*Compass * *Chapter - 5*

✨*Compass🧭*✨

*Chapter - 5*

Dawr lam ah kan buai khawp mai. Ramdang mi patner kan neih belh zel a, kan lun chho viau. Chu tia ka naute tih tur hrilh a ka buai viau lai chuan ka phone alo ri a. Ban vat in ka chhang nghal. "Mamte, zanin chu ka ṭhianpa birthday lawm na ah kan kal dawn kha aw. Ka lo lam dawn che nia." A rawn tih chuan, awii, la theihnghilh hmin der tawh asin! Ka lo in ring vak lo. "Awle, ṭha lawm, ka lo in ring dawn nia," call chu kan ti tawp zui mai a.

Zan ah chuan min lo sawm ta ngei a. Satin pawnfen-uk leh top-dum ka in bel a. Ka san vak loh vang hian heels lam ka bun tam bawk a. Ka heels dum sang over lo bawk chu ka bun chhuak leh a.

Kawt ah motor thawm ka hriat rual chuan ka bag chu ban vat in, ka mamawh tur ang ka thun sawk sawk a. In hnuai step ka chhuk chuan Duhawma chu alo awm vang tawh. Ka pi room ah lut kawi leh in, "Api, hei kan ṭhiante birthday lawmna lam ah kan va kal ve ange aw. Ka lo haw leh vat ang," tiin ka pi bul ah ka va in report leh zuai a. Ka pi room kawngka khar pah chuan, "Kal ila, nu, ka lo haw har lo ang aw. Bawihi te u, lehkha lo zir ru aw, ka lo haw ah ka endik leh ang," ka ti nghal zat a.

Kan in zui chhuak a. Duhawma phone chu a ri deuh reng a. Kan lo chhuak chiah tiin, call chu a ti top a. Car ah kan lut a, kan tlan chhuak nghal. A phone chu a rawn eng leh pap a. "judy: Tih hnen a ṭang, I lo thleng ṭep tawh em?" Tih hi ani. Rang zet hian a hmet thim a, a akhup deuh hmak a. "An ninawm tak tak, ka ṭhiante hi chu an phur lutuk hi an ninawm ve ṭhin ania," a ti mai a. Awiloh na em ka nei lem lo.

A hmun chu rei ngial kan tlan hnu chuan kan thleng ta. Khaw dai deuha awm ani a. In chhawng 2, lian vak lo, felfai zet hi ani. A neitu te chu an hausak viau ka ring. A piah deuh ah chuan in pakhat, lian vak lo hi a awm a, cheng an awm anih hmel. "Saw miin an luah ami?" Tiin ka kawk va a. "Aw, he mi huan enkawl tu te chhungkua hi an awm alawm," alo ti ve zat a. Anih ka ring a. A hmun hi a fai nuam in, swimming pool te pawh a awm a. Lichi plum kung te pawh a awm nual. A êng deuh uar bawk a, a nuam khawp mai.

In chhung lam chu an lo ri hut hut tawh. Ṭhenkhat chu pool ah an lo cheng bawk a. Music ring zet in an play bawk a. A hmun nuam viau mahse, tiang ri hut hut hi nuam ka ti em em lem lo.

Duhawma chu a ṭhian ten an hmuh chuan an rawn be bawrh bawrh a. Kei pawh chu min chibai nak nak hlawm. Duhawma chu a ṭhiante chuan an hruai hranga. "Mamte, ka va zui lawk ang. Hei Remkimi te ho nen hian lo inkawm ru, ka reilo ang," a ti zat a. Ka lawm chiah lo. Hmeichhe dang ho chu an lo fel khawp a, min lo be bawrh bawrh a. Mahse zu rim an nam deuh vek. Ṭhian ho chuan beer in ve zeuh zeuh mah ila, heng ho hmuh ah hi chuan ka duh teuh loh.

Rei ngial nula ho ṭhut na, pool sir ah chuan ka ṭhu ve a. Duhawma te kha chu in chhung lam ah an in zui lut ta kha ania. Ka ning ta deuh chu ka tei kual vel a. Huan enkawltu te in lam ah chuan ka phei zel a. Naupang pa 2 hi an lo in fiam, nui har mai. An kawt ka thlen chuan nu, la upa lo tak hian, "Nuam i ti em? Lo kal rawh, lo lut la," a lo ti var a. "A bengchheng in ti duh awm mang e," ka lo ti ve sap.

Ngai ah kan nei deuh tawh. "Rawn book tawk hi an awm ve renga," alo ti leh a. Nu ṭawng duh ve tak chu a nih dawn hi. Biak a nuam phian a. An kawt chu a rem phian mai. Naupang in fiam bul ah chuan plastic chair hi a lo awm rem chang bawk a, ka ṭhu ve ta ren rawn a.

Kan piah hla deuh, thingkung din thelh ṭhuau na aṭang chuan mipa ruangam lian ve tak leh nula sang ṭha ve tak tur hi an lo chhuak phei a. Ka hmu chiang thei lo. An awm na lai chu a thim deuh bawk nen. Duhawma ang ka ti deuh a, mahse "Nula tlangval in chance an nei anih dawn saw," tiin naupang pa 2 te chu ka chheih san ta zawk a.

Rei ngial ka awm hnu chuan ka phone sana kan en chu dar 9 a lo pel thui tawh ang reng. Cake zei tih vel te hi an tum lo nge, an mahni phur phur sawn an phusa ni mai in ka hria. Pool ah te chuan tlangval in nula ṭhen khat chu an pawm a, an zuan thlak pui leh bar ṭhin a. Ka rin dan ang ani hauh lo. Haw mai ka duh ani.

"Ka va phei ange. Haw te pawh ka duh deuh tawh," tih leh kal ka rual a. Naupangte nu khan, "Kawngka ṭang, awii, an la haw mai teuh loh. Zanlai pelh ṭhak thleng te a lawm an awm ṭhin," alo ti ve bawk a.

Ka va phei chuan an lo tam tawh lo deuh. Khawi khawi ah emaw an in terek hrang ni ngei tur ani. Duhawma chu ka zawng deuh ngial a, ka hmu mai lo. Ka call ṭhin a, a la thei bawk silo. A tira nula Duhawma'n Remkimi a tih nu kha ka hmu a. Ṭhiannu, "Duhawma hi i lo hmu em?" Tiin ka zawt a. A lo kai ṭha tawh khawp mai. "Duhawma lo hruai nula kha i ni maw? Huan aṭang khan alo let tawh em le? In chhunglam ah sawn va en teh, ka lo kalpui dawn che mi?" Alo ti zat a. Polite tawh tak ani. "Ai, angai hran lo, ka va en ange," tiin ka kalsan a.

In chhung ka va lut chu an lo lam suau suau mai. Nula pakhat leh Duhawma in hnaih zeta an lam dun chu ka hmu a. Ka lawm chiah lo. Mahse mipa ka hmangaih tak anih loh vang nge, thik em em na ka nei lem lo. Hmeiche dawi di de ka ni lem lo bawk a, ka duh na ah hi chuan ka zak vak lo. An lam na kar ah chuan ka va in zep lut a. Duhawma chu va vuan chawt in, "Min lo zui lawk teh," tiin ka pawt chhuak. Pawn kan thlen chuan, "Haw ka duh tawh a. I duh chuan la awm la, taxi ka ko mai ang," ka ti nghat a. Min care lo lutuk chu ka lungawi chiah lo ani. Tiang mizia hi a ni ang tih ngaihna ka hrelo. A ṭhian te bul ah chuan ze hran hlak alo nei anih hi.

"Aw, kan haw dawn nia. Ka phone leh chahbi vel ka va la ange. Lo awm rawh," ti in a kal leh vut a. Zu rim lah chu a nam ve chiang ani. Rui chhia chu ani lo. Rin ai ava rei leh phian a.

Ka sir mai aṭang chuan Joshua kha lo lang thut a. Ka hmu ve miah lo, a lo awm ve reng anih hi. "He lai hmun ah hian engvang in nge i lo kal ve?" A rawn ti vin deuh hluk a. "Duhawma nen kan lo kal a. A Ṭhianpa birthday lawm na ah. I lo buai ve na tur a awm lo," ka ti nghat a. Ka ngei ve reng. Bialnu neih vang mai a, a ṭhiante min hlat a min hel vel hi ka run tawk a tling.

Rilru hah hmel zet hian, "Mali," a rawn ti damruih a. "He tiang hmuna awm ve tur hi i ni lo. Haw ang, ka thlah ang che aw," a aw ah chuan min ngaihtuahna a ri tel. "Duhawma nen kan haw dawn, saw alo kal alawm," tiin Duhawma lam chu ka kawk a. "Sawpa saw ring lutuk suh aw. Mipa hian i rin kan ang lo thei viau ang," a ti leh sup a.

Duhawma chu a rawn thlen chawpchilh nghal mai vang chuan engmah kan sawi zui ta lo. "Kal ila," tih leh motor lam pan a rual a. Joshua lah chuan in seh ruh ṭeuh chung hian min melh ngawt ngawt a.

Kan haw ta chu kan ngawi dun ran a. Kan veng kan tlan luh lai chuan, "Mamte, nuam i ti lo viau em?" Alo ti sup a. "A nuam thawkhat viau lawmni," ngaihsam hmel zet hian ka lo ti a. A ngawi leh ta ran mai. Kan in kan thleng a, in mangṭha in ka luh san a.

Teh hrep hian! In kan thlen meuh chuan 11 alo ri tawh. Ka pi room chu a lo la en pap vang chuan ka lut a. "Api, i lo la muhil nange?" Ka tih chuan, "I lo haw har lutuk a. Ka muhil theilo a, ka lo la nghak che anih hi," alo tih chuan ka in thlahrung ang reng khawp mai. "Pi, muhil tawh la. A tlai tawh. Ka ṭha ania. Dam tak leh him tak in ka lo haw e. Ka han in thlak fel ange aw. Muttui le," tiin a biang ah ka fawp a. In chung step ah chuan thawm dim fahran chuan ka chho ṭhem ṭhem a.

Ka room ka luh rual chuan ka thaw huai mai. In silfai sawk sawk in ka mu nghal a.

A tuk dawr ka kal tur chu ka scooty nung thei tlat lo. Taxi chuan ka kal ta ngawt a. Dawr ka thleng chu ka naute ho chu an lo kim ṭhap tawh. Vawiin hian kan dawr chung chei ṭhat hna kan ṭan dawn a. A chei tu tur mistiri te pawh an lo thleng fel tawh. Enpui an ngai dawn bawk nen, ka buai khawp mai.

Chhun ah chuan Duhawma chu dawr ah alo kal a. A tih ṭhin dan reng hi ania. "Chhun thil i ei tawh em?" Alo tih rual chuan a lam ka hawi a. A biang ki lai chu alo vung deuh a, a kak deuh raih bawk. "Kha, engati nge?" Ka lo tih chuan, "Ṭhiante insual ka ṭhelh a lawm mawle," a ti mai a. "I haw tlang nghal nange?" Ka tih chuan a riat nawi ta vel mai mai.

Mipa ṭha tak ni khan ka hre sia. Thla eng emaw zat kan in zui ve tawh a. Nizana a zia ang te kha a nei tih ka hre ve chiah. Joshua thu sawi te kha ka beng ah a ri nawn leh ṭhin.

Tlai lam chu ka naute an haw vek hnu pawh chuan ka la buai khawp mai. Eng eng emaw ti fel tur ka ngah bawk nen. Ka in ti fel zoh chuan khua alo thim vek tawh hi alo nia.ka Inkhar fel mek lai chuan, ka pahrawn kha a rawn lang hlawl mai. Zu rim chu a nam vak lo a, mahse a ruih hmel tho mai. "Enge i rawn tih dawn? He tah eng mah tih tur i nei lo," ka lo ti hlak hlak a. Diktak chuan ka hlau ve deuh. Thingfak ni awm tak hi ala keng run zui bawk nen. Chu tah chet la thut in min pan hnai a. Ka lu ah min vuak a tum chu ka kut in ka lo in dang tleu deuh a. Ka ban chu a na nghal ngut ngut. Ka lu a vuak fuh na aṭang chuan thisen a lo hnam ṭiam ṭiam bawk a. Ka lu a hai muai muai a, chhuat ah chuan ka let thla tawp.

Kawngka aṭanga mipa aw in, "Mali! E he zawnga!" Tia a hnek ri chawrh chawrh chu ka hre ruai ruai. Engkim chu a chiang lo riai. Min pua a, min tlan pui hlawk hlawk ni in ka hria. "Mali, Mali, Malsawmdawngkim," tia min ko mawlh mawlh chu ka hre reiruai a. "Thi suh ang che! Engtin mah i awm tur anilo! Ka hmangaih che! I dam angai!" A ti mawlh mawlh ni in ka hria. Engmah ka hre zui ta lo.

Damdawi in khum ah ka harh chhuak a. Ka bul ah ka kut vuan in Joshua alo awm reng. Ka harh tih a hriat rual chuan min endik nghal zung zung a. "Lalpa, ka van lawm em," ati sup. "Engtin nge ka awm?" Ka ti sep a. "I ṭha, hlauthawng suh. Kha zawnga khan i lu ah a vua che a. Mahse a rui ve bawk nen, i kut in i lo in dang ve bawk si nen khan, a vuak na che khan pawi a khawih thui lo hloh a. Vanduai vannei ini," alo ti dam thlup a. "Engtia rei nge tah hian kan awm?" Ka ti leh a. "A la reilo. I lu kha a kak ve deuh a, i ban ruh pawh a vuak na vang khan a na rei ve deuh ang a. Hlauhthawn awm a awm lo," alo tih leh chuan ka chhing vang vang a. "Mali, zan ah vawikhat mah nangmah in kha tiang khan awm khawtlai tawh suh. Hmeichhia i nih hi hre ta che," a ti leh hluk hluk a. A aw ah chuan min demna a ri tel.

U Arona ka hre chhuak vang vang. Zan ah keimah a pawn chhuah a phal loh ṭhin zia te kha. Ka mittui chu ka bek ah a luang thla ngiai ngiai a. Mahse ka chhing tlat. "Mali, ka hau lo che ania. Ka ngaihtuah vang chauh che ania. Ṭap suh aw," a aw a inthiamloh na lang chhuak hian a rawn ti a. Ngawi teh ka hmangaih che min ti em kha?! Nilo a mangan em vang mai mai aniang, a nite chuan hmangaih a nei tawh alawm.

Rei ngial chu tia kan awm hnu chuan, kei mah pawh chu rinai tak chuan ka na lem lo a. Ka lu na fek fek leh ka ban tur deuh ut ut tih loh chu ka ṭha. "Ka thlah haw ang che. Admit ngai khawp in i awmlo a, a lawmawm," tiin min tung tho a. Kawrte ha ṭha in kal mai kan tum chu, Duhawma a rawn lang ve zat. Min ngaihtuah leh hlauthawng tih hriat zet hian min rawn pan a. "Ka ṭha ania, hlauhthawn awm a awmlo," ka lo ti sawk sawk. Joshua chuan, "Changtupa alo thleng tawh bawk a. Ka kal thei tawh ang tiraw?, ka ṭhian. Lo dam ṭha zel rawh aw," a ti zang vah a. "Bro, lo enkawl ṭha ang che," tiin a chhuak ta daih a. Ka ṭhian a tih mawlh chuan, sawi thiam si loh hian ka chhung ril ah min vit ngawt ngawt ni mai hian ka hria.

khang kum chhung zawng harsatna, lungngaihna te ka tawrh chang a pianga ka bula awma min hnem ṭhin tu kha, ka lo ngaina hle in a tello a awm hi harsa ka lo ti hle ani tih ka hre chhuak. Duhawma chuan inlam ah min hruai haw a. Ka chhungte chu an lo mangang khawp mai. "Ka ṭha ania, engmah ani lo," ka ti ve tlat a. Ka pa hrawn pawh Thana lam ah an lo dah lut fel tawh hi alo nia. Joshua chu hmelhriat angah bawk a, a che rang khawp mai.

Karkhat chhung ngawt chu, in ah ka awm tawh. Ka pi in hna thawh a phal tlat lo, min vil deuh chawt animai a. Nitin hian lehkhabu ka chhiar sak a, kan in awm nileng hi ani mai. Dawr lama ka naute an fel em a, ka kal theih loh chhung pawh in ṭha tak in dawr an lo enkawl thei a. Phone aṭang tihdan tur kan in hrilh awllo bawk.

Duhawma pawh in min rawn tlawh kur zut. Ka pi lah hian a ngaina khawp a, an in chheih nui leh ar ar ṭhin. Ka pi hi kum upa lam ani ve tawh a. Nu hrisel ṭha tak, kum ai mah a lang naupang ṭhin kha ania. Ka putea leh ka pu an boral aṭang khan a tar chak in a mah hi a hrisello chho ta êm mai a. A kum ai mah hian a tar tawh. A khua a har ṭhin a. Shillong ka awm lai te khan video call hian min be reng ṭhin. Ka khawngaih ṭhin ani. Ka theih tawk a duat a enkawl hi ka duh a, mahse a khawhar na hi ka hnem zo lo ni te hian ka hre ṭhin.

Kar 2 dawn in lama ka awm hnu chuan, ka dam ṭha tawh bawk a. Dawr lam pawh ka kal ve leh ṭan tawh a. In chung kan chei ṭhat pawh an lo zo fel tawh a. Zirlai 20 vel la in, kan buai chho ve leh ṭan tawh hle.

Nikhat chu dawr ah Joshua leh hmeichhe pakhat an lo lut ve hlawl mai. "Hei hi ka ṭhiannu Mali dawr anih hi. Designer bawn turu ania," a ti zat a. "E, kha lo leng ru ve teh mial che u Chuan, ka lo ti var a. "Hei kan nu hian kawr thar a duh a, a in hmeh tur kha lo en pui teh," alo tih leh chuan, "Faki, lo enpuila aw," ka ti nghal zat a. Duhawma pawh chu a rawn thleng ve nghal a. Chhun ah hi chuan thil ei dun hi kan tih ṭan anih vang in a rawn kal ziah rêng a. Joshua lah chuan, "Changtupa pawh alo thleng nghal alawm hei," alo ti var a. "Tluang, coffee no 4 min lo lak sak la. kan ṭhianpa induh alo len hi, tui tak khan han siam teh," ka ti zung zung a.

A nula rawn hruai pawh chuan kan kawr zawrh lai te a ha chhin vel a. A mah a chhelo bawk a, a in hmeh thei khawp mai. Kawr 5 lai min dawr nghe nghe. Tluangi chuan coffee chu a rawn chawi phei a. Dawhkan ah a nghah rual chuan, "Hawh u, in phawt ang u hmiang. I ṭhiannu saw ko la," ka ti zat a.

Duhawma chu a tim deuh hian ka hria. Joshua chu a melh ṭha ngam tlat lo, ni dang ai in a ṭawng tlem bawk a. Coffee te kan in zawh hnu chuan, Joshua te pawh rei awm tawh lo in an kal zui ve leh nghal a. Thil ei tur chuan kan dawr bul restaurant ah chuan kan kal a. Duhawma chuan, "Mamte, innei ve tawh mai te hi a ṭha lo maw?" A tih chuan ka thil hawp lai chu ka hak a, ka khuh bawrh bawrh. Ka hnung ah chum dat dat in, "Hmanhmawh lo khan ei rawh," alo ti ve sap a.

Ka khuh te a reh hnu chuan, "Pasal neih lam hi ka la ngaihtuah chhin ngai lo. Bak ah ka chhungte hi keimah a innghat an nia. Ka tello chuan an awm theilo ang. Ka enkawl an ngai," ka ti deuh duah a. Inneih lam sawi chuan kan inhnial deuh a. Mahse amah zawk chuan, "Tuna tut tut ka ti lo a. Lo ngaihtuah ve ṭan la, ka ti deuh mai ania," a ti ve leh a. "Kan ngaihtuah dawn nia. Ka let tawh ange. Zirlai ho class ka neih pui a hun leh tawh sia," tiin a mah pawh nghak lo chuan ka kalsan ta daih a.

Pasal neih maw? Ka la ngaihtuah chhin ngai lo. U Arona min kalsan aṭang khan mipa tumah hi ka pasal tur ang in ka la ngaihtuah chhin ngai lo.

Dawr ka thleng a, inchung ah ka chho nghal zat. Rilru buai tak chung chuan ka tlingtla ve mai bawk a. Tlai ah chuan ka in khalh haw a. Ka nu in tual alo phiat mek. "Nu, Bawihi te phiah tir tur a lawm. I hah thei em mai. Awmpui kan la mai dawn em ni?" Ka ti zat zat a. "Ka ti thei alawm. Eirel ka peih tawh sia, tih tur awm lo êm a. Lo nghah pah che in ka lo hawl mai mai. Hawh te, lut ang. Chawei ka peih tawh ania," alo ti nghal siam siam a. Ka nu hi chu a vanglai in chhungkaw blacksheep hi ani ve a. A upat hnu a alo kir leh hian inthlahrung reng reng hian a awm a, ka khawngaih ṭhin.

Zankhat chu ka room balcony ah ṭhu in sigarete ka zu vang vang a. Ka phone la kang in WhatsApp status te chu ka bih kual vel mai mai. Joshua status ka hmuh rual chuan ka tawp chawt. Ka chhiar a, ka chhiar nawn leh ṭhin.

```Chhun kawppui tura ruat zan hun pawh alo thleng leh ta, Siruk unaute pawh fiahlo riai in chhum karah inthlahrung takin alo lang leh a.```

```Thla êng hliah tu chhum iang a up beh ka tum thinlunga khat liam kâ a chhuaklo tura ka phuar beh, chhum kara thlâ lo lang leh zauh ṭhin anga ka sal beh zawh loh sawi tlang ngam silo hian ka duh tawk ange.```

Tih thu hi ani. Eng a sawi tumna nge ni ang? Enge a sawi tlang ngam loh chu? Atthlak zet in ka lo in ngaihbelh ve ngawt a. Zahthlak hian! Ka phone chu ka khup thak a. "Ngaihtuah suh, Mamte. A duh hleinem che. Bialnu a nei a, a duh hmel em kha," tiin ka in hrilh mawlh mawlh a. Mahse ka rilru ah a status kha a cham reng si.

Ka sigarete zuk lai chu fawp vang vang in. Ka thutna bul railing ka ngheng a. Thli thaw chuan ka sam a chhem heuh heuh a. Rilru buai tak chuan vanlam ka thlir leh ngawt ṭhin. Joshua status khan ka rilru a ti buai hle mai.

"Ka duh tawk ange," tih lai tak kha. Tu chungchang nge a sawi? A bialnu chungchang maw? Kei maw? Keimah vangin a buai ve ṭhin em? Atthlak lutuk, Mamte. I inngaihtuah sang lutuk. A ta a ni tawh, a nun ah hmun i chang ve tawh lo. Ka tiin ka in hrilh leh ngawt ṭhin.

Ka room lam ah ka lut a. Ka diary ka phawrh a. Pen ka la a, ka rilru buai nuai nuai chu, ka ziak chhuak mawlh mawlh.

Ka ziah zawh ah chuan diary chu ka khup a, ka thaw a veng huai in ka hria.

A tuk zing ah ka tho hma a. Ka inphihfai a, ka sam ka ka bawktawm tawp. Dawr lam ah ka kal hma in ka pi bul ah ka ṭhu a. "Api, vawiin nuam tak in lo hmang rawh aw" ka ti a. Ka pi chuan ka kut ah a vuan a nui sang hian. "Mamte, min ngaih tuah lo la, nuam tak in vawiin hmang ang che ," a ti a.

Dawr ka thlen chuan naute ho an lo hlim em em a. "Miss, Puan than ka chah design thar kha a rawn thleng a hei," an lo ti chel chul a. a lo thleng mawi hlawm tak bawk a kan ri hlut mai, kan han thlep a puan ban na ah te kan han in bang fel a.

Order te enfel in ka sem zung zung a, Mawii, Kimkimi leh Zothana te an lo lut ve hlawl mai. Mawii chuan, "Kan mihausa nu chu, kan la kawm phak meuh dawn em mawni," leila zet in a rawn ti a. Zothana lah chuan, "Awii... Lalmamte, dawr i neih hnu hian kawm i har zia hi i hria em," ti hlai hlai chung hian mi rawn melh ral a.

Ka buai ve ta em a. Bak ah chhungkaw innghahna nih tawh hi chuan, ṭhiante nena han awm dual pawh kan hman ta meuh lo chu ani e.

"Lo kal ru, in va fel ve. Tunlai min rawn tlawh khat zia hi. Thingpui nge coffee in duh?" ka lo ti var a. Ṭhut hmun te rem in, kan ti ho nak a. Chaw ei khawm bawk anih hi an sawi rawtui leh tak. Kimkimi chuan, "Picnic ang u, tun weekend chu. Kan awm kim lai tak ania. Kar leh lam ah chuan Mawii nen Aizawl lam ah kan chhoh a ngai leh dawn sia," alo ti ve bawk a. Kan phur tlang leh tawh khawp mai. "Nih chuan ka naute ho hi tel vek sela, dawr picnic ani pah ang a," ka tih chuan kan rem ti tlang khawp mai. "Joshua leh a bialnu pawh lo kal ve sela, nang pawn Duhawma hruai ve bawk la. Kan ngaih zawng te ṭheuh hruai ve bawk ila," Kimkimi chuan lo ti ve bawk a.

Bialpa te hruai tih vel chu ka phur vak lo. Bakah Joshua leh a bialnu hmuh dun kha nuam ka ti lo.

Zothana bawk chuan, "Enteh u, news ka hria ania," awki hniam deuh zawk hian a ti sa a. Kan beng kan dawh nghal vat. "Joshua hian nupui a nei dawn hnai tih thawm ri ret ka hria ania." Kei chu ka khawng awt ni mai in ka hria. Mawii chuan, "Awii, he pa lah hi engmah a sawi lo. A in la hrang tawh lutuk a," lawm lo tih hriat zet in alo ti ve bawk. Kei chu ka ngawi reng. Kimkimi chuan, "An ti ve mai nih chu, a nei lo ang. An khaw lam ah in an sa ṭan ve chauh a nia. In sak zawh hman chuan a nei teuh loh," alo ti ve bawk a.

Joshua hi Champhai lam mi ania. A nu leh a nau pahnih te nena cheng ho an nia. Mizoram ka lo haw tirh lam deuh khan, in an sak ṭan tur thu vel kha a sawi ngei a. Amah pawh a han haw zin phah viau bawk anih kha. Amah hi kan khaw lam ah doctor hna chelh in an post mek ani. Kan khua hi a lian ve tawh ang reng a, kan damdawi in ah pawh hian doctor pa 3 lai chu an awm ve tawh ani.

Eng eng emaw te sawi in an haw ta hlawm a. Zirlai ho buaipui in ka buai leh tawh khawp mai. Weekend picnic ka sawi chu an phur hlawm khawp mai.

Picnic na vel tur be kual in kan mamawh tur ang te ka ngaihtuah khawm bawk a. Kan ṭhiante ho kha chuan an ngaihtuah kim leh dawn miah lo a. Duhawma hi tunlai chu a zia hi a dang riau a. Alo kal pawh hian damdawi in lam an buai chhuan lam hian a let leh vat ṭhin.

Kan picnic hun pawh alo thleng ta. Kan dawr ho hi Pathian zar ah kan ṭha hnem ve tawh a. Zirlai 20 leh staff pangngai 15 vel lai kan nia. A ṭhen in lirthei an nei ve fur a, a nei lo ho chhuanna tur te ngaihtuah in, kan ṭhian dang te an ngaih zawng te nen, kan in phur ve nak mai.

Kan in phur chhuak ta hlawm a. Tui chen nuam ti mi tih tak ah, ka cheng hle ani. Ka lu na deuh chu, kan bag dah na lam ah ka in thlak a. Mipa ṭawng ri bul ka hriat chuan ka ngai thla chiang deuh a. "Aw, i duh leh titla la, i duh leh pai tlang la. Ka buaina tur a awm lo, i thu a lawm," ati nghat nghat a. Phone ah mi a bia ani ngei ang. Duhawma aw nia ka hriat vang chuan, ka va pan hnai a. "Enge i tiha?" ka va ti chu alo phu chiam leh nghal. "Ih, a... englo ania, hna lam thil ania," a ti bah nak a. "Hna thil maw? I hna thil ah chuan naute tih tlak tir te a tel amaw?" ka melh kar.

Min lo hnaih in ka kut ah a rawn vuan a. "Mamte, i ngai kawi mai mai anih kha. Ka patient pakhat in nau a pai a, tih tlak a duh a. Titla lo tur in ka ti char a, mahse tih tlak a tum ṭal si a. Khami ti khan ka ti ta mai anih kha. Engmah huat tur a awm lo ania," a ti dap a. Ka awi em pawh ka hre lo. "Ka duatnu hi a thikthu a chhe ve tihna em ni?" nui deuh suk chunga a rawn tih leh chuan, "Chhe mai e. Ah, kal ang, eitur an siam," tih leh kal ka rual a. Ka hnung lam aṭang ka dar ah min rawn kuah in kan in zui chhuak a. Joshua leh a bialnu lo phei mek nen kan in tawk a. Duhawma chuan, "Khawi lam ah nge?" tiin alo bia a. "Kan han in chance ange," nui huah huah chung in Joshua chuan alo chhang a.

Ka rilru nuam lo leh ruih tawh. Hepa vang hian tinge tiang a ka awm ziah ni. "Hreptak hian," ka lo sawi chhuak amawni. Duhawma chuan, "Maw?" alo ti vat a. "Bawng mawle," tih leh kal san nal ka rual a. Ka hnung lama min lo zui ve zel pawh chu ka ngaihsak tawh lo.

Kan ṭhian te bul ka thlen chuan, "Khawnge i kal?" an lo ti vat a. "Ka in thlak," ti hmuk in, "ka va tai har lawk," tiin dil awmna lam ka pan a. Dil kam ah chuan ṭhu in, meizial ka zu vang a. Rei ngial ka ṭhut hnu chuan, khua pawh a chawhnu ve ruih tawh, ka awm rei viau aniang. Tui ah chuan lung ka vawm ka vawm a.

Hnung lam aṭang aw thian kharh kharh ka hriat rual chuan ka hawi vat a. Joshua alo ni. "I va huai ve, nangmah a i lo awm," rawn tiin, ka bul ah a rawn ṭhu ve a. "I bialnu nen chance in nei emaw tia, i va rawn kalsan rang ve," ka lo ti vei hmuk a.

"Ka uang nih kha, thil kan han la lawk mai," a ti sup a. "In sawi fiah duh suh, in sawi fiah na chhan tur i neilo," ka ti leh nghat a. "Mali, i hlim em?" a aw ri chuan chhungril a fan rai mai. Chhan mai harsa ka ti. Ka hlim em? Ka hre lo ani. "A pawimawh lo," ka lo ti leh sep a.

"I hlimna hi ka tan a pawimawh ber asin," a ti thuk leh ruih a. A mah chu melh in, "Nupui i nei dawn an tia, hriat hmasak ber chu ka phu lo maw," tiin kan titi chu thlak ka tum a. "Nupui pawh nei ila, nang chu no 1 i ni reng ang. Tu thik phak mah i nilo, ka ṭhian, ka farnu, ka hmangaih i nia lawm," alo tih leh chuan, ka rilru ana vawng vawng a. A tan chuan ṭhian ṭha, farnu ang chauh ka ni. Awle, a ṭha lawm. "Nupui i neih ni ah chuan ka nalh viau ang," tiin nui sang in ka melh a. A mitmeng chu a thuk ruih a, a nui ve lem lo.

"I hlim angem? Ka nupui neih ni ah chuan hlim tak in min lawmpui thei angem?" tia min zawh chuan, ka nui hmel chu a reh riai riai in ka ring. Mahse in ngaihtuah harh leh vat in. "Dawn chiang e le... Ka ṭhian ṭha ber, ka unaupa ni bawk. Nupui neih ni chuan ka mawi in ka hlim em tur ania lawm," ka ti zang vah a. A ngawi ngul a, ngaihtuah muk deuh nei ang mai ani.

"Phei dawn ila," tiin a tho thurh a. Kan ṭhiante awmna lam pan in kan in zui phei ta hnak hnak a. "Mamte," Mawii chuan alo ti loh loh a. Kan lam an lo hawi ṭhap a. Joshua bialnu judy chuan min lo melh no lo viau mai.

***Download NovelToon to enjoy a better reading experience!***