Ek Adhoora Hisaab

Kabir ke dil mein paida hua junoon din-ba-din badhta ja raha tha. Door se Surbhi aur Aarav ko khush dekhna uske liye bardasht karna mushkil ho raha tha.

Dusri taraf Surbhi aur Aarav apni shaadi ke sapne saja rahe the. Dono ne decide kar liya tha ki agle hafte dono families ko mil ayenge aur engagement ki date fix karenge.

Surbhi ki maa bhi Aarav ko bahut pasand karti thi. Unhe lagta tha ki itne saalon baad unki beti ko koi aisa insaan mila hai jo usse sacche dil se chahta hai.

Ek shaam Aarav Surbhi aur uski family ko dinner par le gaya. Sabke chehre par khushi saaf nazar aa rahi thi.

"Tumhari beti bahut lucky hai, aunty," Aarav muskurate hue bola.

Surbhi ki maa hans padi.

"Lucky meri beti nahi, beta... lucky tum ho. Kyunki Surbhi bahar se jitni mazboot dikhti hai, andar se utni hi toot chuki hai."

Ye baat sunkar Aarav ne Surbhi ki taraf dekha. Uski aankhon mein halka sa dard tha.

Dinner ke baad Aarav aur Surbhi terrace par akele khade the.

"Main wada karta hoon, Surbhi... tumhari aankhon mein kabhi aansu nahi aane dunga," Aarav ne uska haath pakar kar kaha.

Surbhi ki aankhen bhar aayi.

"Bas kabhi mera saath mat chhodna."

"Marte dam tak nahi," Aarav ne muskurate hue jawab diya.

Us raat Surbhi ne bahut dino baad khud ko poori tarah khush mehsoos kiya.

Lekin agle hi din sab kuch badal gaya.

Subah-subah Surbhi ke phone par ek courier aaya.

Usne packet khola to uske hath kapne lage.

Andar uski aur Aarav ki kal raat ki tasveerein thi.

Saath mein ek chitthi bhi thi—

"Shaadi ki taiyariyan achhi chal rahi hain... lekin kya tumne Aarav ko apna poora sach bataya hai?"

Neeche sirf ek naam likha tha—

Kabir.

Surbhi ke pairon tale zameen khisak gayi.

Woh samajh gayi thi ki Kabir ab bhi uska peecha kar raha hai.

Darte hue usne Aarav ko sab kuch batane ka faisla kiya.

Shaam ko jab Aarav usse milne aaya, Surbhi ne rote hue saari baat bata di.

Aarav ne gusse mein kaha—

"Ab bahut ho gaya. Main us Kabir ko tumhari zindagi se hamesha ke liye door kar dunga."

Lekin Surbhi dar gayi.

"Nahi Aarav, tum Kabir ko nahi jaante. Woh kisi bhi had tak ja sakta hai."

Tabhi Aarav ke phone par Unknown Number se call aayi.

Aarav ne call receive ki.

Dusri taraf se ek thandi awaaz sunai di—

"Mr. Aarav Singhania... Surbhi ko bachana chahte ho na?"

"Kaun ho tum?" Aarav chillaya.

Aadmi hansne laga.

"Jis ladki se tum shaadi karne wale ho, woh kabhi meri thi... aur aaj bhi sirf meri hai."

Aarav ka gussa badh gaya.

"Lekin ek baat yaad rakhna... agar tum dono ki shaadi hui, to sabse pehle tumhari jaan jayegi."

Call cut ho gayi.

Kamre mein sannata chha gaya.

Surbhi ka chehra safed pad chuka tha.

Aur Aarav ne pehli baar Surbhi ki aankhon mein woh darr dekha, jo shayad woh pichhle do saalon se akeli seh rahi thi.

Lekin dono ko nahi pata tha...

Kabir ka asli maksad sirf Surbhi ko paana nahi tha.

Uske peeche ek aur sach chhupa tha...

Ek aisa sach jo Aarav ke poore parivaar ko barbaad kar sakta tha.

Part 8

Kabir ke phone ke baad Surbhi poori tarah toot chuki thi. Uske haath kaap rahe the aur aankhon se aansu rukne ka naam nahi le rahe the.

Aarav ne use apni baahon mein le liya.

"Bas, Surbhi... ab aur nahi. Main tumhe kuch nahi hone dunga."

Lekin Surbhi jaanti thi ki Kabir sirf dhamki dene walon mein se nahi tha. Woh jo kehta tha, use poora karne ki koshish zaroor karta tha.

Agli subah Aarav ne apne kuch trusted logon se Kabir ke baare mein information nikalwana shuru kar di.

Aur jo sach saamne aaya, use sunkar Aarav bhi hairan reh gaya.

Kabir do saal pehle sirf Surbhi ka boss hi nahi tha...

Balki uske khilaaf pehle bhi do stalking aur harassment ki complaints ho chuki thi. Lekin paise aur power ke dam par har baar woh bach gaya tha.

Ye sab jaanne ke baad Aarav ka gussa aur badh gaya.

Usne decide kar liya ki ab woh Kabir se seedhi baat karega.

Lekin usse pehle hi ek aur museebat unki zindagi mein aa gayi.

Ek shaam Surbhi ki maa achanak behosh ho gayi.

Unhe turant hospital le jaya gaya.

Doctor ne bataya ki unki tabiyat stress ki wajah se kharab hui hai aur unhe kisi bhi tarah ki tension se door rakhna hoga.

Hospital ke bahar baithi Surbhi khud ko dosh dene lagi.

"Meri wajah se sabke saath bura ho raha hai..."

Aarav ne uska chehra apne haathon mein pakad kar kaha—

"Tumhari wajah se kuch bhi bura nahi ho raha. Galti us insaan ki hai jo tumhari zindagi ko barbaad karna chahta hai."

Us raat Aarav ne Surbhi ke saamne ek faisla rakha.

"Hum jaldi se engagement karenge."

Surbhi hairan reh gayi.

"Abhi? Itni jaldi?"

"Haan. Main poori duniya ko batana chahta hoon ki tum meri ho aur main tumhara saath kabhi nahi chhodunga."

Pehli baar itne dino baad Surbhi ke chehre par sachchi muskaan laut aayi.

Dono families bhi is rishte se khush thi.

Engagement ki date ek mahine baad ki fix kar di gayi.

Sab kuch dheere-dheere normal hone laga.

Lekin Kabir chup nahi baitha tha.

Ek raat woh apne cabin mein baitha Surbhi ki purani tasveer dekh raha tha.

Uske saamne table par ek file rakhi thi.

Us file ke cover par likha tha—

"Singhania Group - Confidential"

Kabir dheere se muskuraya.

"Ab waqt aa gaya hai Aarav ko uske parivaar ka sach batane ka..."

Usne file kholi aur andar se ek purani photo nikali.

Photo mein Aarav ke pita aur Kabir ke pita ek saath khade the.

Aur photo ke peeche ek line likhi thi—

"Is dhokhe ka badla ek din zaroor liya jayega."

Kabir ki aankhon mein nafrat saaf nazar aa rahi thi.

Tab samajh aaya...

Kabir ka Surbhi ke peeche pagalpan sirf mohabbat nahi tha.

Woh Aarav aur uske parivaar se purana hisaab chukta karna chahta tha.

Aur Surbhi...

Sirf us badle ka ek hissa ban gayi thi.

Le kin asli sach abhi bhi baaki tha..

***Download NovelToon to enjoy a better reading experience!***