قسط نمبر 1 طلاق

رات کا وقت تھا۔ ایک سنسان سا علاقہ، اور اس کے درمیان ایک گھر۔

آسمان پر گہرے بادل چھائے ہوئے تھے، جبکہ تیز بارش مسلسل برس رہی تھی۔ آسمان پر چمکتی بجلی ایک خوفناک منظر پیش کر رہی تھی۔

گھر کی لائٹ بند تھی۔ کھڑکیاں کھلی ہوئی تھیں اور پردے تیز ہوا کے باعث مسلسل ہل رہے تھے۔

گھر کے مرکزی دروازے کے سامنے موجود لاؤنج میں ایک میاں بیوی آپس میں لڑ رہے تھے، جبکہ ایک پانچ سال کا بچہ پردے کے پیچھے چھپ کر یہ سب دیکھ رہا تھا۔

عائشہ روتے ہوئے بولی،

"مشتاق، آپ مجھے طلاق نہیں دے سکتے... پلیز۔ میں نے کیا کیا ہے؟ بولو۔ آپ نے کہا تھا کہ گھر سے بھاگ کر شادی کرتے ہیں، تو میں نے کی۔ جو کچھ بھی میرے نام تھا، وہ سب آپ کے نام کر دیا، یہ سوچ کر کہ شاید آپ بدل جائیں گے اور میری قدر کریں گے، مگر ایسا نہیں ہوا۔ مجھے گھر سے نکال دیں، مگر طلاق نہ دیں۔"

مشتاق نے عائشہ کی بات سنی تو زور زور سے ہنسنے لگا۔

وہ ہنستے ہوئے دو چار قدم آگے پیچھے چلا، پھر عائشہ کے سامنے آ کر کھڑا ہو گیا۔ ماتھے پر ہاتھ مارا اور غصے سے بولا،

"رونا دھونا بند کرو۔ میں نے صرف ایک غلطی کی تھی، تم سے شادی کر کے۔ اب اسی شادی سے تمہیں آزاد کر رہا ہوں۔"

عائشہ مسلسل رو رہی تھی۔

مشتاق نے غصے سے اس کا بازو زور سے پکڑا اور بولا،

"اپنے بھائی کے پاس چلی جاؤ۔ میں نے سنا ہے وہ کافی امیر ہو گیا ہے۔ اور اگر نہیں، تو تمہیں اپنے گھر میں نوکرانی ہی بنا لے گا۔"

یہ کہہ کر وہ دوبارہ ہنسنے لگا۔

عائشہ نے روتے ہوئے کہا،

"خدا کا خوف کرو، مشتاق۔ میں اتنی رات کو غذیان کو لے کر کہاں جاؤں گی؟ میرا نہیں، تو اپنے بیٹے کا ہی خیال کر لو۔"

مشتاق غصے سے چیخا،

"بس... بس... بس...! ایک لفظ اور بولا تو جان سے مار دوں گا۔"

وہ دو منٹ تک خاموشی سے صوفے پر بیٹھا رہا۔