Chapter 5

Bismillah hir Rahman nir Rahim

Qalb e Jaan

By:Umm-e-Omama

Chapter:5

°°°°°

"Api, kya soch rahi ho"

Use sochon mein gum pa kar woh uske qareeb baithti poochhne lagi.

"Kuch to garbar hai Yashal, main bata rahi hoon."

"Kya garbar hai?"

Nasamjhi se uski taraf dekhte hue woh phir se goya hui jis par Heer ghoom kar poori tarah uske saamne baith gayi.

"Maine tumhein bataya tha na woh police wala ghar ke bahar roz aata hai."

"Haan, phir aaya kya?"

"Bilkul. Aur aaj to use Papa ne pakar liya. Na sirf pakra balki apne saath kamre mein bhi le gaye."

"To is mein garbar kya hai"

"Garbar to koi nahin hai. Woh to main bas yeh soch rahi thi ke andar kamre mein kya baatein ho rahi thin. Kaan laga kar sunne ki koshish bhi ki lekin kuch sunai nahin diya. Pata hai itna tajassus mujhe nahin hota agar main un baaton mein apna naam na sunti. Aur is sab ke baad se main bas yehi soch rahi hoon ke woh kya baat kar rahe the aur baat kar rahe the mere baare mein hi... kya baat kar rahe the woh."

"Api, mere paas aap ke jitna dimagh nahin jo yeh sab sochti phiroon. Aap aaram se sochein, main chai banane ja rahi hoon. Aap ke liye bhi bana kar le aati hoon taake aap ko sochne mein aur madad mil sake."

Uska shana thapthapate hue woh kamre se bahar chali gayi aur apna sar hilaate hue Heer wapas sochon mein gum ho gayi.

Woh banda itne dino se ghar ke bahar a kr kyun khara hota tha?

Basit ne agar use dekh liya tha to ghussa kyun nahin kiya?

Kamre mein un dono ki kya baatein hui?

Aur un baaton mein uska naam kyun aaya tha?

°°°°°

"Akele akele maze le rahe ho, thore humein bhi kara do."

Peechhe se aati awaaz par usne siyah nigahein mor kar us janib dekha jahan baithe larke apni ghaleez nazron se Roha ko dekhne ka kaam anjaam de rahe the.

Us jagah ka jaisa mahaul tha, wahan aise logon hi ki tawaqqo ki ja sakti thi. Woh pehli baar yahan aaya tha. Agar use zara bhi andaza hota ke is jagah ka mahaul kaisa hai to woh Roha ko kabhi aisi jagah par na lata.

"Yeh tumhari taraf dekh rahe hain na"

Roha ki taraf dekhte hue woh sanjeedgi se poochhne laga.

Jis par usne jaldi se apna sar nafi mein hila diya, kyun ke aisa na karne ki surat mein Ramish ka rad-e-amal woh jaanti thi.

"Chhoriye Ramish, hum chalte hain yahan se."

Uska haath pakarti woh use kheenchte hue wahan se le jaane lagi.

Jab unki taraf se pass kiye gaye Kuch aur comments un dono ke kaanon mein pare, jise sunte hi Ramish ne apna haath forna uski girift se azaad karwa liya.

Ab bus woh larke the aur Ramish khane KY sar pr sawar gussa.

"Ramish!"

"Ramish, chalein yahan se!"

Logon ki jama hoti bheer dekh kar woh ghabrate hue use wahan se le jaane ki koshish karne lagi.

Lekin jab Ramish Khan par ghussa aur junoon sawar hota tha tab woh kahan kisi ki sunta tha.

Maar maar kar un larkon ka woh haal behaal kar chuka tha.

Hotel ka maalik use police ki dhamki de raha tha, jise sun kar uski na sahi, albatta Roha ki haalat zaroor bigar rahi thi.

Bina kuch soche woh beikhtiyari mein agle hi pal uske seene se aa lagi.

Aur Ramish Khan ke ghusse bhare taassuraat dheele par gaye.

Lamhe bhar mein ghusse ki jagah hairat ne le li.

Pehli baar hi to unke darmiyan zindagi mein aisa koi lamha aaya tha jab Roha uske is qadar qareeb aayi thi.

Apni harkat par sharminda hoti woh us se door hui aur chehre par haath pherti mazeed wahan ruke baghair chali gayi.

Wallet nikaal kar Ramish ne hotel ke maalik ke munh par nuqsan ke paise maare aur bhaagta hua uske peechhe chala gaya.

"Roha, gaari mein baitho."

Uske peechhe aate hue woh tez lehje mein kehne laga, jise nazarandaz karti woh tez tez qadam uthati rahi.

Khud ko nazarandaz kiye jane par Ramish ne uska haath apni girift mein liya aur use kheenchte hue apni gaari ki taraf le gaya.

Roha ko front seat par bitha kar woh khud driving seat par aaya.

Lekin gaari start karne ki usne zahmat nahin ki.

"Roha, tumhein thori kuch kaha hai"

"Lekin jo kuch kiya hai woh meri wajah se hi to kiya hai Ramish. Log dekhte hain, baatein banate hain. Aise logon ko nazarandaz kar dena chahiye."

"Nazarandaz karke unhein aur sheh deni chahiye na Main baqiyon jaisa nahin hoon. Main Ramish Khan hoon. Agar koi meri cheez ki taraf dekhe ga to uski aankhen nikaalna mujhe khoob aata hai."

Uske aansu saaf karte hue woh sakht lehje mein kehne laga.

"Lekin main koi cheez nahin hoon Ramish."

"Bilkul... tum to sarmaya ho mera, qeemti sarmaya. Ab rona band karo. Jo ghussa tum ne mera dekha hai hamare yahan uski koi ahmiyat nahin hai. Agar mera asli ghussa dekh lo to shayad tum behosh ho jaogi aur main aisa bilkul nahin chahta. Lekin woh kya hai na Roha, tumhare yeh aansu mujhe ghussa hi dila rahe hain aur taish mein aa kar main wapas ja kar kisi ki dhulai karoon, us se pehle apna yeh rona band kar lo."

Uski dhamki par woh haath ki pusht se apni aankhen aur gaal ragar kar saaf karne lagi.

Jise dekh kar Ramish ne uske haath neeche kar diye aur tissue paper nikaal kar uski aankhen aur gaal saaf karne laga.

"Meri jaan, itna zulm kyun kar rahi ho khud par"

Uski naak saaf karte hue woh dheema sa hansa.

"Tumhari naak..."

Uski adhoori baat samajhte hi woh jaldi se tissue paper utha kar rone ki wajah se behti apni naak saaf karne lagi.

"Achha sorry. Ab mood theek karo. Meri sorry accept karo aur mujhe hans kar dikhao taake main pursukoon ho jaoon."

Uske kehne par na chahte hue bhi woh beikhtiyar hans padi.

Jise dekh kar woh itminan bhara saans leta gaari uske ghar ki taraf daura gaya.

°°°°°

"Ghar ja rahe hain sir"

Duty time khatam hote hi woh apna samaan uthata bahar ki taraf jaane laga jab wahan aata Arsal us se daryaft karne laga.

"Haan, ghar ja raha hoon."

"Sab theek hai? Kaafi thake hue lag rahe hain."

Uske saath chalte hue woh uske thakawat zada chehre ko dekh kar poochhne laga.

Jis par apne chalte qadam rok kar Maarij uski taraf dekhne laga.

"Jaante ho Arsal, poori police force mein sab se zyada qareeb mere tum ho aur main yahan sirf tum par aitbaar karta hoon. Is liye kabhi mujhe dhoka mat dena, warna bohot bura hoga."

"Sir, aap aisi baat kyun kar rahe hain"

"Main do saal se Badshah ke case par kaam kar raha hoon. Jab bhi main uske qareeb pohanchta hoon woh mujh se door chala jata hai. Mera agla qadam kya hai, yeh sirf tum jaante ho. Lekin tumhare saath saath Badshah bhi jaan jata hai. Aise mein mera tum par shak karna fitri baat hai."

"Ho sakta hai koi aur ho jo Badshah ke saath mila hua ho aur wohi aap ki baatein us tak pohanchata ho."

"Ho sakta hai, par woh kaun hai main nahin jaanta. Lekin itna yaqeen mujhe zaroor hai ke woh tum nahin ho Arsal."

Uska shana thapthapate hue woh lambe lambe dag bharta apni gaari ki taraf chala gaya.

°°°°°

"Namak tum ne zyada kar diya hai. Upar se yeh saalan bhi theek se nahin bana aur mujhe to gosht bhi kacha lag raha hai."

Apne saamne pesh hue khane ka pehla niwala lete hi uski nuqs nikaalne ki aadat shuru ho chuki thi.

Yeh khana uske kameenon ne banaya tha, phir woh aaram se kaise kha leta

"Zyada nuqs na nikaal. Jo mil raha hai chup chaap kha le."

Use ghoorte hue Zarwan apni jagah par aa kar baith gaya.

Khana banane ki wajah se uska to pehle hi ghusse se dimagh kharab ho raha tha.

Agar Ramish bhi un dino ke saath hota to use itna ghussa na aata.

Lekin woh maze se khata rahe aur baqi dono uske liye khana banate rahein, yeh baat use ghussa dila rahi thi.

"Are chup chaap kyun kha loon Mera kaam hai agar tum koi ghalti karo to use theek karwaoon."

"To khud ek bari ghalti hai, pehle use to theek kar le."

Uski baat par Ashhad tapte hue kehne laga.

Apni plate mein khana daal kar usne niwala munh mein daal liya.

Pehla ehsaas jo use hua tha woh yeh ke namak waqai tez ho gaya tha.

Lekin is baat ka izhar karke uska Ramish ko sar par chadhane ka koi mood nahin tha.

"Agar main ghalti hoon to phir ghalti tum dono bhi ho kyun ke hum is duniya mein ek saath hi utre the."

Ramish ke kehne ki der thi kyun ke uske baad unki na rukne wali behas shuru ho chuki thi.

Jo sirf tab hi ruki jab kaanon mein Maarij ki gaari ka horn sunai diya.

"Assalam-o-Alaikum."

Dining room mein dakhil hote hi Bee Jaan ke qareeb jaate hue usne buland awaaz mein salaam kiya.

Yeh uski aadat thi. Jaate waqt aur aate waqt woh sab se pehle apni maa se milta tha.

"Wa Alaikum Assalam. Fresh ho jao beta, phir khana kha lo."

"Nahin, mujhe bhook nahin hai. Aap jab khana kha lein to mujhe bula lijiye ga. Aap se kuch zaroori baat karni hai."

Apni baat keh kar woh dining room se bahar nikal gaya.

Jabke wahan baithe woh teenon uski baat sunte hi chonk kar aankhon hi aankhon mein ishare karne lage.

Tajassus tha ke unke Lala ko Bee Jaan se kya baat karni thi.

Yaqeenan koi khaas baat thi warna woh har baat apne bhaiyon ke saamne hi keh deta tha.

°°°°°

***Download NovelToon to enjoy a better reading experience!***