Chapter 4

Bismillah hir Rahman nir Rahim

Qalb e Jaan

By:Umm-e-Omama

Chapter:4

°°°°°

"Adam... Adam... Adam..."

Kaafi der dhoondhne ke baad aakhir woh use mil hi gaya.

Aur Us par nazar parte hi woh apna bag sambhalti bhaagte hue uske qareeb aayi.

"Aaram se Heer."

Uska phoola tanfus dekh kar woh narmi se kehne laga.

"Kal sara din kahan the Mera phone kyun nahin uthaya tum ne Pata bhi hai kitni calls ki maine tumhein?"

"Darasal kal ka din kaafi masroofiyat bhara tha. Raat ko jab free hua tab tumhari missed calls dekheen, lekin phir is khayal se call back nahin ki ke tum so rahi hogi."

Uske saath chalte hue woh dheeme lehje mein use kal guzre din ki masroofiyat batane laga.

"Achha waise tum ne yeh to poocha hi nahin ke main tumhein call kyun kar rahi thi."

Adam ki baat mukammal hote hi woh jaldi se kehne lagi.

"Heer, call to tum mujhe waise bhi karti hi ho. Kya kal koi khaas baat thi?"

"Haan na pagal, meri shaadi hone wali hai."

Uski baat sunte hi Adam ke chalte qadam ruk gaye.

"Kya matlab?"

"Papa ne kaha hai agar Heer isi tarah parhai ke maamle mein laparwahi dikhati rahi to bhej dunga use uske sajan ke sang."

"Achha... to yeh baat hai."

Itminan bhara saans lete hue woh phir se qadam uthane laga.

"Haan na... khushi ke maare mere to pair hi zameen par nahin tik rahe. Aur main to bas apne hone wale sajan ko soch soch kar pagal ho rahi hoon. Batao na Adam, kaisa hoga woh Waise mujhe Turkish dramas ke larke pasand hain, to unhi ke jaisa hona chahiye."

Uske saath chalte hue woh khushi ke baais bina ruke musalsal bole ja rahi thi jabke Adam bas muskurate hue uski baatein sun raha tha.

°°°°°

University se wapas aate waqt roz ki tarah aaj bhi use wohi manzar saamne dekhne ko mila aur is baar bina koi lihaz kiye woh ghusse se qadam uthati uski janib barh gayi.

Woh phone par kisi se baat karne mein masroof tha lekin nazrein bas apne qareeb aati Heer par tiki hui thin.

"Baat suniye."

Uske qareeb jaate hi woh ghusse se kehne lagi.

Call kaat kar woh poori tarah uski taraf muda aur us mard ki dilkashi dekh kar ek pal ke liye woh kuch keh hi na saki.

Surkh-o-safed rangat ka hamil woh shakhs behad wajeeh tha aur uske gaalon par qudrati taur par bikhri surkhiyan us shakhs ki wajahat mazeed barha rahi thin.

"Kitna pyara banda hai... iske gaal kitne red hain. Mere to gaal itne red tab hote hain jab main blush on lagati hoon... lekin kya pata is bande ne bhi lagaya ho."

"Kaho."

Uski awaaz par Heer ne apni aankhen zor se band karke kholeen aur zehan mein chalte khayalat ko jhatak kar wapas ghusse wale roop mein aa gayi.

Yeh alag baat thi ke uske ghusse wale roop se saamne wale shakhs ko koi farq nahin parna tha.

"Kya masla hai aap ke saath? Dikhne mein to bohot shareef insaan lagte hain lekin hain bilkul nahin. Yeh baat main achhe se jaanti hoon kyun ke kisi larki ke ghar ke bahar awara larkon ki tarah rozana kharay hona shareefana harkat to bilkul nahin hai."

"Aaram se mohtarma... zara waqfa lekar baat karein. Main yahin par hi hoon."

Heer ke ek hi saans mein kehne par woh jaldi se bola.

"Yehi to pooch rahi hoon. Rozana mere ghar ke bahar kya karne aate hain aap? Aur..."

"Heer."

Basit ki awaaz par woh jumla adhoora chhor kar uski taraf dekhne lagi jo ghar ke darwaze par khara use andar aane ka ishara kar raha tha.

Maarij par ek ghoorti nazar daal kar woh bhaagte hue andar ki taraf gayi jab Basit ne wahan kharay Maarij ko apne qareeb bulaya aur use apne saath liye andar ki taraf chala gaya.

°°°°°

Use apne saath liye woh drawing room mein dakhil hua aur use baithne ka ishara karke khud bhi uske saamne wale sofa par baith gaya.

"Roz dekh raha hoon tum mere ghar ke bahar aa kar kharay hote ho. Aur tum yahan kyun aa rahe ho iska andaza bhi mujhe ho raha hai, Maarij khan."

"Aap mujhe jaante hain?"

Uske munh se apna naam sun kar woh taajjub bhare andaaz mein poochhne laga.

"Jaanta hoon. Tumhare kiye gaye karnamay har koi hi jaanta hoga. Yehi wajah hai jo main tumhein apne ghar mein bitha kar tumhare saath aaram se baat kar raha hoon. Dekho, tum jo rozana ghar ke bahar meri beti ke intezar mein baithe rehte ho na, to yeh harkatein chhor do. Agar kisi ne is baat par gour kar liya to tumhara kuch nahin bigrega lekin meri beti logon ke sawalon mein phans jayegi."

"Main aisa kuch nahin hone dunga."

Basit ki baat sunte hi woh jaldi se kehne laga.

"Main Heer ko pasand karta hoon. Woh jis university mein parhti hai woh mere Baba ki hai. Kuch din pehle maine Heer ko wahin dekha tha aur woh mujhe bohot achhi lagi. Aap yaqeen karein mera irada ghalat nahin hai. Main Heer se shaadi karna chahta hoon."

"Agar aisi hi baat hai to apne baron ko lekar aao. Aise maamlaat wohi tay karte hain."

"Ji... ji zaroor. Aap jab kahenge main apni Bee Jaan ko le aaunga."

Uske betabi bhare andaaz par woh halka sa hansa.

"Kal lana chaho to le aao."

"Ji zaroor, main kal hi le aaunga. Aap ka bohot shukriya."

Shukarguzar nazron se uski taraf dekhte hue usne apna mazboot haath uski taraf barhaya aur usse haath mila kar Allah Hafiz kehta wahan se chala gaya.

°°°°°

Chhote se dhaba type hotel mein woh dono bahar rakhi kursi aur table mein se ek par baithe hue the aur unke saamne chai ka chhota sa bhaap urata cup rakha hua tha.

"Hum yahan kyun aaye hain Ramish?"

"Kyun ke kal hum jahan mile the us jagah ka zikr maine apne bhaiyon ke saamne kar diya tha. Agar tumhein phir wahin lekar jata to un dono ne bhi wahan aa jana tha."

"Aur aap ko ek yehi jagah mili thi"

"Darasal main khud is jagah par pehli baar aaya hoon. Mujhe nahin pata yahan ka mahaul ya khana kaisa hai, par chai achhi hai."

Chai ka ghont lekar usne cup wapas table par rakh diya.

"Ramish, hum university mein mil lete hain na. Itna bhi kaafi hai. Main roz roz is tarah nahin mil sakti."

"Haaye... wohi to kehta hoon jaan-e-Ramish, shaadi kar lo mujh se. Phir kahin milne ki zarurat nahin paregi. Har waqt tum mere saath, mere paas hi rahogi."

Chehre par dilkash muskurahat sajaye woh har baar ki tarah apni baat apne pasandeeda topic ki taraf le aaya.

"Main abhi shaadi nahin kar sakti Ramish. Main pehle parhna chahti hoon, kuch banna chahti hoon. Meri ek chhoti behen hai, use tanha nahin chhor sakti main."

"To hum use bhi apne saath rakh lenge."

Itminan bhare andaaz mein masle ka hal pesh kiya gaya.

"Ramish, agar aap ko shaadi ki itni hi jaldi hai to mera intezar mat karein. Kisi aur ko le aayen apni zindagi mein. Yaqeen karein main..."

"Roha, aaj ke baad main tumhare munh se aisi koi baat na sunoon."

Woh bazahir to muskurate hue keh raha tha lekin uske lehje ki sakhti Roha ba aasani mehsoos kar gayi thi.

"Tumhara intezar main apni aakhri saans tak kar sakta hoon aur agar karna para to karunga bhi. Tum woh pehli larki ho jisne Ramish Khan ke dil par dastak di aur tum hi woh aakhri larki ho jo Ramish Khan ki zindagi mein rahegi. Tumhare ilawa na kabhi koi tha, na kabhi koi hoga. Main tumhara hoon aur tumhara hi rahunga. Aur tum meri ho... sirf meri hi rahogi."

Dheeme magar sakht lehje mein kehta woh use apni har baat samjha gaya tha.

Yeh uski aadat thi. Agar use ghussa bhi aata tha to woh kabhi uska izhar Roha par nahin karta tha, albatta sakht lehje mein use baat samjha zaroor deta tha.

Woh hamesha pyaar mohabbat se rehta tha lekin Roha ki kahi gayi woh baatein jo use pasand nahin thin aksar use junooni bana deti thin.

"Samajh gayin"

"Ji, samajh gayi."

Uski jhuki nazrein dekh kar Ramish ne apna mazboot haath table par dhare uske narm haath par rakha aur apni sakht girift mein qaid kar liya.

Chehre ke taassuraat narm par gaye aur saamne baithi apni mehbooba ko dekh kar lab beikhtiyar muskura uthe.

Lekin kaanon mein parti awaaz ke baais uske chehre ke taassuraat pehle se kahin zyada sakht ho gaye.

°°°°°

***Download NovelToon to enjoy a better reading experience!***