tha apne balbute par karna chahta tha.

Apne baap se kharch na lene ki ek wajah yeh thi ke agar yeh muft ki lat use lag gayi to shayad phir kabhi us se chutkara na mil sake.

Doosri, jab woh un ke paas nahin tha phir un par apne hisse ka bojh kyun daalta

Aur us ki yehi baat sun kar Azm hamesha hans deta.

Use Adam ki baatein kabhi buri nahin lagi thin balkeh apne bete par use hamesha fakhr raha tha.

°°°°°

Bag dono kandhon par latkaye woh chhote chhote qadam uthati ghar ki janib ja rahi thi.

Us ke ghar aur university se fasla faqat das minute ka tha, isliye woh paidal hi jati thi aur isi tarah wapas aati thi.

Roz ki tarah wohi manzar saamne pa kar us ke chalte qadam ruke jabke us ki safed peshani par lataadaad bal numayan hue.

Ghoorti nazron se us ne saamne nazar aate shakhs ko dekha jo police uniform zeb-e-tan kiye gaari ke bonnet par baitha hua tha.

Woh shakhs kaun tha yeh baat Heer nahin jaanti thi. Agar kuch jaanti thi to bas itna ke kaafi dino se woh us shakhs ko apne ghar ke bahar baitha dekh rahi thi.

Us ke wapsi ke time par woh apni gaari us ke ghar se thori door khari karke wahin par baitha rehta aur jaise hi woh apne ghar mein dakhil hoti waise hi woh bhi apni manzil ki janib rawana ho jata.

Itni bachi to woh thi nahin jo us shakhs ki harkaton ko samajh na paati. Kehne ko woh ek police officer tha lekin phir bhi Heer ko ek tharki insaan lagta tha.

"Agar yeh shakhs kal phir yahan nazar aaya to main ise chhorungi nahin."

Khud se barbarate hue woh tez tez qadam uthati apne ghar ki janib jaane lagi.

Jab us par nazar parte hi Maarij ke chehre par dilkash muskurahat ne basera kiya.

Use nazarandaz karte hue woh tez qadmon se chalti jaldi se ghar ke andar dakhil ho gayi.

Aur deedar-e-mehboob mayassar hote hi woh bhi apni gaari mein baith kar wahan se chala gaya.

°°°°°

Bismillah hir Rahman nir Rahim

Qalb Jaan

By:Umm-e-Omama

Chapter:2

°°°°°

"Kya chal raha hai?"

Bag sofa par phenkhti woh saamne baithi Yashal se poochhne lagi.

"School ka homework kar rahi hoon."

"Aaj koi nayi khabar mili?"

Uske poochhne par woh apna chalta qalam rok kar sochne lagi aur yaad aate hi copy band karti chehakte hue use batane lagi.

"Heer Api, aaj ki khabar to bohat zyada wali nayi hai."

"Kya hua?"

"Maine Papa ko baat karte hue suna."

"Yashal meri jaan, Papa to roz hi kisi se baat karte hain."

"Arey nahin, Papa kisi se phone par baat kar rahe the aur keh rahe the ke Heer ko parhai mein bilkul dilchaspi nahin hai. Agar aisa hi chalta raha to phir main uski kisi larke se shaadi karwa dunga."

Uski baat sunte hi woh jhatke se uthi.

"Sach mein? Khao qasam."

"Kis ki qasam?"

"Arey kisi ki bhi, balkeh apni hi kha lo."

"Meri qasam, sach bol rahi hoon."

"Ya mere Khudaya, tera lakh lakh shukar hai."

Dono haath dua ke andaaz mein uthaye woh apne Rab ka shukar ada karne lagi.

Uske liye to waqai yeh khabar bohat bari thi. Uski parhai se jaan chhoot jayegi aur us se zyada khushi ki aur kya baat ho sakti thi.

Yeh khabar sunne ke baad ab uski zindagi mein yaqeenan yeh farq aana tha ke jo mar mar kar woh thori bohat parhai kar liya karti thi, ab woh bhi nahin karni thi.

"Aap itni khush kyun ho rahi ho"

"Khushi ki hi to baat hai."

Yashal ki naak kheenchte hue usne sofa par para apna bag uthaya aur gungunate hue wahan se jaane lagi.

"Palki mein ho ke sawar chali re..."

"Main to apne sajan ke dwaar chali re..."

Heer ki gungunahat sun kar woh gehra saans leti phir se apne kaam mein masroof ho gayi.

Woh pandrah saal ki thi lekin phir bhi Basit ko woh unnis saala Heer se zyada samajhdar lagti thi.

°°°°°

Thande mahaul ki parwah kiye baghair woh shirtless stage par khara tha.

Jiske baais uska kasrati jism wazeh taur par numayan ho raha tha aur labon ke saath saath gehre rang ki raat jaisi siyah aankhein bhi muskara rahi thin.

University mein is waqt chhutti ka time ho raha tha isliye kuch students apne ghar ja rahe the to kuch idhar udhar khare the, jabke baqi afraad uske paas khare zor o shor se uska naam pukar rahe the.

University mein hone wale function ke baais aaj kal usi ki tayyariyan zor o shor se chal rahi thin, lekin is waqt jo shor usne macha rakha tha uski ijazat yahan nahin thi.

Par use rokta kaun?

Yeh university hi uske baap ki thi.

Is sab se agar use koi rokne wala shakhs tha to woh tha Maarij Khan.

Jo is waqt yahan par maujood nahin tha.

Guitar strap pehne use apne gird latkaye woh guitar strings par tez tez ungliyan pherta zor o shor se gaana gaane mein masroof tha aur stage se neeche khare afraad uska saath dene mein masroof the.

"Ishq mein dil bana hai, ishq mein dil fana hai ooo..."

"Mita de ya bana de, maine tujh ko chuna hai ooo..."

"Tere saare rang odh ke, dhang odh ke..."

"Tera hua main sab ko chhor ke ooo..."

"Ishq na karna naap tol ke, raaz khol ke..."

"Aaya hoon main sab ko bol ke ooo..."

"Oo main ta chaleya teri ore, tera chaleya..."

"Hai zor tera hoya main yaar ve, buleya ae sansaar ve..."

Woh larkiyon ka crush tha to larkon ka ideal.

University mein use hot boy ke naam se bulaya jata tha.

Larkiyon se uski hi hello door door tak hi rehti thi. Khud koi larki uske paas chahte hue bhi nahin jati thi.

Kyun ke un larkiyon se use sakht nafrat thi jo khud larkon ke qareeb aa kar aur apni adayein dikha kar unhein apne qaboo mein karti thin.

Bas wohi larki uske qareeb jati thi jo use theek se jaanti nahin thi aur phir uske baad bina koi lihaz kiye woh jo beizzati karta tha uska tamasha har koi dekhta tha.

Larkiyon ki izzat karna use bakhoobi aata tha lekin izzat bhi woh unhein deta tha jo uske laiq hote the.

Woh hansmukh tha, mazaq karta tha, chahe kitni hi classes chhor de grades uske hamesha achhe hi aate the aur uski inhi harkaton ke baais har koi uske jaisa banne ki khwahish rakhta tha.

Lekin koi uske jaisa nahin tha.

Kyun ke Ashhad Khan mukhtalif tha... har shakhs se mukhtalif.

°°°°°

Stage se utarte hi woh Junaid ke haath se apni shirt lekar pehnne laga.

"Ho gaya tera"

"Haan ho gaya, lekin tera munh kyun kharab hai?"

Uska bezar chehra dekhte hue woh poochhne laga.

"Mera munh kyun kharab hoga Munh to tera kharab hone wala hai."

"Kya matlab?"

Nasamjhi se use dekhte hue woh apna bag aur guitar uthata wahan se jaane laga.

"SP sahab aaye hain. Ho sakta hai isi bheed mein kharay ho kar tera gaana sun rahe hon."

"Kab aaye? Kahan hain? Tu mujhe ab bata raha hai?"

Ghusse se kehta hua woh bhaagte hue bahar ki taraf jaane laga jab bedhyani mein us taraf aate Maarij se uska takraao hua.

"Lala, kaise hain aap"

Use dekhte hue woh seedha hota jaldi se poochhne laga.

"Mera bacha thak gaya hoga na gaane gaa kar?"

"Nahin, main koi gaana nahin gaa raha tha. Aap chahein to Junaid se poochh lein."

Usne peeche kharay Junaid ki taraf ishara kiya.

"Haan Lala, yeh 'koi' gaana nahin gaa raha tha, yeh to 'Chaleya' gaana gaa raha tha."

Uske kehte hi Ashhad ne zor se thappad uske munh par maara, lekin uske baad bhi dheetai se hansta hua woh ulte qadam uthata wahan se chala gaya.

Aur Ashhad bas barbarate hue use gaaliyon se nawazta reh gaya.

Uska dost ek number ka kameena tha. Kabhi uski madad to nahin karta tha, albatta use phansane mein sabse pehla shakhs wohi hota tha.

"Mujhe Junaid se poochhne ki zaroorat nahin hai. Tumhari mirasiyon jaisi awaaz mere kaanon tak bhi aaram se pahunch rahi thi."

"Aisa to mat kahen, log fida hain meri awaaz par."

Maarij ki baat par woh khafgi bhare andaaz mein kehne laga.

"Yahan par tum gaane ke liye aate ho ya parhne ke liye Upar se jhoot bhi keh rahe ho."

"Aap khafa kyun ho rahe hain Itni bari baat nahin hai. Phir bhi aap kahenge to dobara aisa kuch nahin karunga."

"Yeh batao Doosra wala kahan hai"

Ashhad ki baat ko nazarandaz karta woh sawaliya nazron se uski janib dekhte hue poochhne laga.

Aur Maarij ki baat par is baar Ashhad Khan ke lab besakhta muskuraye.

°°°°°

Bismillah hir Rahman nir Rahim

Qalb e Jaan

By:Umm-e-Omama

Chapter:3

°°°°°

Back side par baitha woh apni gehri siyah aankhon se saamne baithi Ziniya ko dekh raha tha.

Larkiyon se woh zyada tar door hi rehta tha, lekin uska ek bhai date marta phir raha tha aur dusre pr larkiyan fida thi Socha kyun na woh bhi apne Liye Kuch kr leta.

Ziniya woh pehli larki thi jiske saamne dosti ka haath usne khud barhaya tha.

Unki dosti ko faqat teen din hi hue the aur yeh dosti kitne din rehni thi iska andaaza un dono mein se kisi ko nahin tha.

"Sta stargi deray khwage di."

"(Tumhari aankhein bohat pyari hain.)"

Gambheer lehje mein kehte hue usne hawa ke zor se apne maathe par bikharti latoon ko peeche ki taraf kiya.

Jise dekhte hue Ziniya ne wapas latein uske maathe par gira dein.

White high neck shirt ke saath blue jeans aur blue muffler gardan ke gird daale, maathe par bikharti latoon ke saath us waqt use Zarwan Khan is duniya ka sabse dilkash mard lag raha tha.

"Iska kya matlab hai?"

"Iska matlab hai tumhari aankhein bohat pyari hain. Nasheeli aankhein... insaan agar in mein doob jaye to use nashe ki talab hi mehsoos na ho."

"Aur tumhari awaaz bohat pyari hai. Insaan sune to bas sunta hi jaye."

Maarij ki awaaz par woh Ziniya ka haath chhorta jhatke se utha.

"Lala..."

"Haan bilkul."

"Kuch ghalat mat samajhiye ga. Main to bas ise Pashto sikha raha tha. Aap to jaante hain main larkiyon ko hamesha bahen ki nazar se dekhta hoon."

Uske kehne par Maarij ne ahishta se apna sar hilaya jaise Zarwan ki baat se usne ittefaq kiya ho.

Jabke uski baat sunte hi wahan baithi Ziniya apni jagah se uthti ghusse se use baatein sunati wahan se chali gayi.

"University ke back side par ek larki ke saath baithe tum uske haath mein haath daale use Pashto sikha rahe the?"

Maarij ki baat par usne jaldi se apna sar asbaat mein hilaya, lekin baat ka andaaza hote hi jaldi se apna sar nafi mein hilane laga.

"Nahin, woh haath to maine bas isliye pakra tha taake woh khud ko be-araam mehsoos na kare."

"Kya kehne hain tumhare Zarwan Khan hum to jaise bewaqoof hain."

Ashhad ki awaaz par woh ghoor kar use dekhne laga.

Yaqeenan yeh sab usi ki wajah se ho raha tha, warna Maarij ka kya kaam jo woh back side par aata.

Woh university sirf zaroorat ke tahat aata tha taake wahan kisi bhi cheez ki zaroorat ho to us zaroorat ko poora kar de.

"Ashhad Khan, apna munh sirf gaate waqt khola karo."

"Mera munh meri marzi, jab bhi kholun."

"Kameene! Achhe se jaanta hoon Lala ko yahan par tu laya hai."

"Achha hai na, dekh lein unka Zarwan kaisa hai."

Un dono ke jhagrne par wahan khara Maarij bas gehra saans lekar reh gaya.

Unke mizaaj ko kabhi koi samajh nahin paaya tha.

Ek lamhe mein hi dost ban jaate to agle pal hi ek doosre ko maarne se bhi gurez na karte.

"Bas karo tum dono. Yeh batao teesra wala kahan hai?"

Uske kehne par woh dono ek doosre ki janib dekhne lage.

Labon par shararti muskurahat bikhri.

Khud woh dono pakre gaye the to phir teesre ko kaise chhor dete.

Maarij ki taraf dekhte hue un dono ne aik Sath kaha...

"Date par gaya hai."

°°°°°

Kalai mein pehni ghari mein time dekhte hue woh mazeed intezar karne ke bajaye ghusse se uthne lagi jab peeche se kisi ne gulaab ka phool uske saamne kiya.

Apni muskurahat daba kar bazahir khafgi se usne phool thaam liya.

Jab ek aur phool uske saamne kiya gaya aur is baar usne apni khilti muskurahat nahin roki.

Uske doosra gulaab thaamte hi is baar phoolon ka guldasta uske saamne kiya gaya jise thaamti woh mur kar use dekhne lagi.

Black jeans ke saath white high neck shirt pehne, saath hi apna black sweater kandhon par daale aur uski dono aasteenein aage ki taraf kiye woh apni siyah aankhon se muskurate hue use dekh raha tha.

"Waise to main naraz thi lekin aap ki is harkat ne meri narazgi door kar di, Ramish Khan."

"Aur wajah poochh sakta hoon naraz hone ki, Roha Arsal"

"Shaam ho rahi hai Ramish. Meri university ka time khatam hue bhi aadha ghanta guzar chuka hai aur main ghar jaane ke bajaye yahan baithi aap ka intezar kar rahi hoon."

Ek hi saans mein woh apni poori baat kehti chali gayi.

"Sorry, woh main..."

"Yeh mat kahiye ga class mein masroof the. Achhe se jaanti hoon aap ki koi class nahin thi."

"Mere baare mein sab khabar rakhti ho tum."

Gaal par haath rakhta woh muskurate hue dilchaspi se kehne laga.

"Ji haan rakhti hoon. Waise bhi aap se bas ek saal hi peeche hoon isliye na bhi rakhna chahoon to khabar mujhe mil hi jaati hai."

Uske kehne par Ramish khul kar hansa.

Roha uski junior thi jo pehle uski dost bani aur phir guzarte waqt ke saath mohabbat banti chali gayi.

Un dono ki pehli mulaqat university ke function mein hui thi.

Ek hi university mein parhne ke bawajood is se pehle woh ek doosre ka naam tak nahin jaante the aur ab ek doosre ke ilawa kisi ko nahin jaante the.

"Waise hum yahan kyun mil rahe hain?"

"Kyun ke main tum se akele mein milna chahta tha. Mana ke university mein hamari mulaqat ho jaati hai par wahan mere sar par do guards hamesha khare rehte hain jis ke baais main tum se theek se baat tak nahin kar pata."

Uska ishara apne bhaiyon ki taraf tha jo jahan use aur Roha ko saath baitha dekh lete wahin aa dhamakte.

"Ab aap ki aur meri mulaqat hogi phir kabhi kyun ke woh waqt aap zaya kar chuke hain jo maine aap ko diya tha aur ab mera ghar jaane ka waqt ho raha hai. Allah Hafiz."

Table se uth kar woh apne bag ke saath table par rakhe phool uthate hue kehne lagi.

"Roha, baith jao na."

Uski becharagi soorat par Rooha ne hanste hue uske baal bigaare.

"Achha kal to mil sakte hain na?"

Jaati Rooha ki kalai thaam kar woh bachon jaise andaaz mein poochhne laga.

"Ramish..."

"Pakka poore time par aaunga. mujhe tum se baatein karni hain, tumhare saath waqt guzarna hai. Kal hum milenge aur main koi bahana nahin sun raha. Agar koi bahana banaya to main bhi bina tumhari parhai ka khayal kiye tumhare ghar rishta lekar aa jaaunga."

"Achha Baba aa jaaungi, abhi to jaane dein."

Gehra saans lete hue usne Roha ki nazuk kalai apni girift se azaad ki jis ke baad woh chhote chhote qadam uthati wahan se jaane lagi aur wahan baitha Ramish bas uski pusht dekhta reh gaya.

Mobile ki bajti ringtone par usne pocket se mobile nikala.

Jahan Junaid ka paigham aaya hua tha.

Uska message dekhte hi woh zubaan daanton mein dabata jaldi se uthta university ki taraf bhaag gaya.

°°°°°

Bag kandhe par daale woh library se bahar nikla jab nazar bahar khare un teenon afraad par gayi.

"Lala, aap yahan kab aaye?"

Uski awaaz par Maarij ke saath saath woh dono bhi chonk kar uski janib dekhne lage.

Maarij ka to pata nahin par un dono ki aankhein hairat se bahar zaroor nikal aayi thin.

"Yeh to library mein tha lekin tum dono kya keh rahe the"

Un dono ki janib dekhta woh jatane wale andaaz mein poochhne laga.

"Lala, yeh sach mein date par gaya tha. Pata nahin yahan tak kaise aa gaya par yeh gaya tha."

Ashhad ne use yaqeen dilane ki koshish ki.

"Itna shareef Ramish Khan hai nahin, yeh baat main jaanta hoon. Par qanoon to saboot maangta hai aur filhaal Ramish beqasoor nikla hai. Ghalti nazar aa rahi hai to woh jo tum dono ne ki hai. Lekin main is baar tum logon par koi ghussa nahin kar raha. Ghussa karne se kaunsa tum log baaz aa jaoge. Is baar main tumhein chhoti si saza dene wala hoon."

"Chalein khair hai. Aap ki saza shayad aap ke ghusse jitni khatarnaak nahin hogi."

Zarwan itminaan bhara saans leta hanste hue kehne laga.

"Tumhari saza yeh hai ke ghar ka khana ek mahine tak tum dono banao ge."

"Kyaaa!"

un dono ki cheekh nikli.

Jabke wahan khare Ramish ne lab daba kar apni hansi zabt ki.

"Aur ek mahine tak tumhein koi jeb kharch nahin milega."

"Kyaaa!"

Is baar unki cheekh pehle se zyada tez hui jise nazarandaz karta woh wahan se chala gaya.

Uske jaane ke baad woh dono ghusse se khaultay mutmain khare Ramish ke paas aaye.

"Yahan kya kar raha hai tu?"

"Haan, humein to keh kar gaya tha Roha se milne ja raha hoon."

"Woh main date par gaya tha, par Junaid mera bhi dost hai to usi ne mujhe Lala ke baare mein bata diya jis ke baad main bhaagta hua university wapas aa gaya. Waise bhi paas wale restaurant mein hi to gaya tha. Aur main baad mein zaroor tumhari kahani sununga kyun ke is waqt tum dono ke iraade mujhe theek nahin lag rahe."

Apni baat keh kar woh jald hi wahan se bhaag gaya aur uske bhaagte hi woh dono bhi uske peeche bhaag gaye.

Kehne ko woh teenon triplets the lekin qad aur aankhon ke rang ke ilawa un teenon mein koi cheez mushabihat nahin rakhti thi.

Woh teenon ek doosre ke dost, dushman, bhai, behen sab kuch the aur unhein mukammal karta tha Maarij Khan.

Jis ne baap ke guzar jaane ke baad apni har khwahish ko daba kar unhein ek baap ban kar paala aur unki har khwahish poori ki.

Daant, pyaar, khafgi, shikayat, laad...

Maarij ne unhein bilkul apne bachon ki tarah paala tha aur uske pyaar aur khuloos ki woh teenon dil se qadr karte the.

Maarij ne apni zindagi mein aaj tak kisi cheez ki koi khwahish nahin ki thi.

Uske dil ne pehli baar kisi ki khwahish ki thi...

Woh thi...

Heer Basit.

°°°°°