Chapter 4: Naye Rishte, Adhoore Raaz

Us raat Shrii apni ek dost ki birthday party me busy thi. Lights, music aur dosto ke beech hanste hue bhi uske dimaag ke ek kone me baar-baar vahi ek khayal aa raha tha—kya Vinu mera wait kar raha hoga? Par busy hone ke karan vo use message nahi kar payi. Dusri taraf, Vinu ne bhi samne se koi text nahi bheja. Shayad dono hi ek-dusre ki pehli pehal ka intezar kar rahe the.

Raat ke theek 12:00 baje jab Shrii ghar lauti, toh sabse pehle usne phone uthaya aur likha: "So gaye kya?"

Koi reply nahi aaya. Shrii fresh hone chali gayi, par jab vo vaapas aayi toh screen par Vinu ka ek chhota sa, rookha sa text tha: "Hn bolo."

Shrii ke dil me achanak kai sawal uthne lage. Kya Vinu ka mood kharab tha? Ya use kuch hua tha? Uska roz wala chehekta hua andaaz aaj gayab tha. Dono ke beech baatein shuru toh hui, par waqt rengte hue raat ke 1:00 baje tak pahunch gaya. Vinu kuch kehna chahta tha, par uske shabd uski jhijhak ke peeche chhupe the. Vo dar raha tha ki kahin uski baat Shrii ka dil na dukhade.

Aakhirkar, thodi himmat bator kar Vinu ne likha:

"Shrii, jaisa tum soch rahi ho, shayad main tumhare sath vaisa na reh pau. Main kisi se behad pyaar karta tha, par vo ab mujhse bichhad chuki hai. Main ab kisi aur ko us jagah nahi dekh sakta. Main sirf tumhe ek dost ya ek behen ki tarah dekhna chahta hoon... Mujhe nahi pata tum ispar kaise react karogi, par main tumse kuch chhupana nahi chahta tha."

Shrii screen ko dekhti reh gayi. Thodi der ke liye vo confuse hui, par jald hi usne apni befikri wali muskuraahat odh li. Usne reply kiya:

"Isme problem hi kya hai? Aapki girlfriend thi ya hai, isse mujhe kya? Main toh bas aapki dost banke rehna chahti hoon. Vaise bhi... ye pyaar-vyaar toh sab moh-maya hai! Isse jitna door raho, utna sukoon milta hai."

Vinu ne jab ye padha toh uske labon par ek dukh bhari muskaan aa gayi. Vo pyaar ke us meethe aur dardnak ehsaas ko jee chuka tha. Usne bade naram lehze me likha: "Tum ek baar kisi se sachha pyaar karke dekho Shrii, tab samajh aayega ki ye moh-maya nahi, zindagi hai."

Shrii ne hamesha ki tarah is baat ko mazaak me taal diya. Pyaar uske liye ek aisi peheli tha jise vo kabhi suljhana hi nahi chahti thi. Vo is befikri me khush thi ki chalo, achha hai vo is jhanjhat se door hai.

Par us raat, unki baatein gehri hoti chali gayi. Vinu ne apne tootne ki dastaan, apne beete kal ka har panna Shrii ke samne khol kar rakh diya. Lekin Shrii? Usne abhi tak apne baare me kuch nahi bataya tha. Yahan tak ki un dono ne ek-dusre ki tasveer tak nahi dekhi thi. Vinu ke liye Shrii abhi bhi ek adhoora khwab thi, jise usne kabhi dekha nahi tha, par jisse baat karna use roz milne jaisa sukoon deta tha.

Vinu ne dheere se pucha: "Main tumhe apne move-on karne ka zariya nahi banana chahta, Shrii. Kya tum meri behen banogi?"

Shrii ne turant mana kar diya: "Nahi, main behen nahi, bas aapki wahi purani dost banke rehna chahti hoon."

Raat ke 3:00 baj chuke the. Shrii ke liye ye pehli baar tha jab vo kisi ke liye itni raat tak jagi thi. Vo Vinu ko samjhati rahi, use dilaasa deti rahi: "Zindagi ek safar hai Vinu, log aayenge aur jayenge. Kisi ke jaane se khud ko rokna galat hai."

Shrii ke un dheere aur suljhe hue shabdon ne Vinu ke bikhre hue dil par marham ka kaam kiya. Kuch der ke liye vo apna saara dard bhool gaya. Us raat, Vinu ke dil me Shrii ke liye ek aisi gahri jagah ban gayi jo shayad dosti se thodi upar thi.

Lekin, kya ye dosti sach me itni hi saaf thi?

Vinu jiske liye apna sab kuch baant chuka tha, vo abhi bhi is baat se anjaan tha ki Shrii ne usse apni pehchan aur apna chehra kyun chhupa rakha tha. Kya ye sirf Shrii ka mazaak tha, ya fir vo kisi bade raaz ke parde ke peeche chhupi thi? Ek aisa raaz jo un dono ke rishte ko hamesha ke liye badalne wala tha...

***Download NovelToon to enjoy a better reading experience!***