Compass Chapter - 4

✨Compass🧭✨

Chapter - 4

End of Flash back

Ka phone ri ral ral chuan ka ngaihtuahna thuk tak aṭangin min pawt harh zawk a.

Ka biangah mittui a lo luang ngiai ngiai a. Ka nunhlui ka dawn kir chang hi chuan, hetiang hian ka awm leh ṭhin. Thawk la hak in ka hmai ka tuai puat a, call chu ka chhang nghal.

Me: "Hello."

Jos: "Mali."

Mi min koh loh dan ngat hian min ko duh tlat pek a.

Me: "Enge?"

Jos: "I rawn haw hun chu ka lo hmuak ang che aw."

Me: "Chiang sa. Min lo hmuak lo vaih teh, ka sa viau ang." Ka nui hak a.

Jos: "Yes boss. Ka nghakhlel tawh lutuk." A aw ah chuan phurna a lang.

Me: "Umm, chanchin kan inhrilh leh dawn nia aw."

Call chu kan titawp a.

Nie, Joshua hi ka nun a mi hlu tak, ka ṭhianṭha ber a ni ta.Hun harsa ka tawh lai zawng zawnga ka kianga ding tlat ani, hmalam pan tura min fuih a, min nawr kal tu a ni.

U Arona'n min kalsan a, ka putea leh ka pu an boral leh hnu phei kha chuan mumal nei lo in, beidawngin ka nung a. Damchhan tur nei tawh lo ang maiin ka inhre ṭhin.

Joshua chuan Pathian thu nen min fuih a, pen khat te te a kal dan min zirtir leh a. A lakah ka lungawi lo a, ka thinrim khum a, a rilru ka tihnat vawng vawng chang pawh a tam. Mahse dawh thei takin, ngawi rengin min tuar mai ṭhin.

Tunah chuan ka ṭhianṭha tak mai, ka unaupa ang chiah a ni ta. Pathianin ka natna damdawi atan a rawn tirh ah ka pawm thlap. Ka lei vantirhkoh a nih ber hi.

Ka room kik dat dat ri ah chuan ka hawi vat a.

Aw. . Ka lo kal tih leh kawngka lam pan ka rual a. Ka ṭhiannu khasi nula hmelṭha leh pian zei zet Lily-i chu alo ding vang tawh.

"Mamte chawei turin kan chhuk ve tawh dawn em ni?, " alo ti var a ."Yess ka hmai ka phih nga ka hman min lo nghak lawk aw, lo ṭhu la."

Kan in zui lut a. . Dawhkan'a ka dairy kara thlalak ka zeh chu a ban zat a. .

"Ka en thei angem" a tih chuan. "Umm" ka lo ti mai a. .

"Mamte hei hi tunge ava hmelṭha ve?" ti in a phul hlut a.

"Thawnthu sei tak runthlak bawk si ani." Ka ti sep a, amah pawh chu ka chhang ani hranlo, Keimah leh keimah ka in hrilh a ni mah zawk.

"Plasse mamte min hrilh ve rawh aw. . Chu story chu ka hre chak. . Ka hriat ve i phal chuan." a aw ah chuan hre chak takzet te pawh a ang e. "Lutuk Kal ang, ka ril a ṭam tawh. angeli leh Alex-a ten min nghak reng tawh ang," tih leh kawngka lam pan mai ka rual a.

Mess kan thlen thlak chuan a lo bengchheng lehpek hle tawh. Kan batch ho, Fashion Designing final year, chu kan kim ṭhap. Exam zawh lawm nan kan ri deuh laih laih hlawm.

kan in ei fel zo a, Hostel kan pan chhoh lamah chuan, balcony lam ka pan a, thli a lo thaw heuh heuh a. Shillong zan boruak chu a thiang nuam khawp mai.

Mizoram ka haw hun turte ngaihtuah in, ka phurna leh phur loh na hi a in zat thuak awm e.

ka nunhluia kir leh tur ang mai in ka awm, u arona ka pu leh ka putea te an awm ve tawh dawn silo.

Hun a kal ve zel a, ka haw ni tur pawh alo her chhuak ta. Kan ṭhiante nen chuan uitak chung in kan in thlah liam a. Lengpui kan ṭum ta, ka bungrua ka nawr chhuak a, pawn ah chuan joshua chu rose senduk bawr zet in alo pawm a. . . Welcom home Mali tih hi alo keng vâng bawk.

A hnung ah mawii leh zothana an lo tel ve bawk. Ka lam pan in mawii chu alo tlan vat a, min lo kuah chawt. Nia B. Des Fashion Design zir in kum 4 chhung ka awm bo a, vawikhat mah ka haw lo.

Zothana chuan awiii lalmamte iva han glow-up ve, i chhelo tawh si. Alo ti ve bawk a, ani hi chu nula ve chi kan tih tawh kha. Vun enkawl lam te hi a tui zawng a ni tlat a.

I van ti lawmawm. Nang pawh i glow tawp ka lo ti let ve bawk a. Joshua chuan awle kha ka pangpar lo ken ve te hi min han dawn sak ve phawt sela, kiang teh u, a rawn ti ve bawk a. Kan hlim a ni kan in hmu khawm leh chu.

Ka bungrua te min lak sak in motor ah an hlang zung zung a. Kan khaw lam pan in kan tlan chhuak ta. Mawii chu a ti ti lar lar reng a, chawei khawm mawlh a ni a rawt ni. Tun thla hi a birthday alo ni ker bawk nen lawm pui a tum khawp mai.

In kan thleng a ka chhungte chuan min lo lawm khawp a, ka naute pawh an lo nula ve uai tawh, kei ai an lo sang ve ve tawh a. Ka pi chu alo tar ve ta hle mai. Ka pi hmel ka hmuh rual chuan ka pan hnai vat a min lo kuah in a mittui a tla hial mai. Ka pi ka pu ka putea kan pa 4 a kan chen ho lai khan kan hlim in tu dang kan ngai bik lo ṭhin kha ania. in chhung lam ah kan in zui lut ta hlawm a.

Ka ṭhiante chu chawei ve tura kan tih ngial pawn an duh si lo a. min haw san ta hlawm a.

Chawte ei in kan ri nak nak a, ka nu mit ko duk raih chu, "nu i mitko kha enga tinge?" Tia ka zawh chuan an ngawi ṭhap a, "nu" ka tih nawn leh chuan engmah ani lo ka tlu a, a ti mai a.

Ava zialo ve i mit i sawh fuh loh chu a tih zia e. Ka lo ti ve mai bawk a, zan ah ka room balcony ah ka ṭhu a, thla êng thlir vang vang pah in meizial ka zu hlat hlat, kan in piah lawk a, u arona te in chu ka thlir leh ṭhin a, kan nunhlui te ngaih tuah a ka lo ṭhut veng veng lai chuan, ka room kawngka lam a ṭanga aw rawn thian kharh kharh ka hriat rual chuan ka hawi phei vat a.

Joshua chu nui sang hian alo ding a, "i lo kal a, lokal rawh he lam hi a dai nuam", ka lo ti var a.

Lo chhuak phei ve in, Joshua chu railing vuanin a ding vang vanga. Thla êng chu thlir in, a thaw chhuak leh hak ṭhin a. A sam a buk deuh a, a nuih zawnga a biangsum lang kalh ṭhinte mipa hmelṭha tak chu a ni. Ngawiteh! Kei hian Joshua hi mipa ang in ka en ve ta tih na em ni?

"In veng bawr boruak hi chu a vawt deuh tlat zel," a ti sap a. A aw chu a dam ruih a, damdawi in chung a arsi chanchin dik lo deuh deuh a, min hrilh chiam lai kha ka hre chhuak a, ka khi suk.

"Mahse kan veng lam boruak saw chu a dang daih. In veng lam ai chuan tlêm chuan lûmtak a ni," a lo tih leh chuan ka nui chhuak hak a. "Ṭawngkam te hi bei sial thei a nia!"

Ka meizial zu chu ka khuh kharh kharh a, ka zuk na a rei ve tawh nen ka la zu thiam thei lo.

Joshua chuan min rawn melh in, a mitmeng dum fiah kak chuan min en vang vang a. "I la zu ṭhin a," a rawn ti hluk a. "Um..." ka rilru ipik zual chang in, ka lo ti ve sap a.

"Mal, nangmah nghak tlat tu che mipakhat ka hria sin." Ka phu zawk! "Enge maw enge a awmzia? Tunge kei ni ang teh lul min nghak ang ni?" ka ti bah nak a, za lo tih hriat tak in ka nui deuh har har bawk.

A khi suk a. "Kum 4 nilo kum 7 chhung a ni hial tawh ang, ka nun ah hian i pawimawh ber reng asin. I hria em? Phone-ah te, message-ah te. I ṭah lai te, i nuih lai te. I bula awma hnem theih che ka chak ṭhin a sin," a ti a. A thusawi chu ti tak te pawh a ang.

"Joshua, i over leh ta! Ṭhianṭha kan nia, chutiang lam sawi lo teh." Nuih tlawn ti tih lai deuh bawk si chuan ka ti a. Mahse ka thinlung erawh chuan a pawmpui lo. Kei pawhin kum 4 chhung khan a message ka dawn loh ni chuan ka hnual a, kan in video call lai a ka ṭah khum chiam ṭhin lai te... a bul ah hi chuan ka nihna ang tak hian ka lang chhuak ṭhin.

A thaw hak a. "Awle, ṭhianṭha." A chawl dat a, "Nirawh se. Mahse ṭhianṭha ai a hnai deuh... unaupa ang pawh ni lo," a ngawi leh deih a. Railing a vuan nghet sauh, a kut ruh a pawng ṭawlh ṭawlh.

Chutah inthlah dul in, zangkhai deuh zawk in, "ka uang anih kha, sawi tur a vang em a," nui hawk hawk hian a rawn ti leh a.

"Awiii, Joshua Lalrindik mawla, min ti hamhaih hman lutuk a lawm!" ka ti hlaih hlaih a. Mahse ka rilru chu eng emaw ti tak hian a hnual ruih.

Kan ngawi dun ta ran a. Thli in ka sam a chem vanga ka hmai zar sek chu ka tuai thla leh ṭhin a. Ka naute ṭhian ho inhnuai varanda a, an in kawm nui hak hak chu kan hre pha. Tleirawl nuih duh hun lai tih tak ah an khek ring thei khawp mai.

Mahse kan pahnih boruak erawh a dik hlei thei tawh lo. Engemaw sawi duh nei, sawi ngam si lo hi kan ang a. "Va mu tawh rawh, Mali. I chau tawh ang. Kei pawh ka haw tawh teh ang," a ti dam thlup a. A ding hluai a, "Anih naktuk ah kan in hmu dawn nia," tih leh chhuah a rual a.

"Awle, ka lo chhuk ve kher lo mai ang aw," ka ti ve zat a.

A kal dawn chuan rawn hawi let leh in, "Mali, muhil har lo la, lo in ngaihtuah lungpuam lo la." a ti a. Chutah a inher vut a, step lam a pan ta a.

A pen thawm a hla tial tial a, kawngka inhawng ri khap leh inkhâr ri dawt ka hria. In chhung chu a reh leh ngawih ngawih.

Zan a rei tial tial a. Dar 1 a ri tawh. Ka la muhil thei lo. Ka rilru ah Joshua thusawi, a mitmeng, a awmdan zawng zawng a rawn lang zut zut a. "Ṭhianṭha ai a hnai deuh..." a tih mawlh chuan ka rilru a luah a.

Ka tho a, balcony ah bawk ka chhuak leh a. Thli vawt chuan min rawn chhem a, ka awm a nuam deuh. Inhnuai lam aṭangin thawm danglam deuh ka hre ta tlat. "Eng emaw ri leh deuh bur ṭhin chu."

Ka tho chhuak a, in hnuai lam ka pan a. Ka nu aw a ni. "Ti suh, U hruai, ka sawi tawh kha..." a ti ṭiau a.

Ka sa phat mai! Step ah chuan ka tlân thla dawt dawt a. Sitting room lam aṭangin thawm a rawn chhuak a. Ka pa hrawn chuan rui tih hriat zet hian ka nu kutah a lo vuan bet a. A mitmeng a sen ram a, a ha a ṭhial bap bap.

"Engnge i sawi kha?! Pawisa kha ka dil che a, min pe duh lo a maw?! Nang leh i fate, i nu pitar nen sawn ka thawh chhuahsa ring in nih hi!" a ti tuar tuar a. A kut chu a vai a, ka nu biang chu a ri sawk!

"Nang kha!" ka au chhuak ṭhawt a. Ka taksa pum chu thinrimna vang in a khur dawt dawt.

Ka nu chuan min hmu chu a lo ṭap chhuak a. "Mamte, chho leh rawh! Engmah a ni lo," a ti nghal chul a.

"Engmah a ni lo maw?!" ka tlan phei a, ka pa hrawn awm ah chuan ka nam sawk a. "I zak em? Kan in chhung ah hian buaina i siam ngam a, he in a awm tur hian vawikhat pawh ka pi nen hian kan ngen che em?!" ka rawl chu ring tawh tak a ni. Ka duh lohna ah hi chuan nasa ve tak ka nia.

"I nupui chu kut i thlak thei a ni mahna. Mahse ka nu, ka lei pathian hmuhtheih chhun hi kut i thlak ka rem ti hauh lo, hre rawh!" ti leh tuar in ka melh kalh mai a.

Ka pa hrawn chu lo nui hak in, "Nangnu hi i lo puitling ve ta hle mai. I nu in awka vin pawha min biak ngam loh lai in, min vin ve ṭhat ṭhat ngam tawh a. Tunge ka nih i hria em?" a thusawi tawp lam chu vin tak ani. , min rawn pan hnai a.

Ka hlau lo. "Hmeichhe chak tak ni tur hian hun hian min chher hriam tawk tawh. I nihna chu zu rui, nupui kut thlak ṭhin pa satliah mai i ni. Ka nu kut i thlak hi ka rem ti lo! I duh chuan min rawn khawih rawh," ka ti kha fak a, ka ding ngil zawt.

Ka nu chuan, "Mamte, a tawk tawh. A rui a nih hi, hrethiam rawh," a lo ti khur dar dar.

"Ka hrethiam lo bawk ang! Nu, kum engzat chhung nge i tuar tawh? Ka lo haw hnu pawh hian i la tuar reng dawn em ni?" ka ti a, mittui tla lo turin ka insum tlat.

Ka pa hrawn chu a rawn hnai leh a, a hmaiah ka beng sawk! Min hnek tuma a ban rawn vai chu lo in her in ka nam thal tawp a. Zurui nafam chu ka hneh ve khawp mai. "Chhuak rawh!" ka ti vin ṭhat a. A meng phawk hra a. "Nang hmeichhe naupang..." a rawn ti hlak a.

"Naupang ka ni tawh lo! Police ka koh hma hian chhuak rang rawh!" ka ti khauh fak a. Kawngka ka hawng a, pawn lam ka kawk a.

Rei fe rum zet a min melh hnu ah, "In la hria ang," ti a phun hluk in a chhuak ta vut a. Kawngka a khar ri bur.

Kei leh ka nu chu kan ding ngawi ran a. Ka nu chu ka pan hnai a, a kut chu ka hum vang vang a. A biang duk deuh raih chu ka chul sak a. "Nu, ka tihpalh. Engmah ka lo hre lo a, tinge min hrilh loh," ka ti sep sep a.

Ka nu chuan min kuah a, "Mamte, ka lawm e. Mahse i pa hrawn hi... sual tak a ni bik lo a nia. Zu a ruih chang hian a zia hi a dang ta êm ṭhin a," a la ti fan a.

"A tawk, sawi tawh suh! Mi ṭha a nih loh zia a lang reng," ka lo ti vin hluk a. Kan mamawh lo, a tello hian kan chhungkua hi ka enkawl ve thei, Pathian zar ah, ka ti rilru rauh rauh a. Ka pi leh ka naute pa 2 chu kil khat ah hlauh hmel zet hian an lo ding a. Pan hnai in, "Engkim a ṭha vek a nia, pi hlau thawng suh aw. Ka enkawl dawn cheu alawm. Zanin chu ka lo riak ang aw i bul ah. Bawihpui nangni pawh mu tawh rawh u le. Hawh le api, mu dawn ila," tiin a room lam ka pan pui nghal a.

A tuk zing chu ka tho hma hle a. Ka rilru ah thil tih tur a awm tlat. Ka inbual fai a, kawr dum simple deuh ka ha a. Ka pi hnen ah, "Pi, ka va chhuak lawk dawn a nia," ka ti a.

"Khawiah maw?" a lo ti hu a.

"Thlanah, Pi. Ka pu te, ka putea te... U Arona te thlan ka la tlawh miah lo a. Ka lo haw aṭangin," ka ti sep a.

Ka pi chuan min en vang vang a, "Awle, kal rawh. Kei lah in ka tlawh thei ta meuh si lo a," a ti dam diai a.

Mawii nen kan inbe lawk a, a lo buai deuh avangin keimah chauh in ka kal ta a. Scooty ka khalh chhuak a, kan khaw thlanmual lam panin ka tlan thla ta a.

Thlanmual chu a reh ruih a, khaw awm dan chu a nuam tawk phian. Ka pu thlan bulah chuan ka ding vang vang a. "Pu, ka lo haw tawh a nia. NIFT pawh ka zo tawh. I duh dan ang takin ka awm ve ta," ka ti sap a. Ka kutin a lungphun chu ka chul a.

A bul mai a ka putea thlan chu melh in, "Pute, ka hlawh tlinna hmel te hi min hmuh pui ve ula ka van ti êm! Min chhuang ve hian ka ring a ni," ka phun sep, ka mittui a rawn luang lum pap.

A tawp ber ah U Arona thlan chu ka pan a. A thlan lungah chuan "_ARON LALREMRUATA Kum-22_ ^ _16.11.1991 – 19.03.2016_" tih a inziak a. A hnuai ah chuan "Kan hmangaih che" tih leh pangpar a lo awm a.

"U Aron," ka ti sap a. "Ka lo haw tawh a nia. I sawi ṭhin kha, nakin ah chuan i natna hi a la dam ang i tih kha. Khuarei hian min hnem lo, ka ngaihdan che hi a la ngai reng asin! Mahse ka nui ve leh thei tawh a nia," ka ti a. Ka ṭhu thla a, a thlan chu ka chul ka chul a.

Ka mittui a luang ngiai ngiai a. "I awmna hmun chu a nuam viau a niang tiraw? I tel lo hian khawvel hi a ruak em mai," ka phun sep sep a.

Hnung lam aṭangin pen thawm ka hria a. Ka hawi phei chuan Joshua a lo ding reng a. A kutah pangpar bawr khat a keng a. A hmel a dam thlup a.

A rawn ṭhu thla ve a, U Arona thlan hma ah chuan pangpar chu a dah ve a. "Ka lo kal ve fo ṭhin," a ti sap a.

Ka melh he haw a. "I lo kal ṭhin maw?" ka ti a.

"Umm. Ṭumkhat chu damdawi in chung, nangmah nen pawh arsi chungchang sawi in kan ti ti chiam tawh na hmun ah khan, damlo pakhat lo ṭhu ka hmu a. A bul ah va ṭhu ve in a mah nen chuan kan ti ti a," a ngawi dat a, min rawn en in a sawi zawm leh a, "Hmeichhe pakhat hmangaih em em a neih thu a sawi a, chu hmeichhe chanchin chu tui tak in a sawi siam siam a. Kalsan a hreh zia te, a awm loh hun ah hlimtaka awm tura a duhsak zia te."

Mak ti zet in ka lo melh a. "Jos, ka hmangaih êm asin!" tiin ka ṭap chhuak hak a.

Joshua chuan thawk a la hawk. Van lam a hawi vang vang a. "Mali," a ti dam thlup a. "Khawvel ah hian natna tuar tam tak kan awm a. A nep emaw, a nasa emaw, mahni tawk ah chuan natna nâtak chu kan tuar vek a sin. Chuvangin ṭap tawh suh. Mitin mahni phurrit phur in, an tuar hram hram vek a nia. I natna vang chauh khan ding reng suh. Hmalam pan rawh. Arona pawh khan i tan chu chu a duh ber asin," a lo ti dam ruih a.

A thusawi chu U Arona'n Lungtohlawt a min hrilh ṭhin ang chiah a ni. "Ka liam a nih pawhin hlim takin awm rawh..."

Ka mittui ka hru a. "I sawi ang khan ka ti ve ang. Mahse a har lutuk, Joshua," ka ti a.

A nui suk a. "A harsa a ni tih ka hria. Mahse i mal lo. Kei ka awm alawm, ka hmuh loh lai a, i ṭah ka phallo a, hei vang hian ka lak ah zep i nei dawnlo tih min tiam rawh." a ti a. Ka kut a rawn vuan a. Ka kut a hum lum vang vang a, chu kut lumna chuan ka thinlung vawt tak chu ti lum pha ve hial in ka hria."um" ti sep in, rawmawl mim pek chuan ka mittui ka hru a,

Kar khat a liam a. Mawii birthday a lo thleng ta. Mawii chuan, "Mamte, ka birthday lawm nan chawei khawm ang u. kan in ah" a ti tlat a. Kei leh Joshua, Zothana, Kimkimi, Peka te kan kal kim ṭhap.

An kawt kan thleng chu in chhung lam ah chuan music a ri ang dup dup a, naupang ho an ri laih laih. Cake an rawn keng luh chuan kan ri deuh dual mai.

Chaw kan ei lai chuan kawngka aṭangin mipa sang tak, fit 6 dawn lai, ngo deuh sarh, sam met fai deuh vang mai, kawr var ha a rawn lut a. A hmel chu a chhelo takzet, model ang mai a ni! Zothana chuan, "Awii, tu nge saw saw? A chhelo lutuk!" a rawn ti sa sa a.

Kimkimi chuan, zothana chu "Zawngi ei mai mai teh!" a lo ti hluk, "an in hneh sawh dun thei sia."

Mawii chuan, " ka first cousin anih saw.... Mizoram ah a awm ngai mang lova, alo haw ve tawh anih saw, doctor a nia." Alo ti var a

Chaw kan ei kham hnu chuan a ṭhen an zai a, an lam bawk a, kan ri deuh laih laih mai. Ka ning deuh chu balcony lam ah chuan ka chhuak thawveng a, ka cigarette ah lai chu phawrh chhuak in ka ṭan a. Ka sir kil khat aṭang chuan, "I va in hmeh lo tak!" a lo ti hluk a!

Rang zet in ka hawi phei. "Khapa kan chawei lai a lo lut pa kha a ni."

Ka bul ah lo phei in a lo ding ve a. "Ṭhiannu, aaa... englo, engtin nge ka koh ang che?" a rawn ti a. "Mamte ti in min ko tlang pui," ṭha deuh chuan ka chhang ve mai. A kut rawn phar chhuak in, "Duhawma," tiin min chibai a. "A ṭawng duh phian a, ṭha deuh chuan kan titi ve mai bawk a. Fiamthu a thawh a kan nui leh hak ṭhin."

Kan sir aṭang chuan aw rawn thian kharh kharh ri kan hriat chuan kan hawi rual zawk a!

Joshua chuan mitmeng nelawm loh zet hian min lo melh ran a. "Kha, thilsual tilai phawk in va ang ve!" ngei awm zet hian a rawn meng pah ralh. Ka bula dingpa chuan, "Jos, thiktu hi pe chhe viau lo teh! I ṭhiannu hi ka lo kawm ve mai a nia," a lo ti nui suk a. Joshua lah chu a la thu tak run a.

"In in hria em ni?" tia ka zawh chuan Duhawma chuan, "Doctor kan zir ho ṭhin a lawm, ka ṭhianpa a nih hi!" a lo ti var a. "A nih chu, a sawi ngai miah lo che a. Joshua ṭhian chu ka ṭhian a ni mai," Mawii chu lo chhuak ve in, "Lo lut rawh u, cake kan zai dawn," tih leh ka bana min kaih a rual a.

Kan ṭhiante bul kan thlen chuan zothana chuan, "Mamte enge in sawi a, awi ka duh chi" a ti chul a. peka chuan, "Duhawma kha Aizawl a hmeichhe Doctor thiam lutuk tunlai a lar ber pawl alawm, sum a ngah reuh ngawt ang. Nula te star rawn a nih kha," a ti ve bawk a. "Joshua nen an lo zir ho reng alawm, saw an lo kal, sawi tawh lo ang," ka ti nghal zat a.

Joshua chu ka bul ah lo ding in min si chet in a ding a. Cake te chu zai in kan ei a, kan nui leh dar dar ṭhin. Mahse ka bul a Joshua ṭhu chu a ngawi ngul a. A thingpui no chu a khawih kual a, a mit a khap sak sak. A hmel a chang deuh tlat.

"Joshua, i ṭha em?" ka ti sep a.

"Aw ṭha e," a ti ringawt a. Mahse a aw chu a pangngai lo tih ka hria. "A thinrim a nih ka ring."

Duhawma chuan, "Ka kal mai ang," tih leh Joshua beng bula "a number chu aw" a ti sup chu ka hre pha. Joshua lah chu bek pawng ṭalh ṭalh in a lo in sehruh. "Joshua hmel danglam dan hi... engvang nge a lungawi loh? Ṭhianṭha an nih chuan ṭha deuha in biak ve tur a nia."

"Duhawma rawn inlan hian Joshua a tibuai tlat hi enge chhan? Duhawma chu mipa ṭha tak a ni in ka hria, tinge?" tiin ka in zawt neuh neuh a. Min thlah pawh chuan a ṭawng ta miah lo a. Kei pawh chu ka lawm chiah lo, "a awm dan hi a mak ka ti. Joshua ka hriat ṭhin kha a ang lo." Ka in her nghata ka lût zui hmak.

Mahse ka muhil thei tlat lo. "Joshua hmel chang deuh kha ka mitthla ah a lang a. Kei hian eng nge tih dik loh ka neih?"

Balcony ah bawk ka chhuak leh a. Meizial ka zu vang vang a. Shillong boruak vawt var ang lo takin Mizoram zan boruak hi chu a lum deuh a. Rilru buai tak a ka in ngaihtuah neuh neuh lai chuan, Joshua number ka hmet chhuak a, call ka duh. Mahse ka hmet tawp leh ṭhin. "Ṭhianṭha. Nirawh se," a tih kha ka la hre reng.

Ka phone a rawn vibrate a. Joshua hming a lo lang. "Ka la rang lutuk chu ka inthiam lo lek lek mai dawn alawm!"

"Hello?" ka ti sep a.

"Mu tawh em?" a rawn ti thum dut a. A aw chu a pangngai tawh deuh.

"La mu lo. Nang?" ka ti a.

"Um, ka muhil thei lo a," a ti a. A ngawi dat a. "Duhawma khan i number min dil a, ka pe dawn em ni?" a rawn ti zawi sap a.

Thawk la hluai in. "Ka hre lo. Vawi khat chauh ka la inhmu a," ka ti a.

"Awle," a ti ringawt a. A thaw ri ka hre thei. "Mali, ka... engpawh nise, i hlim chuan ka lawm," a tia. Mahse a aw ah chuan a lawm bik lo tih a chiang.

"Joshua," ka ti a. "Sawi tur ka hre lo."

"Aw?" a rawn ti a.

"Engmah a ni lo," ka ti leh ta ringawt a. Call chu kan titawp a. Phone chu ka mal chungah ka dah a, van lam ka hawi vang vang a.

Arsi a eng pe tuar a. U Arona'n, "Arsi te hi mawi hle mahse kan khawih phak an ni lo," a tih ṭhin kha ka hre chhuak a. "U Arona min kalsan hi chu ka pawm thiam tawh viau in ka hria. Tuna ka buaina hi chu kum 8 a liam hnu hian ka thinlung hi mipa dang tan a inpeih ta nge, Joshua hi ka duh ve ṭan tih hi phat rual a ni lo. Mahse ani chuan ṭhian ṭha, farnu ang chauh in min hmangaih si a."

Van lam hawi in, "Lalpa, eng nge ka tih ang? Ka thinlung hi ka hrethiam lo," ka ti vawng vawng a.

Room chhung lam aṭang chuan ka nu chuan, "Mamte, mu tawh rawh! I chau tawh ang, pawn ah awm reng suh, hritlang te i kai ang," a rawn tih chuan, "Um.... Nu ka mu ṭep" ka lo ti vat a, mahse ka la ṭhu reng.

Joshua khan ka number chu a lo pe ta ni ngei tur a ni. Number hriat loh hnen aṭang text ka dawng a.

"Hi mamte, keimah Duhawma aw. Lo save ve la," tih hi a lo awm a. "Awle," ti chauh in ka reply a. Mahse sawi tur a hre ngang mai. Tawi tek tawk taka ka chhang chung pawh in min be reng peih a. Chu ta ṭang chuan Duhawma nen chuan kan in be ta fo mai a. Kei pawh chuan ka nel ve ta khawp mai. Mipa fiamthu duh leh ṭawng duh tak, rilru chhe lem lo tak ni in ka hria.

Tuk khat chu kan chawei kham, ka pi a luak chiam mai a. Upa lam a ni ve tawh bawk nen a chauh phah riau mai. Damdawiin lam kan pan pui vat a, an lo admit nghal. Ka pi chu keiman ka awmpui a, a chau in a ṭawng ṭha peih meuh lo. Ka khawngaih reu em asin. Ka pi leh pu te kianga seilian ka ni a. Ka nu hnen ah ka awm ve ngai lo. Chungte vang pawh chu a niang, ka pi leh ka pu te kha ka tan chuan an hlu zual em em a. Tunah ka pi nen chauh kan ni tawh. Ka pi lah ti hi a dinhmun a ni si, ka thlaphang ve tak zet a ni.

Doctor Duhawma chu rawn lut hlawl in, "Mamte, Joshua khan damdawi in ah in lut tih a sawi a. Eng in nge in an?" a rawn ti var a.

"Hei, Pathian zar ah kan ṭha chho ve zel tur ah ngai ang. I fel reng e, min lo ngaihtuah a," tiin ka nuih sang a.

Damdawiin kan awm chhung chuan Duhawma chuan min buaipui nasa in min vil chawt a ni ber a. Joshua leh kan ṭhian dang te pawh in min lo tlawh awl lo a. Ka pi pawh a zia chho viau a, kan lawm khawp mai. Ka nu in, "Mamte, ka lo chhawk dawn che em ni? I chau tawh ang," a lo ti ve reng bawk a. "Nu, damdawiin aṭang kan chhuah hun chu, ka dawr tur buaipui chhoh ṭan ka duh tawh viau mai," ka tih chuan ka nu pawh chuan, "Nie, a ṭha khawp ang. Dawrkawna mi kan luah tir kha tih tawp an rilruk deuh bawk a. Chei ṭha nghal daih la, ṭha tak ang," a lo ti ve bawk a.

Zan khat mamawh lam in ka chhuak a, ka kir leh lamah chuan. Duhawma nen gate ah kan in tawk nawlh a.

"Khawnge i kal a? Hawh chho rual ila."

"Hei dawr ah ka kal lawk a," tih leh ka thil khai lai lek chhuah ka rual a.

Kan in zui lut hnak hnak a. Casualty room bul ah chuan hmeichhe pakhat leh Joshua lo ding dun ka hmu a. Min melh zawk in, chu nu chu kuah in an lut nghal daih mai. Ka hrilh hai lek lek. Enge maw a hriat a min hre lo ang maia an awm chule, ka lawm lo dawn mai.

"I ṭha em?" ka kalpui pa chuan min lo melh ha a. "Ka be mawlh mawlh che a, min chhang miah lo. Enge i lo ngaihtuah a?"

"Aa... Engmah a ni lo. Ka pi kha ka kalsan daih sia, a lo ṭha ang chu maw," ti chuan ka riat nawi ta vel mai mai a.

Kan room kan thlen chuan ka luhsan a, a hman hmawh deuh bawk nen a lo lut kawi ta lo. A tuk doctor ward round chuan kan chhuak thei tih min hrilh chu ka pi chu a phur khawp mai. Damdawi in awm chu a ning ve viau tawh a ni.

Taxi kan ko a, kan nghah chhung chuan. Duhawma bawk kha a lo lang leh. Awi, hepa hi a va han hman tak! Ka pi lah chuan, "Mamte, doctor sang deuh kha ka doctor bik a mi? Min vil chawt mai in ka hria," a lo tih chuan ka nui chhuak hak a. Duhawma pawh chu kan bul a lo thleng chawpchilh nghal mai.

"Kha, in va hlim ve! In chhuak tur chu, api i dam ṭha ver vawr tawh maw?" a tih chuan ka pi pawh chuan, "A... Hei ka dam tawh khawp a nia. Doctor ten min vil hneh bawk a," a lo tih chuan ka nui tet tet a, a sawi chhan ka hre miau a. "Hei taxi kan nghak mek a," ka lo ti ve zat a. Ka pi hian "keima doctor bik a mi i nih" a tih mai ka hlau a ni.

"Chungte chu min hrilh mai ta che! Ka thlah thei che u alawm, cancel leh mai rawh. Ka va dah zuai ang che u," a ti a. "Awi, a ngai lo! Kan tibuai lutuk che, kan haw thei alawm," ka lo ti sawk sawk. Kan sir ah Joshua pawh chu a rawn chhuak a. Ka pi chu rawn be luam in, "Api chu i va dam tawh ve kha, i chhuak thei tawh a ni maw," a rawn ti bawrh bawrh a. Kei chu awm ve lo ang mai in melh pawh min melh eih lo.

Taxi chu a lo thleng a, kan in hlang fel a, kan tlan chhuak nghal a. Joshua Lalrindika awm dan mai mai chuh! Enge maw a hriat ni, ti rilru rauh rauh chung chuan ka in sehruh ṭeuh mai.

Ni a liam a, hun a kal ve zel a, ka pi pawh a dam ṭha leh tawh khawp mai. Ka dawr tur lam te buaipui chho in ka buai ve hle a, ka ṭhiante ho pawh ka kawm hman meuh lo. Joshua lah chu a zia a dang khawp a, min hel ni tlat in ka hria. Min be ngai lo a. Hmeichhe pakhat casualty kawta a kuah nu nen khan ka hmu dun fo mai. Min hmu ve ngai lem lo a.

"A ṭha lawm, ngaihzawng te chu neise ka buaina tur a awm lo," tiin ka dawr tur lam ah ka buai ve bawk nen ka ngaihtuah zui duh lem lo. Mahse ka rilru khawi maw lai ah hi chuan na a awm.

Duhawma lah hi min tlawh awl lo a, ka dawr tur kan siam na ah pawh min pui nasa hle. Rem a lo hre khawp a, ruahmanna min siam pui zung zung a.

Zan khat Duhawma lo leng chuan min duh thu min hrilh a. Mipa ṭha tak a ni a, duh loh chhan tur awm in ka hre lo. Ka pi lah hian a ngaina khawp a, makpa a tan a awh thu a sawi fo bawk. Ka lo in ngaihtuah tur thu in ka chhang ve ta tawp kha a nia. Ka dawr pawh kan peih fel thawkhat ta. Bungrua te kan in rem fel a, a hawnna hun serh te nei in ka pi in ṭawngṭai na in min hlan sak a. Staff ka la nual bawk a, hna kan thawk ṭan mawp mawp mai. Ram dang ah kan thawn chhuak nasa bawk a, kan buai ve mawp mawp ṭhin khawp mai. Joshua chu kan dawr ah a rawn lang hlawl a. "I hlimna hi ka duh ber. I hlim a, i dam ṭhat chuan ka hlim a ni mai," a rawn ti ringawt a. Zawh zui hman loh in a kal leh daih mai a. Ka hamhaih ang reng khawp mai.

Nikhat chu Duhawma chuan chhuah pui ah min sawm a. Cafe changkang ve tak ah hian min hruai a. "Mamte, min chhang tawh la, ka nghak rei ve tawh bawk che alawm," a tih chuan chhan mai ngaihna hre lo zet chuan ka kut ka khal niap niap a. "Mipa ṭha tak ni in ka hria che a, duh loh chhan tur che pawh ka neilo. Kei ve tehlul min duh anih chuan, a ṭha alawm. Han in zui ve dawn chin ila," ka chhang ta nge. Joshua pawn a duh duh a kawp a, enge ka ngaih chan bik reng ang.

Kan in zui chho ve ta chu a nia. Ka rilru tak pek hi harsa ka ti a, a chang hi chuan hreawm ka ti ṭhin. Joshua lah chu a reh ta hmak mai. Ka nun hi ruak huai in ka hria a. Duhawma ka lo chang ta kha pawi tih chang ka nei fo mai.

Ani lah sawi sel na tur awm lo, mipa ṭha tak hi a ni tawp mai. Min hmangaih hneh viau ni te pawn ka hre ṭhin. Ka sum dawnna pawh ka tluan chho viau a, kan buai ve nak nak ṭhin khawp mai. Kan dawr chung hi kudam ah an hmang a, hei pawh hi zirlai lak a luah ka rilruk chho a, tih ngei pawh ka tum a ni.

***Download NovelToon to enjoy a better reading experience!***